កំពង់ធំ ៖ កាលពីវេលាម៉ោង ១ និង១០នាទីរសៀល ថ្ងៃទី ១៤ និង១៥ ខែមករា ឆ្នាំ២០១៨ កម្លាំងនគរបាលនៃស្នងការខេត្តកំពង់ធំ បានចុះបង្រ្កាបបនល្បែង សង្វៀនជល់មាន់ បៀ អាប៉ោង ដុះស្លែមួយកន្លែង នៅជាប់និងព្រុំប្រទល់ស្រុកស្ទឹងត្រង់ ខេត្តកំពង់ចាម ត្រង់ចំនុចភូមិសាស្ត្រតំបន់ភ្នំក្រហម ឃុំបឹងល្វា ស្រុកសន្ទុក ខេត្តកំពង់ធំ ចំងាយពីភូមិអូរកែងទាត់ ជិត១គីឡូម៉ែត្រ ក្រោយពីបែកការណ៍ រឿងមេប៉ុស្ដិបឹងល្វាមិនមានវិធានការបង្ក្រាប បែរបង្កើតអោយមានបនល្បែង បង្កអោយមានភាពអសន្ដិសុខ ក្នុងមូលដ្នាន និងធ្វើអោយភូមិឃុំគ្មានសុវត្តិភាព ប្រាសចាកពីគោលការណ៍របស់រាជរដ្ឋាភិបាល ។
តាមប្រភពពត័មានពីសមត្ថកិច្ចបានអោយដឹងថា ម្ចាស់សង្វៀនជល់មាន់ឈ្មោះ សួង វណ្ណី អាយុ៤០ឆ្នាំ និងប្រពន្ធ ឈ្មោះ ផាន់ ភឿន អាយុ៣៨ឆ្នាំ រស់នៅភូមិកោះផ្កូវ ឃុំបឹងល្វា ស្រុកសន្ទុក ខេត្តកំពង់ធំ បានបើក បនល្បែងស៊ីសង ជល់មាន បៀ អាប៉ោង ក្នុងតំបន់ភ្នំក្រហមជិតនិងភូមិកែងទាត់នេះ ចំនួន៤កន្លែង ដើម្បីចល័ត ចុះឡើង ដើម្បីស្រួលបំភន្ត័ភ្នែកសមត្ថកិច្ច ចំណែកអ្នកមកលេងមកពី៣ខេត្ត កំពង់ធំ កំពង់ចាម និងក្រចេះ តែដល់ថ្ងៃបែកការ ត្រូវបានសមត្ថកិច្ចនគរបាល ខេត្តកំពង់ធំ ចុះបង្រ្កាបតែម្ដង ដោយមុនដំបូងបន្ទាប់ពីបង្រ្កាបភ្លាមៗ ចាប់បានម៉ូតូ៦៥គ្រឿង និងមនុស្ស៣នាក់ តែក្រោយមកទើបស្រាវជ្រាវ ឃើញថាជាម៉ូតូរបស់ប្រជាពលរដ្នធ្វើចំការនៅទីនោះ ក៏អោយទៅប្រជាពលរដ្នវិញ ចំណែកមនុស្ស ក្រោយពីសួរនាំ ឃើញថាមិនពាក់ព័ន្ធក៏លែងទៅវិញផងដែរ ។តែជាក់ស្ដែង សមត្ថកិច្ចបានប្រមូល ម៉ូតូអ្នកជាប់ពាក់ព័ន្ធចំនួន៥៦គ្រឿង និងមាន់ជល់១១ក្បាល តែងាប់អស់៣ក្បាល ចានអាប៉ោង១ និងសម្ភារៈលេងល្បែងមួយចំនួន បានបញ្ចូនវត្ថុតាងទាំងអស់នេះមករក្សាទុកនៅស្នងការដ្ឋាននគរបាលខេត្តកំពង់ធំ ដើម្បីអោយម្ចាស់ម៉ូតូទាំងនោះចូលខ្លួនមកទទួលការណែនាំ និងធ្វើកិច្ចសន្យាអបរំបញ្ឈប់ រួចនិងប្រគល់ម៉ូតូអោយវិញ ៕
