មណ្ឌលគីរី ៖ ដំរីមួយក្បាលដែលធ្លាប់តែដឹកភ្ញៀវទេសចរកម្សាន្តនៅក្នុងខេត្តមណ្ឌលគិរី បានធ្លាក់ខ្លួនឈឺងើបលែងរួច ក្រោយពីវាមិនអាចទ្រាំទ្រនឹងអាកាសធាតុដែលបានចុះត្រជាក់ខ្លាំងអស់ជាច្រើនថ្ងៃមកនេះ។
លោក ឃុន ឌីយ៉ូន ប្រធានអង្គការសត្វដំរីខេត្តមណ្ឌលគិរី បានឲ្យដឹងថា ដំរីនេះមានឈ្មោះ មីឡុត រស់នៅស្រុកអូររាំង បានធ្លាក់ខ្លួនឈឺជាទម្ងន់ដោយសារអាយុកាល និងអាកាសធាតុត្រជាក់ខ្លាំង។ លោកថា ក្រោយពីទទួលបានព័ត៌មានភ្លាម បុគ្គលិកអង្គការ ELIE ចំនួន៧នាក់ រួមសម្ភារៈសង្គ្រោះ ដែលមានឱសថ សេរ៉ូម អេស្កាវាទ័រ (ជួយលើក) និងសម្ភារៈមួយចំនួនទៀតបានទៅដល់ទីកន្លែងកើតហេតុ និងបានត្រួតពិនិត្យ-ធ្វើចលនា ផ្តល់ថ្នាំ ផ្ដល់សេរ៉ូម និងផ្តល់កំដៅ… ហើយក្រោយពីការជួយសង្គ្រោះប្រមាណ៥ម៉ោង ឃើញថា ដំរីនេះមិនមានផលវិជ្ជមានច្រើនឡើយ ពោលគឺពិបាកជួយសង្គ្រោះ។
ម្ចាស់ដំរីឲ្យដឹងថា ដំរីរបស់គាត់បានធ្លាក់ខ្លួនឈឺជាច្រើនថ្ងៃមកហើយ តែនៅព្រឹកថ្ងៃទី២១ ម្សិលមិញ សុខភាពរបស់វាហាក់កាន់តែទ្រុតទ្រោមជាខ្លាំងរហូតមិនអាចងើបដើររកស៊ីចំនីដូចសព្វមួយដង។ ម្យ៉ាងដំរីនេះមានអាយុ៨៥ឆ្នាំ ដែលជាវ័យចាស់ណាស់ទៅហើយ។
យោងតាមព្រឹត្តិប័ត្រអាកាសធាតុ ដែលចេញដោយក្រសួងធនធានទឹក និងឧតុនិយម នៅថ្ងៃនេះ ខេត្តមណ្ឌលគិរី មានសីតុណ្ហភាព ១៥អង្សាសេ ខណៈរាជធានីភ្នំពេញ ២០,៩អង្សាសេ៕