ខេត្តត្បូងឃ្មុំ ៖ តាមសេចក្តីរាយការណ៍មួយបានបង្ហើបឱ្យដឹងថា នៅច្រករបៀងបឹងជ្រោង ដែលស្ថិតនៅភូមិបឹងជ្រោង ឃុំជាំ ស្រុកមេមត់ ខេត្តត្បូងឃ្មុំ មានរថយន្តដឹកអុសបន្តកន្ទុយគ្នាដូចគេហែបុណ្យផ្កា ចូលទៅស្រុកយួនយ៉ាងរលូនក្នុងមួយថ្ងៃៗ មិនតិចជាង ៥០រថយន្តនោះឡើយ។
លោក ធៀម ម៉ាដែន ហៅតក់ មេប៉ុស្តិ៍បឹងជ្រោងប្រាកដជាសប្បាយក្នុងការប្រមូលលុយពីរថយន្តដឹកអុសទាំងនោះ ជាថ្នូរនិងការបើកច្រកឱ្យដឹកចេញទៅលក់នៅស្រុកយួន ដែលមានពួកឈ្មួញរង់ចាំទទួលនៅទីនោះ។
ឈ្មួញរកស៊ីដឹកអុសបានលួចខ្សឹបថា រថយន្តសាំយ៉ុងដឹកអុស១គ្រឿង ត្រូវបង់ឲ្យមេប៉ុស្តិ៍បឹងជ្រោង ៨ម៉ឺនរៀល រថយន្តកូរ៉េ ២ភ្លៅ ទៅ ៣ភ្លៅ ត្រូវបង់ចាប់ពី ៥០ ទៅ ១០០ដុល្លារ ចំណែករថយន្តសាំយ៉ុងមួយចំនួន ដែលដឹកអុសលាយឈើសុក្រម កាត់កង់ៗជារបៀបអុស គឺត្រូវបង់២០ម៉ឺនរៀល ព្រោះឈើទាំងនោះគេអាចយកទៅកែច្នៃជាគ្រឿងសង្ហារឹមបាន ហើយក្នុង១ថ្ងៃៗ មិនតិចជាង ៥០រថយន្តនោះឡើយ ។
ប្រភពបន្តខ្សឹបប្រាប់ថា សមត្ថកិច្ចដែលឈរជើងប្រចាំការនៅច្រកបឹងជ្រោង មានខាងយោធាស្រុក ប៉ូលិសស្រុក ប៉េអឹមស្រុក និងប៉ូលិសខេត្តត្បូងឃ្មុំ ប៉ុន្តែអ្នកដែលខ្លាំងឈរធ្វើមេស៊ីសង គឺបក្ខពួកលោក ធៀម ម៉ាដែន ហៅតក់ បានដើរប្រមូលលុយពីរថយន្តដឹកអុស បើរថយន្តណារឹងទទឹង គឺមិនអាចឆ្លងប៉ុស្តិ៍ខាងលើនេះបានទេ ប៉ុន្តែករណីនេះកម្រកើតមានណាស់ ព្រោះឈ្មួញនិងសមត្ថកិច្ចប៉ុស្តិ៍ចេះសម្របសម្រួលគ្នាជាប្រព័ន្ធរួចហើយ ពុំមានឧបសគ្គអ្វីឡើយ ហើយមេប៉ុស្តិ៍បឹងជ្រោងកំពុងត្រូវប៉ាន់យ៉ាងខ្លាំង ចំណែកគេឃើញមានវត្តមានរបស់គយចល័តដែរ តែបានចំណូលតិចតួចប៉ុណ្ណោះ មិនដូចក្រុមលោក ធៀម ម៉ាដែន ហៅតក់ នោះទេ។
សូមបញ្ជាក់ថា នៅក្នុងខេត្តត្បូងឃ្មុំ ក្នុងចំណោមច្រករបៀងទាំងអស់មានតែច្រករបៀងបឹងជ្រោងតែមួយគត់ ដែលអាចបើកច្រករកលុយឱ្យរថយន្តដឹកអុសចេញទៅស្រុកយួនបានដោយសេរី ដែលប្រាកដថា ខ្សែលោកមេប៉ុស្តិ៍បឹងជ្រោងមិនណយទេ ទើបអាចបើកច្រកនេះបាន។
ចំណែកប្រជាពលរដ្ឋបានលើកឡើងថា ឈើអុសគឺដឹកចេញមកពីដែនជម្រកសត្វព្រៃភ្នំព្រិច វាជាលក្ខណៈអុសមែន តែតាមពិតគេអាចយកទៅកែច្នៃជាសម្ភារៈគ្រឿងសង្ហារឹមបាន ទើបយួនគេសំរុកទិញ រួចបើច្រកបឹងជ្រោងនៅតែបើកដំណើរ ឱ្យដឹកអុសចេញពីតំបន់ដែនជម្រកសត្វព្រៃភ្នំព្រិច ច្បាស់ជាត្រូវរលាយជាមិនខាន។
នៅពេលអ្នកសារព័ត៌មានទូរស័ព្ទទៅលោក ងី សុខហេង នាយផ្នែករដ្ឋបាលព្រៃឈើប្រចាំស្រុកមេមត់ តំបែរ ក្រែក លោកបានឆ្លើយថា ការដឹកអុសគឺដឹកអត់មានច្បាប់ទម្លាប់ទេ ដឹកដោយខុសច្បាប់។
ប្រជាពលរដ្ឋរិះគន់ថា តាមពិតវរៈការពារព្រំដែនមានតួនាទី ការពារអធិបតេយ្យភាព សន្តិសុខតាមព្រំដែន តែ លោក ធៀម ម៉ាដែន ហៅតក់ មេប៉ុស្តិ៍បឹងជ្រោង បែរជាយកតួនាទីមកបើកប៉ុស្តិ៍បឹងជ្រោងឱ្យនាំអុសចេញ ស្វែងរកលាភសក្ការៈឱ្យខ្លួន និងបក្ខពួក ខុសពីភារកិច្ចដែលក្រសួងមហាផ្ទៃ និងអគ្គស្នងការនគរបាលជាតិប្រគល់ឱ្យគ្រប់គ្រង និងបណ្តាលឱ្យមានការកាប់ បំផ្លាញតំបន់ព្រៃការពារជាច្រើនកន្លែងដោយសារការបើកច្រកឱ្យចេញអុសខាងលើនេះ ៕
