ខេត្តឧត្តរមានជ័យ ៖ នៅព្រឹកថ្ងៃ១៥ មករា ឆ្នាំ២០១៨ បន្ទាប់ពីសវនាការអស់ពេលជាច្រើនថ្ងៃ ហើយបានរកឃើញកំហុសសម្លាប់មនុស្ស ជនសង្ស័យជាឃាតករពីរនាក់ ត្រូវបានតុលាការខេត្តឧត្តរមានជ័យ សំរេចចេញដីកាឃុំខ្លួនជាបណ្តោះអាសន្នហើយ ក្រោយពីកម្លាំងកងរាជអាវុធហត្ថស្រុកត្រពាំងប្រាសទ ខេត្តឧត្តរមានជ័យឃាត់ខ្លួន។
បុរសសង្ស័យសម្លាប់មនុស្សទាំងពីរនាក់ ម្នាក់ឈ្មោះ បឿន សុភក្រ័ អាយុ២២ឆ្នាំ រស់នៅភូមិស្រះជ្រៃ ឃុំត្រពាំងប្រាសាទ ស្រុកត្រពាំងប្រាសាទ និងម្នាក់ទៀត ឈ្មោះ ឌី ចំរ៉ុង អាយុ២៤ឆ្នាំ រស់នៅភូមិអូរសោម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ជាជាងសិប្បកម្មឈើ ត្រូវបានឃាត់ខ្លួននៅម៉ោង៧ និង៣០នាទីយប់ ថ្ងៃទី១២ មករា ២០១៨ នៅក្នុងភូមិស្រែក្រសាំង ឃុំត្រពាំងប្រាសសាទ ស្រុកត្រពាំងប្រាសាទ ខេត្តឧត្តរមានជ័យ។
មូលហេតុដែលផ្តើមឲ្យមានការចាប់ខ្លួន ជនសង្ស័យទាំងពីរនាក់នេះ គឺដោយសារពួកគេទាំងពីរបានប្រើវត្ថុរឹង ចាក់សម្លាប់ជនរងគ្រោះ ឈ្មោះ សៀ ឆាលី ភេទប្រុស អាយុ១៨ឆ្នាំ ជាកសិករ រស់នៅភូមិស្រែក្រសាំង ឃុំត្រពាំងប្រាសាទ កាលពីយប់ ថ្ងៃទី១១ មករា ២០១៨ កន្លងទៅនេះ ក្រោយពីពួកគេបានទាស់សម្តីគ្នា ពេលផឹកស្រាក្នុងពិធីអាពាហ៍ពិពាហ៍មួយ ក្នុងភូមិឃុំខាងលើ។ ជនរងគ្រោះ ត្រូវបានជនសង្ស័យ ផ្សំគំនិតគ្នាចាក់សម្លាប់នឹងវត្ថុរឹង ត្រូវចំក្រោមឆ្អឹងជំនីខាងឆ្វេង បណ្តាលឲ្យស្លាប់នឹងកន្លែង ហើយបានរត់គេចខ្លួន តែត្រូវសមត្ថកិច្ចតាមចាប់ខ្លួនបាន នាប៉ុន្មានម៉ោងក្រោយពេលកើតហេតុ៕
