កំពត ៖ កាលពីថ្ងៃទី០២ ខែតុលា ឆ្នាំ២០១៧ កម្លាំងនគរបាលអន្តរាគមន៍ឈុតខ្មៅ នៃស្នងការដ្ឋាននគរបាលខេត្តបាត់ដំបង និងខេត្តកំពង់ចាម ដឹកនាំដោយលោកអនុសេនីយ៍ឯក ឈឿង គឹមសុង ប្រធានក្រុមអន្តរាគមន៍ឈុតខ្មៅ ស្នងការដ្ឋានខេត្តបាត់ដំបង បានមកសហការជាមួយកម្លាំងអន្តរាគមន៍ឈុតខ្មៅរបស់ស្នងការដ្ឋាននគរបាលខេត្តកំពត ដឹកនាំដោយ លោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកំរិតស្រាលស្នងការដ្ឋានខេត្តកំពត និងដោយមានការសម្រួលនីតិវិធីពីលោក ខាន់ សុផល តំណាងអយ្យការអមសាលាដំបូងខេត្តកំពត បានសហការគ្នាចុះវែកមុខក្រុមចោរ ដែលធ្លាប់ធ្វើសកម្មភាពលួចម៉ូតូនៅតាមហាងខារ៉ាអូខេ ក្លឹបកំសាន្តផ្សេងៗ ចំណតរថយន្ត និងទីប្រជុំជននានា ប្រើល្បិចគ្រប់ស្នៀត ស្ទើរតែគ្រប់ខេត្តនៅទូទាំងប្រទេស
ហើយថ្មីៗនេះ ក្រុមចោរមួយក្រុមនេះបានធ្វើសកម្មភាពបីខេត្ត ដែលសមត្ថកិច្ចទទួលបណ្តឹងពីជនរងគ្រោះមានខេត្តកំពង់ចាម ខេត្តបាត់ដំបង និងខេត្តកំពត ។
សមត្ថកិច្ចបានឲ្យដឹងថា សកម្មភាពនិងល្បិចរបស់ក្រុមចោរនេះ គឺមាននីតិវិធីរបស់ពួកគេខ្លាំងណាស់ គឺធ្វើគ្រប់រូបភាព លួចយកម៉ូតូដ៏ច្រើនសន្ធឹកសន្ធាប់ពីជនរងគ្រោះនាពេលកន្លងមក នៅតាមបណ្ដាខេត្ត ។
ជនសង្ស័យទាំង៥នាក់ដែលបង្ក្រាបបាននៅខេត្តកំពតមាន ៖ ១.ឈ្មោះ ម៉ប ហ៊ិន ភេទប្រុស អាយុ៤២ឆ្នាំ មានទីលំនៅភូមិត្រស្លា ឃុំសំឡាញ ស្រុកអង្គរជ័យ ខេត្តកំពត ជាគ្រូអនុវិទ្យាល័យអង្គរជ័យ ២.ឈ្មោះ ស៊ឹម ចាន់ថន ហៅឥណ្ឌា ភេទប្រុស អាយុ៣៥ឆ្នាំ មានទីលំនៅភូមិសត្វពង ឃុំសត្វពង ស្រុកឈូក ខេត្តកំពត (មេខ្លោងខាងដាក់ថ្នាំ និងប្រើល្បិច ) ៣.ឈ្មោះ ឃីន ណី ភេទប្រុស អាយុ៤៨ឆ្នាំ មានទីលំនៅភូមិកសិករ ឃុំសំឡាញ ស្រុកអង្គរជ័យ ខេត្តកំពត ៤.ឈ្មោះ និន ម៉ាំង ភេទប្រុស អាយុ២៧ឆ្នាំ មានទីលំនៅភូមិក្រសាំង ឃុំឈូក ស្រុកឈូក ខេត្តកំពត ៥.ឈ្មោះ គឹម សេងដុះ ភេទប្រុស អាយុ២៧ឆ្នាំ មានទីលំនៅភូមិក្រសាំង ឃុំឈូក ស្រុកឈូក ខេត្តកំពត និង៦.ឈ្មោះ ហឺង គឹមហៃ ភេទប្រុស អាយុ៥០ឆ្នាំ មានទីលំនៅភូមិស្តុក ឃុំសំឡាញ ស្រុកអង្គរជ័យ ខេត្តកំពត ។ វត្ថុតាងដែលរឹបអូសបានពីជនសង្ស័យទាំង៥នាក់នេះរួមមាន ៖ ម៉ូតូចំនួន៤គ្រឿង រថយន្តមួយគ្រឿង ដែលពួកគេជិះធ្វើសកម្មភាព និងស្លាកលេខម៉ូតូចំនួន៦ ។
ជនសង្ស័យទាំង៥នាក់នេះ រួមនិងម្នាក់ដែលយកពីខេត្តបាត់ដំបង និងវត្ថុតាង ត្រូវបានសមត្ថកិច្ចស្នងការខេត្តកំពត ប្រគល់ជូនទៅនគរបាលខេត្តបាត់ដំបង ដើម្បីបន្តនីតិវិធីតាមផ្លូវច្បាប់ ៕
