កោះកុង ៖ កាលពីថ្ងៃទី១១ ខែមករា ឆ្នាំ២០១៨ លោក សួន ស៊ីថា អភិបាលរងស្រុកបូទុមសាគរ ខេត្តកោះកុង បានដឹកនាំកម្លាំងអង្គការសម្ពន្ធ័សត្វព្រៃ(វ៉ាយអេត)ចុះរុះរើផ្ទះប្រជាពលរដ្ឋចំនួន៣គ្រួសារ នៅភូមិចម្លងគោ ត្រង់ចំណុចគេហៅគ្រួសក្រហម ស្ថិតក្នុងឃុំថ្មស ស្រុកបូទុមសាគរ ខេត្តកោះកុង ក្នុងចំណោម១១០គ្រួសារដែលរងចោទប្រកាន់ថា បានទន្រ្ទានយកដីឧទ្យានជាតិបូទុមសាគរ ។
ប្រជាពលរដ្ឋបានចោទប្រកាន់ថា អភិបាលរងស្រុកបូទុមសាគរ បានដឹកនាំកម្លាំងអង្គការសម្ពន្ធ័សត្វព្រៃ (វ៉ាយអេត) មករុះរើផ្ទះនិងកាប់បំផ្លាញចំការប្រជាពលរដ្ឋ និងគំរាមកំហែងពលរដ្ឋក្រីក្រឲ្យរុះរើផ្ទះ ចេញពីដីចំការរបស់ពួកគាត់ នៅភូមិចម្លងគោ ត្រង់ចំណុចគេហៅគ្រួសក្រហម ស្ថិតក្នុងឃុំថ្មស ស្រុកបូទុមសាគរខេត្តកោះកុង។
ដីដែលត្រូវកម្លាំងកាប់ផ្ទះដួលរលំមានឈ្មោះ សាំង សុខផល អាយុ៤៣ឆ្នាំ ប្រពន្ទឈ្មោះ កែវ ចិន្ដា មានកូន៥នាក់ រីឯ២ផ្ទះដែលចាប់បង្ខំឲ្យផ្ដឹតមេដៃចាកចេញមានឈ្មោះ ឌឹម រតនា អាយុ៣០ឆ្នាំ ប្រពន្ធឈ្មោះ សុខា រដ្ឋា អាយុ២៨ឆ្នាំត្រូវទើបតែបែកគ្រួសារពុំមានដីទេ ជាពលរដ្ឋក្រីក្រខំមកដាំដំណាំដើម្បីជីវិតទៅថ្ងៃមុខ តែ អកុសលត្រូវ លោក សួន ស៊ីថា អភិបាលរងស្រុកនិយាយថា មកពីណាទៅកន្លែងនោះវិញទៅ កុំមកនៅទីនេះ។ប្រជាពលរដ្ឋដែលរងការប៉ះពាល់មានចំនួន១១០គ្រួសារក្នុងនោះប្រជាពលរដ្ឋដែលមានដំណាំទទួលបានផលចំនួន២៤គ្រួសារ។
ប្រជាពលរដ្ឋបានចោទប្រកាន់ទៀតថា លោក សួន ស៊ីថា អភិបាលរងស្រុក បានដឹកនាំកម្លាំង ដើររុះរើផ្ទះចំការប្រជាពលរដ្ឋ ហើយបង្ខំឲ្យផ្ដិតមេដៃរុះរើចេញពីដីចំការ ដោយប្រើសម្ដីមិនគប្បីចំពោះប្រជាពលរដ្ឋ ដែលធ្វើឲ្យពលរដ្ឋមានការអាក់អន់ស្រពន់ចិត្តយ៉ាងខ្លាំង។
ប្រជាពលរដ្ឋបាននិយាយថា ពួកគាត់បានធ្វើចំការនេះតាំងពីឆ្នាំ២០០៦មក ខ្លះទៀតឆ្នាំ២០០៨ជាបន្តបន្ទាប់មកខ្លះមានដំណាំបានហូបផ្លែទៀតផង មិនគួរលោកសួនស៊ីថាដឹកនាំកម្លាំងមករុះរើទេ ពួកគាត់មិនសុខចិត្តទេ ហើយនិងធ្វើការតវ៉ាសុំដីដែលពួកគាត់ខំកាប់ធ្វើ រហូតមានដល់ដំណាំពេញចំការហើយ។
