កំពង់ធំ ៖ ដោយសារតែមានភាពរញ៉េរញ៉ៃ ដែលបណ្តាលមកពីបញ្ហាអាប់អួរនូវសោភ័ណភាពក្រុងស្ទឹងសែន ជាពិសេសមុខផ្សារកំពង់ធំ គឺមានការរៀបចំតុ កៅអី រោង ដែលមិនរុះរើ ហើយបានដាក់ប្រចាំការនៅមុខផ្សារ ដែលជាចេតនាមួយ បង្ករឲ្យប៉ះពាល់យ៉ាងធ្ងន់ធ្ងរដល់សោភ័ណភាពក្រុងទាំងមូល ខណៈពេលដែលខេត្តកំពង់ធំ ត្រូវបានពិភពលោកស្គាល់ តាមរយះការដាក់បញ្ជូលប្រាសាទសំបូរព្រៃគុក ជាសម្បត្តិបេតិកភ័ណ្ទពិភពលោក ។
បន្ទាប់ពីភ្ញៀវជាតិ និងអន្តរជាតិ មកទស្សនាប្រាសាទសំបូរព្រៃគុក គឺគេបានចាប់អារម្មណ៍យ៉ាងខ្លាំងលើទិដ្ឋភាព សួនច្បារ ហាងអាហារដ្ឋាន ភោជនីយ៍ដ្ឋាន ជាពិសេសសោភ័ណភាពខេត្តកំពង់ធំ ដែលជាខេត្ត ទេសចរណ៍សំខាន់ក្នុងប្រទេសកម្ពុជានៅក្នុងព្រះរាជាណាចក្រកម្ពុជា ទើបមានប្រជាពលរដ្ឋជាច្រើន នាក់សំណូមពរឲ្យ អាជ្ញាធរក្រុងស្ទឹងសែន អាជ្ញាធរខេត្ត មេត្តាជួយរៀបចំសោភ័ណភាព មុខផ្សាកំពង់ធំ ខណៈដែលពេលនេះកំពុងតែស្ថិតនៅជាលក្ខណៈអាណាធិបតេយ្យ ដោយមិនបានយកចិត្តទុកដាក់រៀបចំសណ្ឋាប់ធ្នាប់ឲ្យបានសមរម្យនោះឡើយ ។
គេសង្កេតឃើញថា ជារៀងរាល់ថ្ងៃ មានអ្នកលក់មុខផ្សារកំពង់ធំ មួយចំនួនពុំបានរុះរើតូប មួយចំនួនទៀតទុកតុកៅអីចោល និងមានអ្នកខ្លះបានចាប់ផ្តើមរៀបចំតម្លើងតូបលក់ ចាប់តាំងពីម៉ោង១១ នឹង ១២ទៅ ដែលជាចន្លោះពេលភ្ញៀវទេសចរណ៍ជាតិ នឹងអន្តរជាតិ កំពុងតែធ្វើដំណើរឆ្លងកាត់ ទិដ្ឋភាពរញ៉េរញ៉ៃនេះ បានបង្ហាញពីការខ្វះចន្លោះរបស់អាជ្ញាធរ ដែលពុំបានចាប់អារម្មណ៍ រឿងតិចតួចស្តួចស្តើងនេះ ម្យ៉ាងវិញទៀត រូបសំណាកនាគបាញ់ទឹក នៅមុខផ្សារកំពង់ធំ បានក្លាយជាកន្លែងដាក់តុកៅអីលក់ រីឯទឹកនៅក្នុងអាង រូបសំណាក់ពោពេញទៅដោយសំរាម ជាក់ស្តែងនៅថ្ងៃទី១ ខែតុលា ឆ្នាំ២០១៧ ។ដោយសារតែមានការរិះគន់ពីសំណាក់អ្នកធ្វើដំណើរជាច្រើន ទើបបានស្នើរសុំឲ្យអាជ្ញាធរ មេត្តាជួយរំកិល ពេលវេលា ពេលល្ងាចដែលមិនសូវមានភ្ញៀវឆ្លងកាត់ អោយក្រុមអាជីវករដាក់តុកៅអីលក់ដូចធម្មតា ដើម្បីថែរក្សាមុខមាត់សោភ័ណភាពខេត្តទេសចរណ៍ ដែលជាខេត្តសំខាន់ សម្រាប់ការទាក់ទាញភ្ញៀវអោយមកស្នាក់នៅបានយូរ ដែលជាប្រភពមួយសម្រាប់រកចំនូលរបស់ប្រជាពលរដ្ឋ ៕
