រតនគិរី ៖ កាលពីថ្ងៃ៣ តុលា ឆ្នាំ២០១៧ កម្លាំងសមត្ថកិច្ចចម្រុះខេត្តរតនគិរី បានរឹបអូសឈើប្រណិតជាង២០០កំណាត់ បន្ទាប់ពីឈ្មួញបានធ្វើការប្រមូលទិញពីគ្រប់ទិសទីក្នុងដែនដីខេត្ត យកមកស្តុកទុកនៅទីតាំងដាច់ស្រយាលមួយ ជាប់ក្រុមហ៊ុនប៊ុកយ៉ាឡាយហ័ងអាញ់ ស្ថិតនៅក្នុងភូមិកាណាតធំ ឃុំតាឡាវ ស្រុកអណ្តូងមាស ខេត្តរតនគីរី ។នៅក្នុងប្រតិបត្តិការចុះបង្ក្រាបជំនួញឈើនោះ គឺបានអនុវត្តតាមបទបញ្ជាយ៉ាងតឹងរឹង របស់គណៈបញ្ជាការឯកភាពរដ្ឋបាលខេត្តរតនគិរី លោកថង សាវុន ក្រោមការដឹកនាំបញ្ជាកម្លាំងបង្ក្រាប ដោយព្រះរាជអាជ្ញារងអមសាលាដំបូងខេត្ត គឺលោកហាក់ ហ៊័ន ។
ឈើប្រណិតដែលរងការបង្ក្រាបនោះ គេបានឲ្យដឹងថា មានម្ចាស់ឈ្មោះ ធី រស់នៅក្នុងមូលដ្ឋានបង្ក្រាបឈើខាងលើ ដោយបានធ្វើការប្រមូលទិញ ពីគ្រប់ទិសទីនៅក្នុងដែនដីខេត្ត ដឹកជញ្ជូនយកមកស្តុកទុក ត្រៀមដឹកជញ្ជូនយកទៅលក់នៅក្នុងប្រទេសវៀតណាម នៅក្នុងឧិកាសសមស្របណាមួយហុចឲ្យ ។
នាយផ្នែករដ្ឋបាលព្រៃឈើគ្រប់គ្រងស្រុក៣ គឺស្រុកបរកែវ ស្រុកអណ្តូងមាស និងអូរយ៉ាដាវ លោក ឡេង យុគ បានប្រាប់ឲ្យដឹងថា កម្លាំងប្រតិបត្តិការបានចុះឡោមព័ទ្ធទីតាំងស្តុកទុកឈើមួយកន្លែងនោះ ដែលគេដឹងថា មានម្ចាស់ឈ្មោះ ធី ហើយបានធ្វើការរឹបអូសឈើប្រណិតបានជាង២០០ដុំ និងសន្លឹក នាំយកមករក្សាទុកនៅផ្នែករដ្ឋបាលព្រៃឈើបរកែវ រហូតមកទល់នឹងពេលនេះ ឈើទាំងនោះនៅមិនទាន់ដឹងពីចំនួនពិតប្រាកដនោះទេ ព្រោះត្បិតសមត្ថកិច្ចកំពុងធ្វើការដឹកជញ្ជូននៅឡើយ ៕
