ភ្នំពេញ ៖ ខួបគម្រប់១៣ឆ្នាំ នៃការយាងឡើងសោយរាជសម្បត្តិ របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ដើម្បីអបអរពិធីនេះ មន្ត្រីរាជការ បុគ្គលិក កម្មករ និយោជិត ត្រូវបានរាជរដ្ឋាភិបាលអនុញ្ញាតឲ្យឈប់សម្រាកពីការងារ ហើយព្រះឆាយាល័ក្ខណ៍ របស់ព្រះអង្គ ត្រូវបានគេដាក់តាំង នៅមុខព្រះបរមរាជវាំង និងតាមទីសាធារណៈ ស្ថាប័នរដ្ឋ និងឯកជនមួយចំនួនផងដែរ។
គួរបញ្ជាក់ថា ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះអង្គព្រះរាជសម្ភព ( ប្រសូត) នាថ្ងៃទី ១៤ ឧសភា ១៩៥៣ ។ ទ្រង់ជាព្រះរាជបុត្រ របស់ ព្រះបរមរតនកោដ្ឋ( សម្តេចឪ នរោត្តមសីហនុ) និងសម្ដេចព្រះវររាជមាតាជាតិខ្មែរ នរោត្តមមុនីនាថ សីហនុ ។
កាលពីថ្ងៃទី២៩ តុលា ២០០៤ ព្រះអង្គ ត្រូវបានក្រុមប្រឹក្សារាជសម្បត្តិដែលមានសមាសភាព០៩អង្គនិងរូប ជ្រើសតាំងជាព្រះមហាក្សត្របន្តពីព្រះបិតា បន្ទាប់ពីសម្តេចឪព្រះអង្គបានដាក់រាជកាលពីថ្ងៃទី៧ តុលា ២០០៤។
សម្តេច ព្រះបរមនាថ នរោត្តម សីហមុនី ទ្រង់ឡើង គ្រងរាជសម្បត្តិ នៅថ្ងៃសុក្រ ទី២៩ ខែតុលា ឆ្នាំ២០០៤ ។
មុនពេលឡើងគ្រងរាជសម្បត្តិ ព្រះករុណានរោត្តមសីហមុនី ល្បីល្បាញដោយស្នាព្រះហស្ថរបស់ទ្រង់ជាឯកអគ្គរាជទូតវប្បធម៌នៅអង្គការយូណេស្កូ (UNESCO) និងជាគ្រូបង្ហាត់របាំបុរាណដ៏ចំណាន៕
