មណ្ឌលគីរី ៖ តាមសេចក្តីរាយការណ៏ពីប្រជាពលរដ្ឋថា មួយរយៈកន្លងទៅនេះនៅច្រកដាក់ដាំ ស្រុកអូររាំង និងច្រកទ្វេភាគីណាំលៀ ស្រុកពេជ្រាដា ខេត្តមណ្ឌលគិរី ឈ្មួញដែលមានងារជាឧកញ៉ានិងទើបឡើងសក្តិពាក់ផ្កាយ៣នៅក្រសួងមហាផ្ទៃមួយរូប កំពុងសម្រុកដឹកជញ្ជូនឈើចេញទៅវៀតណាមយ៉ាងពេញបន្ទុក។ ទន្ទឹមនឹងនេះនូវមានឈ្មួញមួយចំនួនបានប្រើប្រាស់ឈ្មោះឧកញ៉ារូបនេះបន្លាចសមត្ថកិច្ច ដើម្បីដឹកជញ្ជូនឈើប្រណីតចេញទៅវៀតណាមតាមច្រកដាក់ដាំយ៉ាងគឃ្លើន ដោយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។
ចំណែកសមត្ថកិច្ចតូចតាចនៅច្រកទ្វេភាគីណាំលៀឬប៉ុស្ដិ៍៧ បានឲ្យដឹងដែរថា ឈ្មួញជាច្រើននាក់កំពុងសម្រុកដឹកឈើប្រណីតចេញទៅវៀតណាមតាមច្រកនេះ ហើយឈ្មួញដែលយកឈ្មោះឧកញ៉ាផ្កាយ៣ ទៅប្រើកំពុងបង្កើនសកម្មភាពដឹកជញ្ជូនឈើខ្លាំងក្លាជាងគេ។ មេរដ្ឋបាលព្រៃឈើខេត្តមណ្ឌលគិរី ក៏ដូចជាលោក ស្វាយ សំអ៊ាង អភិបាលខេត្តមណ្ឌលគិរី បានរក្សាភាពស្ងៀមស្ងាត់ នៅពេលព័ត៌មានស្ដីពីឧកញ៉ាពាក់ផ្កាយ៣ដឹកជញ្ជូនឈើចេញទៅវៀតណាមត្រូវបានលាតត្រដាងជាបន្តបន្ទាប់។ សូម្បីតែលោក វេង សាខុន រដ្ឋមន្ត្រីក្រសួងកសិកម្ម ក៏រក្សាភាពស្ងៀមស្ងាត់ដែរ នៅពេលដែលព័ត៌មានទាក់ទងរឿងឧកញ៉ាផ្កាយ៣ ដឹកជញ្ជូនឈើចេញទៅស្រុកយួនត្រូវបានបណ្ដាញព័ត៌មាននានាចុះផ្សាយរួចទៅហើយនោះ។
ប្រជាពលរដ្ឋក្នុងខេត្តមណ្ឌលគិរីបានឲ្យដឹងទៀតថា ឈ្មួញមួយចំនួនដែលមានឧកញ៉ាពាក់ផ្កាយ៣នៅ ក្រសួងមហាផ្ទៃជាខ្នងបង្អែកយ៉ាងរឹងមាំ បានប្រើប្រាស់រថយន្តទំនើបៗ ដឹកជញ្ជូនឈើចេញ ទៅវៀតណាមតាមច្រក ដាក់ដាំ យ៉ាងគគ្រឹកគគ្រេង ជាពិសេសនៅពេលយប់ ។ ប្រការនេះលោក វេង សាខុន រដ្ឋមន្ត្រីក្រសួងកសិកម្ម មិនគួរបណ្ដែតបណ្ដោយតទៅទៀតទេ ព្រោះសមត្ថកិច្ចជំនាញខេត្តមណ្ឌលគិរី និងរដ្ឋបាលព្រៃឈើខេត្តនេះ មិនយកចិត្តទុកដាក់បង្ក្រាបបទល្មើសព្រៃឈើឡើយ ហើយរងការរិះគន់ថាគិតតែពីរឿងប្រមូលលុយដាក់ហោប៉ៅ។
