រាជធានីភ្នំពេញ ៖ នៅក្នុងពេលចូលរួមក្នុងពិធីជួបសំណេះសំណាលជាមួយអ្នកសារព័ត៌មានជាលើកទី២ សម្តេចតរជោ ហ៊ុន សែន បានប្រកាសសួររកមុខលោកឧកញ៉ា និងមន្ត្រីធំៗ ណាខ្លះដែលនាំគ្នាចោមរោមស្រឡាញ់សិល្បះការិនី ហើយត្រូវពិធីការិនីមួយចំនួនបានបង្ហាញ នៅក្នុងបទសម្ភាសន៍ជាមួយបណ្តាញព័ត៌មានផងដែរ ។
សូមជម្រាបថា នៅចំពោះមុខអ្នកសារព័ត៌មានសម្តេច ហ៊ុន សែន មានប្រសាសន៍ថា សម្ដេចបាន ទស្សនាការផ្សាយកម្មវិធី «អាថ៌កំបាំងក្រៅឆាករបស់តារា» របស់ Fresh New TV និង Khmer Talking ផ្សាយរាល់ថ្ងៃសៅរ៍ចុងសប្តាហ៍ ដោយបានឮតារាល្បីភាគច្រើនបានបង្ហើបរឿងមាន មន្ត្រីធំៗ និងឧកញ៉ាៗ តាមសុំស្នេហ៍ខ្លួន ។ អញ្ចឹងសម្តេចស្នើសុំដល់សិល្បៈការិនីទាំងអស់នោះ សុំឲ្យសិល្បះការិនីទាំងអស់នោះបញ្ចេញឈ្មោះមន្ត្រីធំនិងឧកញ៉ាទាំងនោះតែម្ដង ព្រោះដើម្បីកុំឲ្យបាក់មុខ និងខូចឈ្មោះដល់មន្ត្រីធំៗមួយចំនួនធំផ្សេងៗទៀត។
សម្តេចថា « ខ្ញុំសូមផ្ញើរសារជូនដល់ក្មួយៗតារាៗជានារី ដែលឡើងតាមកញ្ចក់ទូរទស្សន៍ និងការសម្ភាសន៍ តាមសារព័ត៌មាន និងវិទ្យុនានា តែងតែមានការមួយចំនួនអះអាងថា អ្នកធំៗ និងឧកញ៉ា តាមស្រឡាញ់ខ្លួនច្រើនណាស់។ ឥឡូវខ្ញុំចង់សួរ តើអាអ្នកធំមួយណា? ឲ្យវាច្បាស់មើល៍ …. អ្នកធំណា? ឧកញ៉ាណា? បើយ៉ាងៗហ្នឹង អ្នកធំមានច្រើនណាស់ និយាយឲ្យចំឈ្មោះទៅក្មួយ ពូអត់ថាអីទេ កុំតែក្មួយថាអញ្ចឹង វាខូចឈ្មោះអ្នកធំគេអស់ហើយបើយ៉ាងនេះ…»