ចំណែក លោក អិក កួន មេឃុំថ្មស បាននិយាយប្រាប់អ្នកសារព័ត៌មានថា រឿងអីក្រុមវ៉ាយអេតមកកាប់ផ្ទះចំការប្រជាពលរដ្ឋរបស់គាត់ មិនរកវិធីដោះស្រាយទៅ មិនត្រូវធ្វើអញ្ចឹងទេ។លោកមេឃុំបន្តថា ដើម្បី ប្រជាពលរដ្ឋរបស់គាត់ គាត់និងទៅជួបលោកជំទាវ អភិបាលខេត្តរកវិធីដោះស្រាយជូនប្រជាពលរដ្ឋរបស់គាត់ក្នុងនាមគាត់ជាមេឃុំជួយប្រជាពលរដ្ឋជានិច្ច។
លោក សួន ស៊ីថា អភិបាលរងស្រុកបូទុមសាគរ មិនអាចសុំការបំភ្លឺបានទេ ដោយសារទូរសព្ទ័តេចូលហើយលោកមិនលើក។
ចំណែកលោក ទូ សាវុទ្ធ អភិបាលស្រុកបូទុមសាគរ មិនអាចទំនាក់ទំនងសុំការបំភ្លឺបាន ដោយសារទូរសព្ទ័ របស់លោក តេចូលហើយមិនអាចនិយាយបានអត់លឺសម្លេង។
ពាក់ពន្ធ័ក្នុងរឿងនេះដែរ អ្នកសារព័ត៌មានបានទំនាក់ទំនងទៅលោកជំទាវ មិថុនា ភូថង អភិបាលខេត្តកោះកុងសុំការបំភ្លឺ គាត់មានប្រសាសន៌ថា គាត់និងប្រជុំថ្នាក់ខេត្ត ហើយឲ្យក្រុមការងារចុះមកពិនិត្យមើល។
កន្លងមក សម្តេចតេជោ ហ៊ុន សែន បាននិយាយនៅចំពោះមុខអស់លោកមន្រ្តីថា រឿងដីធ្លី ព្រៃរិចរិល ដីព្រៃ ក្រុមហ៊ុនមួយចំនួនអាចធ្វើបាន ហើយឈូសឆាយបានទៀត ថែមទាំងអស់លោកអនុញាត្តឲ្យធ្វើទៀតផង
ចំណែកប្រជាពលរដ្ឋក្រីក្រទៅកាប់ទន្រ្ទានយកដីព្រៃបន្តិចបន្ទួច អស់លោកដេញចាប់ពួកគាត់ ហើយសួររកហេតុផលគ្រប់បែបយ៉ាង តើរឿងនេះត្រូវទេអស់លោក? ខ្លះជាអ្នកច្បាប់ទៀតផងទៅបំពានលើពលរដ្ឋស្លូតត្រង់អស់លោកស្រឡាញ់ដីហួសពេក ហើយសម្ដេចបន្តថា តើដីទាំងអស់នោះ ដីម៉ែរបស់លោកឯងអី ដូចជាស្រឡាញ់ដីហួសហេតុពេក ម៉ិចមិនចែកជូនពួកគាត់ទៅ នេះជាប្រសាសន៌សម្ដេចតេជោ ហ៊ុន សែន។
ប្រជាពលរដ្ឋនិយាយទៀតថា លោក សួន ស៊ីថា អភិបាលរងស្រុក បូទុមសាគរបែរជាមកធ្វើបាបពលរដ្ឋក្រីក្រទៅវិញ ម្តេចមិនគិតដល់ប្រសាសន៌ សម្ដេច ហ៊ុន សែន ដែលសម្ដេចកំពុងតែខិតខំ ធ្វើល្អចំពោះប្រជាពលរដ្ឋ ហើយដឹកនាំប្រទេសជាតិរីកចំរើន សុខសន្តិភាពល្អណាស់សព្វថ្ងៃនេះ ៕(ដោយយួនឈីវ)
