សៀមរាប ៖ នៅយប់ទី១៤ ខែតុលា ឆ្នាំ២០១៧ កម្លាំងកងរាជអាវុធហត្ថខេត្តសៀមរាប ដឹកនាំដោយលោក វរសេនីយ៍ត្រីឡុង ចាន់រិទ្ធ ស្ទាក់បង្រ្កាបបានរថយន្តដឹកឈើប្រណិតចំនួន២គ្រឿង នៅលើកំណាត់ផ្លូវជាតិលេខ៦ ត្រង់ចំណុចភូមិព្រៃជ្រូក ឃុំព្រៃជ្រូក ស្រុកពួក ខេត្តសៀមរាប។ប្រភពពីមន្ត្រីអាវុធហត្ថបានឲ្យដឹងថា រថយន្តដឹកឈើប្រណិតទាំង២គ្រឿងនោះម៉ាកLEXUS.RX ៣០០ ពណ៌ស សេរីឆ្នាំ១៩៩៩ ពាក់ផ្លាកលេខ.ភ.ព.២AG.០៧៤៣ និងមួយគ្រឿងទៀត ម៉ាកCAMARYឆ្លាម សេរីឆ្នាំ១៩៩៧ ពណ៌ប្រផេះ ពាក់ផ្លាកលេខកំពត២A.០៧៤២ ដឹកឈើប្រភេទធ្នង់ អារជាកំណាត់ៗចំនួនសរុប២៩ដុំស្នើ០,៦២៨ម៉ែត្រគួប ដោយគ្មានលិខិតអនុញ្ញាត ត្រូវបានមន្រ្តីអាវុធហត្ថខេត្តប្រគល់ទៅឲ្យរដ្ឋបាលព្រៃឈើ ចាត់ការបន្តតាមផ្លូវច្បាប់ចំណែកម្ចាស់រថយន្តទាំងពីគ្រឿងរត់គេចខ្លួនបាត់ស្រមោលទៅហើយ។
បច្ចុប្បន្នវត្ថុតាង រថយន្ដដឹកបទល្មើសឈើប្រណិតទាំងពីរគ្រឿង និងឈើប្រណិតធ្នង់ ២៩ដុំស្នើ០,៦២៨ម៉ែត្រគួប ត្រូវជំនាញរដ្ឋបាលព្រៃឈើយកទៅរក្សាទុកនូវផ្នែកបន្ទាយស្រី ។បទល្មើសព្រៃឈើកំពុងតែកំរើកឡើងវិញយ៉ាងគគ្រឹកគគ្រេង បន្ទាប់ពីស្ងប់បានមួយដង្ហើម ចង្រិតនៅក្នុងខេត្តសៀមរាប បើទោះជាមានការរឹតបណ្តឹងពីរាជរដ្ឋាភិបាលយ៉ាងណាក៍ដោយ៕
