ស្រុកត្រពាំងប្រាសាទ ៖ សកម្មភាពពលករឆ្លងដែនខុសច្បាប់ទៅប្រទេសថៃ ដើម្បីលួចកាប់ឈើក្រញូង នៅតែបន្តឥតឈប់ឈរ ដោយពុំមានស្ថាប័នណាទប់ស្កាត់និងបង្រ្កាបឡើយ ។
យោងតាមសេចក្តីរាយការណ៍ កាលពីថ្ងៃទី៤ ខែមករា ឆ្នាំ២០១៨ ពីឃុំអូស្វាយ ស្រុកត្រពាំងប្រាសាទ បានឲ្យដឹងថា បច្ចុប្បន្ននេះបទល្មើសឈើក្រញូង នៅតែមានភាពគគ្រឹកគគ្រេង ដោយឈ្មួញធ្វើការប្រមូលទិញ និងគៀងគរពលករឆ្លងដែនចំណាកស្រុក យ៉ាងអនាធិបតេយ្យ ពីសំណាក់ក្រុមឈ្មួញដុះស្លែគ្រាក់ៗ នៅតំបន់ផ្លូវយុទ្ធសាស្ត្រសមរភូមិមុខ ទិសទីពីរ ស្រុកត្រពាំងប្រាសាទ។
ឈ្មួញថៅកែដែលធ្វើសកម្មភាពខាងលើត្រូវបានគេស្គាល់ ទី1ឈ្មោះ ហង្ស ជាប្រជាការពារភូមិ ទី2ឈ្មោះប្រុស អ្នកទាំងពីររស់នៅភូមិទំនប់អភិវឌ្ឍន៍ ឃុំអូរស្វាយ ហើយពួកគេធ្វើការប្រមូលទិញឈើក្រញូង និងគៀងគរពលករឆ្លងដែនជាច្រើនឆ្នាំមកហើយ មិនដែលត្រូវបានបង្រ្កាបពីសមត្ថកិច្ចម្តងណាឡើយ ។
ស្រាប់តែពេលនេះបែកធ្លាយពីពលករថា ឈ្មោះឈ្មួញឈើក្រញូងទាំងពីរនាក់ខាងលើ ជាថៅកែប្រមូលទិញ និងដាក់ទុនឲ្យពួកគាត់ឆ្លងដែនទៅប្រទេសថៃ លួចកាប់ឈើក្រញូងយកមកលក់ឲ្យថៅកែខាងលើ ។
ប្រភពពីសមត្ថកិច្ចតូចតាចបានលួចខ្សិបប្រាប់ថា ថៅកែវ័យក្មេងទាំងពីររូបខាងលើ រកស៊ីឈើក្រញូងជិត១០ឆ្នាំមកហើយ តាំងពីបាតដៃទទេ រហូតមកដល់បច្ចុប្បន្ននេះ គេមានផ្ទះថ្មនិងរថយន្តទំនើបជិះ ក៏ដោយសារមុខជំនួញខាងលើនោះផងដែរ បើនិយាយអំពីសមត្ថកិច្ចដែលឈរជើងនៅតំបន់នោះ មិនអាចបន្ទោសពួកគាត់បានឡើយ ដោយឈ្មួញទាំងពីររូបនេះមានខ្សែធំណាស់ ទើបពួកគាត់មិនហ៊ានបង្រ្កាប។
ពាក់ពន្ធ័ពីសកម្មភាពខាងលើ យើងមិនអាចសុំការបំភ្លឺពីឈ្មោះ ប្រុស និងឈ្មោះ ហង្ស បានទេ ចំណែកលោក ស៊ុន ប៊ូរ៉ាន់ មេបញ្ជាការយោធាសឹករងស្រុកត្រពាំងប្រាសាទ ក៏មិនអាចទំនាក់ទំនងបានដែរ ដោយឡែកលោក អ៊ុន រីម នាយប៉ុស្តិ៍នគបាលរដ្ឌបាលឃុំអូរស្វាយបានឲ្យដឹងថា បញ្ហាខាងលើលោកកំពុងធ្វើការស្រាវជ្រាវរកការពិត ៕