ប្រភពបន្តឲ្យដឹងថានៅច្រកដាក់ដាំ ស្រុកអូររាំង ខេត្តមណ្ឌលគិរី ទោះបីរដ្ឋាភិបាលបានព្រមានមន្រ្តីពុករលួយឲ្យដកខ្លួនចេញពីបទឧក្រិដ្ឋព្រែឈើក៏ដោយ ក៏មេៗសមត្ថកិច្ចពាក់ព័ន្ធប្រចាំច្រកនេះ នៅតែបណ្ដោយឲ្យឈ្មួញមានអំណាច មានឥទ្ធិពល បន្តដឹកឈើចេញទៅស្រុកយួនយ៉ាងពេញបន្ទុកដដែល។ ឈ្មួញមួយចំនួននៅតែអាចប្រមូលទិញឈើប្រណីតដឹកជញ្ជូនចេញតាមច្រកដាក់ដាំ យ៉ាងពេញបន្ទុកដោយគ្មានញញើតអ្វីទាំងអស់។ ប៉ុស្ដិ៍នគរបាលអន្តោប្រវេសន៍ច្រកដាក់ដាំ កំពុងរងការរិះគន់ថាជាអ្នកឃុបឃិតឲ្យឈ្មួញដឹកជញ្ជូនឈើចេញទៅស្រុកយួនដើម្បីជាថ្នូរនឹងផលប្រយោជន៍ ។
ករណីឧកញ៉ាពាក់ផ្កាយ៣នៅក្រសួងមហាផ្ទៃ ជាប់ពាក់ព័ន្ធសកម្មភាពដឹកជញ្ជូនឈើចេញទៅស្រុកយួនតាមច្រកដាក់ដាំ និងច្រកណាំលៀ កំពុងធ្វើឲ្យមជ្ឈដ្ឋាននានាមានការចាប់អារម្មណ៍យ៉ាងខ្លាំង ព្រោះសកម្មភាពនោះកំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូល។ ប្រការនេះគឺជារឿងដែលនាយឧត្តមសេនីយ៍ នេត សាវឿន អគ្គស្នងការនគរបាលជាតិ ត្រូវពិនិត្យឡើងវិញផងដែរ ព្រោះករណីឧកញ៉ាពាក់ផ្កាយ៣ សម្រុកដឹកជញ្ជូនឈើចេញទៅវៀតណាម កំពុងធ្វើឲ្យមានការរិះគន់យ៉ាងខ្លាំងពីមន្ត្រីរាជការនិងប្រជាពលរដ្ឋក្នុងខេត្តមណ្ឌលគិរី។ ទន្ទឹមនឹងនេះមន្ត្រីគណៈកម្មការបង្ក្រាបនិងទប់ស្កាត់បទល្មើសព្រៃឈើដែលចុះទៅបំពេញការងារក្នុងខេត្តមណ្ឌលគិរី មិនគួរមើលរំលងសកម្មភាពរបស់អ្នកមានអំណាចក្នុងការដឹកជញ្ជូនឈើទៅវៀតណាមយ៉ាងពេញបន្ទុកនោះទេ ព្រោះឈ្មួញមួយចំនួននៅតែបន្តសកម្មភាពរត់ពន្ធឈើប្រណីតចេញក្រៅប្រទេសយ៉ាងគឃ្លើន ដោយសារមានការឃុបឃិតពីសំណាក់មន្ត្រីជំនាញនិងសមត្ថកិច្ចពុករលួយជាច្រើនស្ថាប័ន៕
ពាក់ព័ន្ធជុំវិញករណីខាងលើនេះ អស់លោកអាជ្ញាធរនិងសមត្ថកិច្ចខេត្តមណ្ឌលគិរី យើងមិនអាចសូមការបកស្រាយបំភ្លឺលំអិតបាននោះទេ តែយើងនឹងព្យាយាមស្រាវជ្រាវពត័មានពិត និងលំអិតពាក់ពន្ធ័ការរត់ពន្ធឈើប្រណីតតាមច្រកដាក់ដាំបន្តទៀត ៕
