ខេត្តកំពង់ធំ ៖ ប្រជាពលរដ្ឋរស់នៅក្នុងភូមិរពាក់ពេន ឃុំទ្រៀល ស្រុកបារាយណ៏ ខេត្តកំពង់ធំ បានប្រតិកម្មនឹងទីតាំងកសិដ្ឋានចិញ្ចឹមជ្រូកអត់ច្បាប់មួយកន្លែង ដែលកំពុងតែបង្កខ្លិនស្អុយជាប្រចាំ និងធ្វើឲ្យប៉ះពាល់ដល់សុខភាពរស់នៅរបស់ពួកគាត់មិនអាចទ្រាំបាន ខណៈដែលកសិដ្ឋានមួយនេះ ស្ថិតនៅជាប់អូរ៧៣ ក្នុងភូមិរពាក់ពេន ឃុំទ្រៀល ស្រុកបារាយណ៏ ខេត្តកំពង់ធំ។
លោកពូ អឿង ណែម ប្រធានភូមិរពាក់ពេន បានបញ្ជាក់ថា ប្រជាពលរដ្ឋរស់នៅភូមិនេះមានចំនួ១៣៧គ្រួសារ កំពុងរងខ្លិនស្អុយពីកសិដ្ឋានចិញ្ចឹមជ្រូកមួយនេះអស់រយៈពេលជិត៣ខែមកហើយ ដោយម្ចាស់កសិដ្ឋានអះអាងថា គេមានច្បាប់អនុញ្ញាតិពីស្រុក ទើបអាចបើកបាន។
ទាក់ទងជាមួយនឹងបញ្ហាខ្លិនស្អុយ លោកគាំ តាក់ មេឃុំបានបង្ហើបឲ្យដឹងថា បញ្ហាក្លិនស្អុយនេះ លោកនិងក្រុមប្រឹក្សាឃុំ មន្ត្រីជំនាញពេទ្យសត្វ ធ្លាប់បានចុះធ្វើការអប់រំ ណែនាំនិងកិច្ចសន្យាម្តងរួចមកហើយ ថាឲ្យមានការបោសសំអាតអនាម័យជាប្រចាំ តែម្ចាស់កសិដ្ឋាននេះមិនបានគោរពតាមការណែនាំឡើយ។
ជាមួយគ្នានេះដែរ លោក ជា ផាង ប្រធានបរិស្ថានស្រុកបារាយណ៏ បានបញ្ជាក់ថា កសិដ្ឋានចិញ្ចឹមជ្រូកមួយកន្លែងនេះពិតជាមានខ្លិនស្អុយដល់ប្រជាពលរដ្ឋមែន តែលោកក៏បានចុះមកជាមួយពេទ្យសត្វ និងអាជ្ញាធរមូលដ្ឋានចុះពិនិត្យណែនាំរួចហើយ ព្រមទាំងឲ្យម្ចាស់កសិដ្ឋានបាញ់ថ្នាំ (IM)ដើម្បីកំចាត់ក្លិនស្អុយ តែម្ចាស់កសិដ្ឋាននេះនៅតែមិនអនុវត្តតាមកិច្ចសន្យាទេ។
ចំនែកលោក ឈួន រស្មី និងប្រពន្ធឈ្មោះ អេង ស្រីណូន រស់នៅភូមិសាលាឃុំ ឃុំទ្រៀល បាននិយាយថាខ្លួនគាត់មានច្បាប់ពីស្រុក តែមិនព្រមបង្ហាញប្រាប់អ្នកសារព័តមានទេ ហើយក៏មិនព្រម អត្ថាធិប្បាយឡើយជាមួយអ្នកសារព័ត៍មានទេ ព្រោះគេអាងស្គាល់អ្នកធំ។
ទោះជាយ៉ាងណាក៏ដោយ ប្រជាពលរដ្ឋរស់នៅក្នុងភូមិខាងលើនេះ បានទទួចស្នើសុំឲ្យមន្ត្រីជំនាញនិងអាជ្ញាធរមូលដ្ឋាន មានវិធានការជួយទប់ស្កាត់ឬក៏បិទតែម្តងដើម្បីសុខភាព៕
