ភ្នំពេញ ៖ នៅព្រឹកថ្ងៃទី១ ខែធ្នូ ឆ្នាំ២០១៧ កម្មករ កម្មការិនី ប្រមាណជាង៥០០នាក់ ក្នុងរោងចក្រ EVC ម៉េងដាហ្វូតវៀរ បាននាំគ្នាធ្វើកូដកម្មបិទផ្លូវវេងស្រេង ត្រង់ចំណុចខាងកើតផ្សារកាណាស៊ីធី ភូមិចោមចៅ១ សង្កាត់ចោមចៅ១ ខណ្ឌពោធិ៍សែនជ័យ ដើម្បីទាមទារលក្ខខណ្ឌមួយចំនួន ពីខាងភាគីរោងចក្រ ប៉ុន្តែត្រូវបានអាជ្ញាធរចុះទៅសម្របសម្រួល និងបើកផ្លូវឡើងវិញហើយ។
ប៉ុន្តែនារសៀលនេះ កម្មកររោងចក្រ EVC ម៉េងដាហ្វូតវៀរ បាននាំគ្នាបិទផ្លូវវេងស្រេងម្តងទៀត បណ្ដាលឲ្យមានការកកស្ទះយ៉ាងខ្លាំង ។ មូលហេតុដែលនាំឲ្យមានការបិទផ្លូវនេះ ដោយសារតែក្រុមកម្មករតវ៉ាពីលក្ខខណ្ឌការងារ៥ចំណុចពីថៅកែរោងចក្ររួមមាន ទី១ លុយ៥% ទី២ លុយអតិភាពការងារ ទី៣ លុយបំណាច់ឆ្នាំ ទី៤ លុយជូនដំណឹង និងទី៥ លុយជំងឺចិត្ត ។
សូមរម្លឹកថា កម្មកររោងចក្រនេះ កាលពីព្រឹកមិញបាននាំគ្នាតវ៉ាបិទផ្លូវម្តងហើយ ប៉ុន្តែត្រូវបានអាជ្ញាធរចុះទៅសម្របសម្រួល និងបើកផ្លូវម្តងហើយ ហើយមិនដឹងយ៉ាងម៉េចបានជារសៀលនេះនាំគ្នាតវ៉ាបិទផ្លូវទៀត ៕
