ព្រៃឈើនៅតំបន់អូររវាក់ កំពុងត្រូវបានមេឈ្មួញ សាន ចយ កាប់រំលំអារច្រៀកនិងដឹកជញ្ជូនចេញទៅស្រុកយួនតាមរថយន្តប្រភេទយីឌុបវេអងយ៉ាងពេញបន្ទុក ដោយគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានចាត់វិធានការទប់ស្កាត់នោះទេ នេះបើតាមសេចក្តីរាយការណ៏របស់ប្រជាពលរដ្ឋក្នុងស្រុកលំផាត់ ខេត្តរតនគិរី ជាប់ព្រំប្រទល់ស្រុកកោះញែក ខេត្តមណ្ឌលគិរី ។ មេព្រៃស្រុកលំផាត់ ក៏ដូចជាលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី រងការចោទប្រកាន់ថាជាអ្នកឃុបឃិតបើកដៃឲ្យមេឈ្មួញ សាន ចយ ធ្វើអ្វីៗតាមអំពើចិត្ត។ មន្ត្រីបរិស្ថាន និងសមត្ថកិច្ចពាក់ព័ន្ធដទៃទៀតក៏ត្រូវប្រជាពលរដ្ឋរិះគន់ថា ជាអ្នកឃុបឃិតបើកដៃឲ្យមេឈ្មួញ សាន ចយ កាប់ឈើនិងដឹកជញ្ជូនឈើទៅស្រុកយួនយ៉ាងពេញបន្ទុកដើម្បីជាថ្នូរនឹងផលប្រយោជន៍។
រយៈពេលប៉ុន្មានថ្ងៃកន្លងទៅនេះ មេឈ្មួញ សាន ចយ ដែលអាងមានខ្នងបង្អែករឹងមាំ នៅតែបន្តប្រមូលកាប់ឈើនិងដឹកជញ្ជូនឈើចេញពីតំបន់អូររវាក់ យ៉ាងពេញបន្ទុកដោយពុំមានការរារាំងពីមេព្រៃនោះទើយ។ មន្ត្រីអាជ្ញាធរមូលដ្ឋានក្នុងស្រុកលំផាត់ ក៏បានឲ្យដឹងដែរថា មេឈ្មួញ សាន ចយ ដឹកជញ្ជូនឈើឆ្លងកាត់ស្រុកលំផាត់ ចូលក្រុងបានលុង តាមផ្លូវជាតិលេខ៧៨ ហើយចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងរលូន។ ពលរដ្ឋនិយាយថាមន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធក្នុងខេត្តរតនគិរី មិនហ៊ានបង្ក្រាបសកម្មភាពដឹកជញ្ជូនឈើរបស់មេឈ្មួញ សាន ចយ ព្រោះខ្លាចបាត់បង់ផលប្រយោជន៍ផ្ទាល់ខ្លួន។
សេចក្តីរាយការណ៏បានឲ្យដឹងថា ប្រមាណ១ខែកន្លងទៅនេះមេឈ្មួញ សាន ចយ បានលើកឈើដាក់លើរថយន្តនៅចំណុចចម្ការកៅស៊ូក្រុមហ៊ុនដូនពេញ ស្រុកលំផាត់ ហើយដឹកជញ្ជូនចេញទៅស្រុកយួនតាមច្រកទ្វារអន្តរជាតិអូរយ៉ាដាវ ដោយគ្មានមន្ត្រីជំនាញឬសមត្ថកិច្ចពាក់ព័ន្ធណាទប់ស្កាត់នោះទេ។ មន្ត្រីរដ្ឋបាលព្រៃឈើប្រចាំស្រុកលំផាត់ ក៏ដូចជាលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី បានរក្សាភាពស្ងៀមស្ងាត់ បណ្ដោយឲ្យមេឈ្មួញ សាន ចយ បន្តកាប់ឈើនៅតំបន់ព្រៃសហគមន៍អូររវាក់ ហើយដឹកជញ្ជូនចេញទៅស្រុកយួនតាមរថយន្តធំៗទាំងកណ្ដាលថ្ងៃចែសឆ្លងកាត់មុខប៉ុស្ដិ៍ត្រួតពិនិត្យរបស់សមត្ថកិច្ចរាប់សិបកន្លែង។
សកម្មភាពបំផ្លាញព្រៃឈើរបស់មេឈ្មួញ សាន ចយ ជាការបង្ហាញឲ្យឃើញថា បទបញ្ជារបស់សម្តេចតេជោនាយករដ្ឋមន្ត្រី ហ៊ុន សែន ក្នុងការទប់ស្កាត់សកម្មភាពរត់ពន្ធឈើចេញក្រៅប្រទេសកំពុងក្លាយទៅជារឿងឥតន័យ ព្រោះមេឈ្មួញ សាន ចយ កំពុងបង្កើនសកម្មភាពកាប់ឈើនិងដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ ស្រេចតែអំពើចិត្ត។ សូម្បីតែមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងឈរជើងនៅក្នុងខេត្តរតនគិរី ក៏រក្សាភាពស្ងៀមស្ងាត់ដែរ ហើយបណ្ដោយឲ្យមេឈ្មួញ សាន ចយ ធ្វើសកម្មភាពដឹកជញ្ជូនឈើទៅស្រុកយួនយ៉ាងពេញបន្ទុកតែម្តង៕