កំពង់ស្ពឺ ៖ នៅរសៀលថ្ងៃទី១៥ ខែតុលា ឆ្នាំ២០១៧ ដោយមានការផ្តល់ព័ត៌មានពីសកម្មភាពជំនួញបទល្មើសព្រៃឈើដែលក្រុមឈ្មួញដឹកជញ្ជូនចេញពីដែនជំរកភ្នំឱរ៉ាល់ ដើម្បីយកទៅលក់ទៅក្រៅប្រទេស និងគោរពតាមបទបញ្ជារបស់ លោកឧត្តមសេនីយ៌ត្រី ជូ សារុន មេបញ្ជាការកងរាជអាវុធហត្ថខេត្ត បានបញ្ជាឲ្យកម្លាំងគ្រប់មូលដ្ឋានក្រុង-ស្រុក បង្ក្រាបឲ្យមានប្រសិទ្ធិភាពដោយម៉ឺងម៉ាត់ជាទីបំផុត ក្នុងការបង្រ្កាបបទល្មើសព្រៃឈើក្នុងខេត្តកំពង់ស្ពឺ កម្លាំងកងរាជអាវុធហត្ថស្រុកថ្ពងបានសហការជាមួយកងកម្លាំងរាជអាវុធហត្ថលើផ្ទៃប្រទេសបាន បង្ក្រាបរថយន្តដឹកឈើ១គ្រឿង នៅចំណុច ភូមិអូរដា ឃុំអមលាំង ស្រុកថ្ពង ខេត្តកំពង់ស្ពឺ។
រថយន្តដែលបង្រ្កាបបានខាងលើនេះម៉ាក ហ៊ីយ៉ាន់ដាយ ចំណុះ៨តោន ពណ៍ត្រេអ៊ី ពាក់ស្លាកលេខ តាកែវ3A:1571 ផ្ទុកទៅដោយឈើប្រភេទម្រេញ ចំនួន២៥ដុំស្មើនិង១៤.០១៩ម៉ែត្រគូប។នៅក្នុងករណីបង្ក្រាបរថយន្តដឹកឈើខាងលើនេះដែរ កងកម្លាំងរាជអាវុធហត្ថបានឃាត់ខ្លួនបានមនុស្ស០២នាក់ផងដែរ។ បច្ចុប្បន្នមនុស្សត្រូវបានបញ្ជូនមកកងរាជអាវុហត្ថខេត្តកំពង់ស្ពឺ ដើម្បីធ្វើការសួរនាំ រីឯឈើនិងរថយន្ត ត្រូវបានកម្លាំងកងរាជអាវុហត្ថស្រុកថ្ពង ធ្វើការប្រគល់ជូនខណ្ឌរដ្ឋបាលព្រៃឈើស្រុកឱរ៉ាល់ យកទៅ រក្សាទុកដើម្បីចាត់ការបន្តតាមនិតិវិធីច្បាប់៕
