ភ្នំពេញ ៖ នៅព្រឹកថ្ងៃច័ន្ទ ទី១៥ ខែមករា ឆ្នាំ២០១៨ សម្តេច ហ៊ុន សែន នាយករដ្ឋមន្ត្រីកម្ពុជា បានថ្លែងជាថ្មីថា រដ្ឋធម្មនុញ្ញកម្ពុជា មិនបានកំណត់អាណត្តិនាយករដ្ឋមន្ត្រីនោះទេ ហើយប្រទេសនៅលើពិភពលោកនេះ ក៏មិនមានប្រទេសណាមួយកំណត់អាណត្តិនាយករដ្ឋមន្ត្រីដែរ ព្រោះតំណែងនាយករដ្ឋមន្ត្រីត្រូវជ្រើសតាំងដោយរដ្ឋសភា ។
ការថ្លែងរបស់សម្តេច ហ៊ុន សែន បានធ្វើឡើងក្នុងឱកាសចូលរួមក្នុងពិធីសម្ពោធអគារ ព្យាបាលជំងឺមហារីក និងសម្ភព កម្ពស់៩ជាន់ មានតម្លៃជាង២៣លានដុល្លារអាមេរិក នៅក្នុងមន្ទីរពេទ្យកាល់ម៉ែត្រ ។
សម្តេច ហ៊ុន សែន ក៏បានរម្លឹកឡើងវិញថា សម្តេចនឹងបន្តកាន់តំណែងនាយករដ្ឋមន្ត្រី យ៉ាងតិច១០ឆ្នាំទៀត ដើម្បីឈានទៅកៀកឆ្នាំ២០៣០ ដែលកម្ពុជានឹងក្លាយជាប្រទេសដែលមាន ចំណូលមធ្យមកម្រិតខ្ពស់ ។ សម្តេចថា សម្តេចបានធ្វើជានាយករដ្ឋមន្ត្រី៣៣ឆ្នាំមកហើយ ហើយ បើថែម១០ឆ្នាំទៀតក៏មិនទាន់ចាស់ដែរ ដូច្នេះអាចអមដំណើរកម្ពុជាចូលទៅកៀកឆ្នាំ២០៣០ នោះបាន ៕
