ខេត្តស្ទឹងត្រែង ៖ នៅថ្ងៃទី១៥ ខែធ្នូ ឆ្នាំ២០១៧ កងរាជអាវុធហត្ថខេត្តស្ទឹងត្រែងបង្ក្រាបបានជនសង្ស័យជាជនជាតិឡាវម្នាក់ រួមទាំងគ្រឿងញៀនប្រមាណជា10.000គ្រាប់ (មួយម៉ឺនគ្រាប់) ស្ថិតក្នុងភូមិអូរស្វាយ ឃុំអូរស្វាយ ស្រុកថាឡាបរិវ៉ាត់ ក្រុងស្ទឹងត្រែង ខេត្តស្ទឹងត្រែង។
ប្រតិបត្តការបង្រ្កាបខាងលើដឹកនាំដោយលោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង ក្នុងការចុះបង្ក្រាបករណីនេះបានដោយជោគជ័យ។
លោកវរៈសេនីយ៍ឯក ដួង វិចិត្រ មេបញ្ជាការរងអាវុធហត្ថខេត្ត បានអោយដឹងថា មុននឹងឈានដល់ការឃាត់ខ្លួនជនសង្ស័យខាងលើនេះ គឺបានរៀបចំដាក់បណ្តាញតាមអង្កេត និងដោយប្រើវិធានញុះញង់ និងមានការសម្របសម្រួលពីលោក ច្រឹង ខ្មៅ ព្រះរាជអាជ្ញាអមសាលាដំបូងខេត្តស្ទឹងត្រែង។
ជនសង្ស័យឃាត់ខ្លួនឈ្មោះ ថាវ ចឺយ ភេទប្រុស អាយុ៥៨ឆ្នាំ ជនជាតិឡាវ មុខរបរកសិករ
រស់នៅភូមិមឿងមឺន ឃុំនួនហៃ ស្រុកមឿងមឺន ខេត្តវៀងច័ន្ទ ប្រទេសឡាវ។
ក្រោយពេលឃាត់ខ្លួន កម្លាំងអាវុធហត្ថរកឃើញថ្នាំញៀនប្រភេទមេតំហ្វេតមីនគ្រាប់មូលសំប៉ែតពណ៌ផ្កាឈូកមានអក្សរ (WY) ចំនួន២កញ្ចប់ធំ ដែលមានចំនួនប្រមាណជាងមួយម៉ឺនគ្រាប់។
ជនសង្ស័យនិងវត្ថុតាង ត្រូវបានអាវុធហត្ថកសាងសំណុំរឿងបញ្ជូនខ្លួនបន្តទៅកាន់តុលាការដើម្បីចាត់ការតាមនីតិវិធី៕