ភ្នំពេញ ៖ លោក សុខ ឥសាន អ្នកនាំពាក្យបក្សកាន់អំណាច នៅថ្ងៃសុក្រនេះ បានសរសេរតាមប្រព័ន្ធតេឡេក្រាមថា “ជាការចង់ឲ្យអស់សំណើចណាស់ ដែលទណ្ឌិត សម រង្ស៊ី តាំងខ្លួនឯងជាមេដឹកនាំបក្សប្រឆាំងខ្មោច នឹងបើកការប្រជុំជាមួយសហការីរបស់ខ្លួននៅទីក្រុងហ៊ូស្តុន រដ្ឋតិចសាស់ សហរដ្ឋអាមេរិក នាពេលខាងមុខ”។ ប៉ុន្តែលោកថា បើមានការប្រជុំមែនក៏អត់បានការដែរ ព្រោះប្រជុំគ្មានឥទ្ធិពលអ្វីដល់ការដឹកនាំគ្រប់គ្រងក្នុងប្រទេសឡើយ ។
លោក សុខ ឥសាន បញ្ជាក់ថា ការប្រជុំនេះ គ្រាន់តែជាការប្រកាច់ត្រដរខ្យល់ ចង់រស់ឡើងវិញ ដែលមិន អាចរស់បានជាដាច់ខាត។ ជាមួយគ្នានោះដែរ លោក សុខ ឥសាន បានហៅការប្រជុំរបស់ ក្រុមអតីតគណបក្សសង្គ្រោះជាតិ គឺជាការប្រជុំគ្រាន់តែចង់បោកប្រាស់សាធារណៈមតិថាខ្លួននៅមានដង្ហើមតែប៉ុណ្ណោះ ដែលដង្ហើមនេះគ្មានខ្យល់ដកផង។
អ្នកនាំពាក្យរូបនោះបន្តថា ការប្រជុំគ្រាន់តែឲ្យគេមើលឃើញ ពីសកម្មភាពអត់បានការ ដើម្បីបោកបញ្ឆោតស្វែងរកជំនួយគ្រាន់បានបន្តដង្ហើមរបស់ខ្លួន ទាំងអស់សង្ឃឹមប៉ុណ្ណោះ។ គ្មានទេ អតីតបក្សប្រឆាំង នៅកម្ពុជាចប់ជាស្ថាពរហើយ ចាប់ពីថ្ងៃទី១៦ ខែវិច្ឆិកា ២០១៧ លែងមានបក្សសង្គ្រោះជាតិស្អីទៀតហើយ”។
លោកបន្ថែមទៀតថា រាល់ការសុំអង្វរឲ្យបរទេសដាក់គំនាបលើរាជរដ្ឋាភិបាលកម្ពុជា តាមរយៈការគាបសង្កត់ដាក់ទណ្ឌកម្មខាងនយោបាយ និងសេដ្ឋកិច្ច សាបដូចទឹកទន្លេ បានតែមួយភ្លែតដំបូងប៉ុណ្ណោះ៕
