ភ្នំពេញ ៖ សាលាដំបូងរាជធានីភ្នំពេញ បានចេញលិខិតកោះហៅមេធាវីក្រុមសហជីពធំៗ ឱ្យចូលបំភ្លឺនៅព្រឹកថ្ងៃទី០៩ ខែមករា ឆ្នាំ២០១៨ ដើម្បីសាកសួរអំពីដំណើររឿងប្តឹង លោក ជា មុនី អតីតប្រធានសហជីពសេរីកម្មករពីបទញុះញង់ ខណៈដែលលោក ជា មុនី កំពុងស្ថិតនៅឯក្រៅប្រទេស។
គួរបញ្ជាក់ថា សហជីពធំៗចំនួន១២០ បានដាក់ពាក្យប្តឹងលោក ជា មុនី អតីតប្រធានសហភាពសហជីពសេរីកម្មករ នៃព្រះរាជាណាចក្រកម្ពុជា និង បច្ចុប្បន្នជាសមាជិកក្រុមប្រឹក្សាឃ្លាំមើលពហុវិស័យនៅកម្ពុជា ដែលបានញុះញង់ឱ្យសហគមន៍អឺរ៉ុប និងសហរដ្ឋអាមេរិក ដាក់ទណ្ឌកម្មសេដ្ឋកិច្ចលើប្រទេសកម្ពុជា ។ ទន្ទឹមនោះក្រុមអតីតមេដឹកនាំសំខាន់ៗ របស់គណបក្សប្រឆាំងក៏បានធ្វើសកម្មភាពដូចគ្នានឹងសកម្មភាពញុះញង់របស់លោក ជា មុនី ផងដែរ ៕
