កំពង់ធំ ៖ ប្រជាពលរដ្ឋរស់នៅចំនួនបីភូមិគឺ ភូមិតាឡែកថ្មី ភូមិតាឡែកចាស់ ភូមិអណ្ដាស ស្ថិតនៅក្នុងឃុំសាលាវិស័យ ស្រុកប្រាសាទបល្ល័ង្គ ខេត្តកំពង់ធំ បានផ្តិតមេដៃប្ដឹង មេសហគមន៏ជាំម្រេច នឹងលោកមេភូមិតាឡែក ដែលបានឃុបឃិតគ្នា កាប់ឈូសបំផ្លាញព្រៃសហគមន៍ជាំម្រេច ដើម្បីរៀបដីលក់អោយឈ្មួញ ចំនួនបីកន្លែង ក្នុងមួយកន្លែងជាង៣០ហិចតា។
លោក យឹម ភ័ណ្ណ នគរបាលសេដ្នកិច្ចខេត្តកំពង់ធំ បានបញ្ចាក់ថា ក្រោយពីទទួលបានពាក្យបណ្តឹងរបស់ប្រជាពលរដ្ន ថាមានករណីមេសហគមន៍ ឃុបឃឹតជាមួយ មេភូមិតាឡែកថ្មី ភូមិតាឡែកចាស់ ភូមិអណ្ដាស កាប់ឈូសបំផ្លាញព្រៃសហគមន៍ជាំម្រេច ដើម្បីរៀបដីលក់អោយឈ្មួញ លោកបន្ដថា បន្ទាប់ពីវាស់នៅចំនុចអូរកន្ទប ឃើញថា កាប់ព្រៃអស់ទំហំជាង៣០ហិចតា តែលោកនិងបន្ដចុះវាស់វែង២កន្លែងទៀត។
ពាក់ព័ន្ធនិងរឿងនេះ មេសហគមន៏ជាំម្រេចឈ្មោះ សោម សុភ័ក្រ បានឆ្លើយបដិសេដថា លោកមិនដឹងច្បាស់ទេ អោយសួរទៅលោកមេភូមិទៅ ចំណែកខ្ញុំគ្រប់គ្រងដីតែ២១០០ហិចតាតែប៉ុណ្ណោះ។
លោក ហេង សារឿន មេភូមិតាឡែក បានអោយដឹងថា ពាក់ព័ន្ធនិងរឿងនេះ លោកកំពុងតែចុះពិនិត្យ និងវាស់វែងជាមួយសមត្ថកិច្ច ឃើញថាដីមួយចំនួនជាដីបុស្សចាស់ និងមួយចំនួនទៀតជាដីចំការរបស់ប្រជាពលរដ្ឋ។
ពាក់ព័ន្ធនិងដីអភិរក្សបឹងពែរ លោក តុប កក្កដា ប្រធានមន្ទីរបរិស្ថានខេត្តកំពង់ធំ បានអោយដឹងថា ដីនេះពិតជាស្ថិតនៅក្នុងដែនគ្រប៉គ្រងរបស់បរិស្ថានមែន តែលោកអោយប្រធានសហគមន៍ជាំម្រេចជាអ្នកគ្រប៉គ្រងផ្ទាល់ ចំណែកមន្ទីរបរិស្ថានរង់ចាំការសហការពីប្រធានសហគមន៍ ពេលត្រូវការកម្លាំង ពេលណាដែលមានសកម្មភាពកាប់ឈូសព្រៃឈើកើតឡើង ម្យ៉ាងវិញទៀតមន្ទីរបរិស្ថានក៏ ធ្លាប់បានចុះបង្រ្កាប២ដងមកហើយ។
ទោះបីយ៉ាងណា ប្រជាពលរដ្នបានសំណូមពរសុំអោយ អាជ្ញាធរមូលដ្ឋានចុះចាត់វិធានការទប់ស្កាត់ និងដោះស្រាយអោយពួកគាត់វិញផង ដើម្បីពួកគាត់បានអាស្រ័យផល បោចវ័ល្ល៍ បោចផ្ដៅ និងកាប់អុសលក់ ដើម្បីជីវភាពផង៕
