ភ្នំពេញ ៖ យោងតាមរបាយការណ៍របស់កងរាជអាវុធហត្ថលើផ្ទៃប្រទេស ស្តីពីការស្រាវជ្រាវករណីជនខិលខូច ដែលបានឆ្លៀតឱកាសប្រើវិធីយកលុយពីការជ្រើសរើសកងទ័ព បំពេញក្របខណ្ឌឱ្យយោធភូមិភាគទី១ កងទ័ពជើងគោក មនុស្សសង្ស័យចំនួន២នាក់ ត្រូវបានព្រះរាជអាជ្ញារងតុលាការយោធា ធ្វើការឃាត់ខ្លួន ពាក់ព័ន្ធនឹងករណី ឆ្លៀតឱកាសឆបោកយកលុយក្នុងការជ្រើសរើសពលទាហានបំពេញក្របខណ្ឌ ឱ្យយោធភូមិភាគទី១កងទ័ពជើងគោក។
ការចាប់ខ្លួនជនឆ្លៀតឱកាសឆបោកយកលុយ ក្នុងការជ្រើសរើសពលទាហាន បំពេញក្របខណ្ឌឱ្យយោធភូមិភាគទី១ កងទ័ពជើងគោក បានធ្វើឡើងកាលពីល្ងាចថ្ងៃទី០៣ ខែតុលា ឆ្នាំ២០១៧ បន្ទាប់ពីមានការប្តឹងពីសំណាក់បេក្ខជនដាក់ពាក្យសុំបម្រើកងទ័ព បំពេញក្របខណ្ឌឱ្យយោធភូមិភាគទី១ កងទ័ពជើងគោក ពីរឿងនាំពួកគេចូលធ្វើកងទ័ពនិងបានកំណត់យកប្រាក់ក្នុងម្នាក់៥៥០ដុល្លារ និងក្រោមការស៊ើបអង្កេត និងដឹកនាំសម្របសម្រួលពីលោក ម៉ែន ហុង ព្រះរាជអាជ្ញារងតុលាការយោធា។
ជនឆ្លៀតឱកាសឆបោក គឺមាន២នាក់រួមមានទី១ វរៈសេនីយឯក ហេង រិទ្ធី និងទី២ វរៈសេនីយ៍ត្រី ម៉ាន ម៉ាត់។ បច្ចុប្បន្នជនជាប់ចោទទាំង០២នាក់ខាងលើ ត្រូវបានកសាងសំណុំរឿងបញ្ជូនទៅស្ថាប័នអយ្យការយោធានៅថ្ងៃទី០៣ ខែតុលា ឆ្នាំ២០១៧ ចាត់ការតាមផ្លូវច្បាប់ ក្រោមការចោទប្រកាន់អំពីករណីជ្រើសរើសទ័ពដោយគ្មានបទបញ្ជានិងករណីឆបោក៕
