កំពង់ធំ ៖ ជនសង្ស័យចំនួន៣នាក់ ពាក់ព័ន្ធលើករណីបាញ់សម្លាប់ប្តីប្រពន្ធ កាលពីយប់ថ្ងៃទី២០ ខែតុលា ត្រូវបានកម្លាំងនគរបាលស្រុកខេត្ត ដែលដឹកនាំដោយលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ចុះឃាត់ចាប់ខ្លួន កាលពីវេលាម៉ោង៨និង៣៥នាទី ព្រឹកថ្ងៃទី២៥ ខែតុលា ឆ្នាំ២០១៧ នៅតំបន់ទួលស្រឡៅ ភូមិដងក្តា ឃុំក្រយា ស្រុកសន្ទុក ខេត្តកំពង់ធំ។
ប្រភពពីសមត្ថកិច្ចស្រុកសន្ទុកបានបង្ហើបឲ្យដឹងថា ជនសង្ស័យដែលសមត្ថកិច្ចឃាត់ខ្លួន ១ឈ្មោះ ប៉ុន ចិន្តា ហៅត្រា ភេទប្រុស អាយុ២៤ឆ្នាំ ២ ឈ្មោះ ប៉ុនរ៉ុង ភេទប្រុសអាយុ២៦ឆ្នាំ រស់នៅភូមិដូនបុស ឃុំចំការអណ្តូង ស្រុកចំការលើ ខេត្តកំពង់ចាម និងទី៣ឈ្មោះ អៀងពន ភេទប្រុស អាយុ៤៣ឆ្នាំ រស់នៅភូមិព្នៅ ឃុំទ្រៀល ស្រុកបារាយណ៏ ខេត្តកំពង់ធំ។
សមត្ថកិច្ចបន្តថា ជនសង្ស័យខាងលើនេះបានធ្វើសកម្មភាពបាញ់សម្លាប់ប្តី ប្រពន្ធ២នាក់ ដែលកំពុងបើករថយន្តហៃឡែនឌ័រ ពណ័កាម៉ៃ ដឹកក្មួយស្រីអាយុ១៥ឆ្នាំនិងកូនប្រុសអាយុ១២ឆ្នាំ ចេញពីរោងចក្រផលិតជ័រកៅស៊ូក្រែបជប៉ុន ស្ថិតនៅតំបន់អូរសាជូ ឃុំក្រយា ស្រុកសន្ទុក ខេត្តកំពង់ធំ កាលពី ម៉ោង៩និង៣៥នាទីយប់ ថ្ងៃទី២០ តុលា ឆ្នាំ២០១៧ កន្លងថ្មីៗដោយក្រុមឃាតករ បានបាញ់រះកាំភ្លើងអាការ៤៧ ជាង១០គ្រាប់ ហើយចូលយកលុយខ្មែរជាង៣០លានរៀល និងគ្រឿងអល្លង្កា មាសពេជ្រ សរុបអស់ជិត៥ម៉ឺនរៀល រួចហើយគេចខ្លួន១រយៈ។
ប្រភពដដែលបន្តថា ស្ត្រីរងគ្រោះជាថៅកែប្រមូលទិញជ័រក្រែប នៅក្នុងក្រុមហ៊ុនខាងលើ ឈ្មោះ លី ចាន់ធឿន អាយុ៣៨ឆ្នាំ និងប្តីឈ្មោះ សឿងប្រុញ អាយុ៤១ឆ្នាំ មានស្រុកកំណើតនៅភូមិក្រែក ឃុំក្រែក ស្រុកពញាក្រែក ខេត្តត្បូងឃ្មុំ បច្ចុប្បន្នបានមករស់នៅ ភូមិដងក្តា ឃុំក្រយា ស្រុកសន្ទុក ខេត្តកំពង់ធំ។
យោងតាមប្រភពព័ត៍មាន ពីកន្លែងកើតហេតុបានបង្ហើបឲ្យដឹងថា ជនសង្ស័យទាំងបីនាក់ ម្នាក់ជាមេការ និង២នាក់ទៀតជាកម្មកររបស់រោងចក្រកៅស៊ូក្រែប ផ្តើមហេតុព្រោះស្ត្រីរងគ្រោះជាថៅកែទិញជ័រកៅស៊ូ បានបញ្ឈប់ការងារមេការ ជាជនសង្ស័យឈ្មោះអៀងពន។
