ភ្នំពេញ ៖ កម្ពុជានឹងរៀបចំធ្វើការត្បាញក្រមាដែលមានប្រវែង១០០០ម៉ែត្រ នៅថ្ងៃទី១៤ ខែកុម្ភៈ ឆ្នាំ២០១៨ ខាងមុខនេះ នៅវាលព្រះមេរុ ដើម្បីបំបែកកំណត់ត្រាពិភពលោក។ប្រធានក្រុមចលនា GoGo Cambodia លោក សាន វឌ្ឍនា បានថ្លែងថា ក្រុមការងារនេះ នឹងរៀបចំការត្បាញក្រមាយ៉ាងតិច ១ពាន់ម៉ែត្រ ដើម្បីបំបែកឯតទគ្គកម្មក្រមាវែងជាងគេលើពិភពលោក ដោយអាចប្រើរយៈពេលដល់ ៣ខែ។ ព្រឹត្តិការណ៍នេះ នឹងបើកឲ្យមហាជនចូលរួមក្នុងការជួយត្បាញក្រមានេះដោយសេរី ដោយអ្នកមិនចេះត្បាញ ក៏អាចចូលរួមបានដែរ ព្រោះក្រុមនេះមានជាងតម្បាញជំនាញ នៅចាំបង្ហាញ។
តាមលោក វឌ្ឍនា យុទ្ធនាការបំបែកឯកត្តកម្ម ក្រមាដែលវែងជាងគេបំផុតលើពិភពលោកនេះ ធ្វើឡើងក្នុងគោលបំណង ដើម្បីលើកកម្ពស់មោទនភាពជាតិ និងកិត្យានុភាពជាតិកម្ពុជា នៅលើឆាកអន្តរជាតិ តាមរយៈការបង្កើតស្នាដៃមួយដែលមានការទទួលស្គាល់ជាអន្តរជាតិ ក៏ដូចជាបង្កបរិយាកាសចូលរួមចំណែកពីប្រជាពលរដ្ឋទាំងអស់គ្នាក្នុងការចូលរួមថែរក្សា និងលើកស្ទួយមរតកក្រមាខ្មែរ និងជម្រុញសាមគ្គីភាពនិងឯកភាពជាតិក្រោមដំបូលនៃការរួបរួមបង្កើតស្នាដៃដ៏ធំមួយសម្រាប់ប្រទេសជាតិ៕
