សៀមរាប ៖ ប្រជាពលរដ្ឋរិះគន់ថា ដីព្រៃលិចទឹកនៅឃុំកំពង់ឃ្លាំង ស្រុកសូទ្រនិគម ខេត្តសៀមរាបកំពុងតែត្រូវបានរលាយហិនហោច ដោយសារតែមានការបើកភ្លើងខៀវពីសំណាក់ នាយផ្នែករដ្ឋបាលជលផល ឃុបឃិតធ្វើឲ្យមានការឈូសឆាយដីព្រៃលិចទឹក យ៉ាងគគ្រឹងគ្រេង ដោយមិនមានការខ្លាចញញើតពីសំណាក់ច្បាប់នោះឡើយ ។
តាមប្រភពព៌ត៌មានបានឲ្យដឹងថា នាយផ្នែករដ្ឋបាលជលផលកំពង់ឃ្លាំងមុន ដោយសារតែអំពើពុករលួយរបស់ខ្លួន ទើបស្ថាប័នប្រឆាំងអំពើពុករលួយចាត់វិធានការ ហើយត្រូវបានដកចេញ ក្រោយមក ក៏នាយរងផ្នែកបានកាន់តំណែងជានាយផ្នែក ដោយប្រជាពលរដ្ឋសង្ឃឹមថា នឹងបានធូរស្បើយ តែផ្ទុយទៅវិញបែរជា ប្រព្រឹត្តអំពើពុករលួយលើសដើម ដោយបានឃុបឃិតគ្នាជាមួយឈ្នួញធំៗ កាប់គាស់ដីព្រៃលិចទឹករាប់រយហិចតាយកមកធ្វើជាកម្មសិទ្ធ និងបណ្តែតបណ្តោយឲ្យមានការរុញស៊ីប អូសលៀស ដែលជាមេក្លោងបំផ្លាញមឆ្ឆាជាតិ ។
តាមប្រភពព័ត៌មានបានឲ្យដឹងថា លោកនាយផ្នែករដ្ឋបាលជលផលកំពង់ឃ្លាំង កំពុងតែគ្រប់ទឹក និងទទួលបានសំណែនពីឈ្មួញរុញស៊ីបយន្ត និងអូសលៀស ដោយសារតែអ្នកអូសលៀស ត្រូវបានបង់ជូនជំនាញ ក្នុងមួយវង់១០ម៉ឺនរៀលក្នុងមួយទូក និងបានឲ្យក្រុមឈ្មួញអូសលៀស ដែលជាឧបកណ៍បំផ្លាញមឆ្ឆាជាតិ បំផ្លាញតាំងពីមឆ្ឆាពងកូននៅក្នុងភក់ បង្ករឲ្យខ្ទេចខ្ទីគ្មានសល់ ដោយសារតែការអូសលៀសនិងរុញស៊ីប ទើបប្រជាពលរដ្ឋបានសំណូមពរ ឲ្យលោកព្រឹន សាវិន្ទ នាយខណ្ទរដ្ឋបាលជលផលសៀមរាប ជួយចាត់វិធានការទប់ស្កាត់ជាបន្ទាន់ ។
តាមការអះអាងរបស់ប្រជានេសាទបានឲ្យដឹងថា ផលនេសាទឆ្នាំ២០១៧នេះ មានការថយចុះ ដោយសារតែ នាយផ្នែករដ្ឋបាលជលផលកំពង់ឃ្លាំង បើកដៃនិងឃុបឃិតជាមួយឈ្មួញធំ អូសលៀស និងរុញស៊ីប ដោយម៉ាស៊ីនធំ មុខ២ម៉ែត្រ និងអូសជម្រៅទៅក្នុងភក់២តឹក បណ្តាលឲ្យបំផ្លាញ់ដល់កំណើតនៃមឆ្ឆាជាតិ និង បណ្តាលឲ្យទឹកកក ស្អុយ បំបែកពងមឆ្ឆាជាតិ ទើបធ្វើឲ្យមានការថយចុះនូវបរិមាណត្រីក្នុងឆ្នាំនេះ ។
គេហទំពរ័យើងពុំអាចសុំការពន្យល់ ពីលោកនាយផ្នែករដ្ឋបាលជលផលកំពង់ឃ្លាំងបានទេ ព្រោះពុំមានលេខទូរស័ព្ទ៕
