កំពង់ឆ្នាំង-ពោធិ៍សាត់ ៖ កាលពីថ្ងៃទី២៦ ដល់ថ្ងៃទី២៩ ខែកញ្ញាថ្មីៗនេះ កងកម្លាំងប្រដាប់អាវុធ កងរាជអាវុធហត្ថលើផ្ទៃប្រទេស សហការជាមួយអាវុធហត្ថខេត្តកំពង់ឆ្នាំង និងខេត្តពោធិ៍សាត់ រុករកឃើញនិងធ្វើការបង្រ្កាបបានឈើប្រណិតធ្នង់ និងឈើរាជកុលជាច្រើនម៉ែត្រត្រីគុណ នៅកន្លែងផ្សេងៗក្បែរផ្នែករដ្ឋបាលព្រៃឈើវាលវែងអូលាក់មាស និងស្នាក់ការរបស់មន្រ្តីបរិស្ថានឧទ្យាននុរក្សកណ្ដាលជួរភ្នំក្រវាញនៅពងពង្ស បន្ទាប់ពីធ្វើការបង្ក្រាបរថយន្តយីឌុបដឹកឈើខុសច្បាប់១គ្រឿង និងឃាត់ខ្លួនមនុស្សចំនួន២នាក់ នៅខេត្តកំពង់ឆ្នាំង ។
ប្រតិបត្តិការរុករកនិងឈានដល់ការបង្ក្រាបឈើប្រណិតខាងលើធ្វើឡើងកាលពីល្ងាចថ្ងៃទី២៩ ខែកញ្ញា រហូតដល់ព្រឹកថ្ងៃទី០១ ខែតុលា ឆ្នាំ២០១៧ ត្រង់ចំណុចផ្ទះរបស់ឈ្មោះ ហុល ស្រី ភេទស្រី និងទី២ ត្រង់ចំណុចក្នុងចំការក្បែផ្ទះអ្នកភូមិដែលសមត្តកិច្ចកំពុងធ្វើកាស្រាវជ្រាវនៅឡើយ ទីតាំងលួចលាក់ស្តុបឈើប្រណិតពីរចំណុចនេះ ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង និងទី៣ ត្រង់ចំណុចផ្ទះរបស់ឈ្មោះ សៀប សំអឿន ភេទស្រី ស្ថិតក្នុងភូមិរវាង ឃុំសំរោង ស្រុកភ្នំក្រវាញ ខេត្តពោធិ៍សាត់។
បើយោងតាមប្រភពព័ត៌មានពីកម្លាំងកងរាជអាវុធហត្ថដែលចុះប្រតិបត្តិការក្នុងគោលដៅខាងលើនេះ បានឲ្យដឹងថា ទីតាំងទី១ ត្រង់ចំណុចផ្ទះរបស់ឈ្មោះ ហុល ស្រី ភេទស្រី បានរកឃើញឈើប្រណិតធ្នង់ចំនួន ៣២៨ដុំ មានទម្ងន់ចំនួន ៤៧២៨គីឡូក្រាម ស្មើរនឹងចំនួន ៣,៦៣៦ម៉ែត្រត្រីគុណ វត្ថុតាងឈើប្រណិតធ្នង់ទាំងអស់នេះ បានប្រគល់ឲ្យជំនាញគ្រប់គ្រងនៅទីនោះគឺផ្នែករដ្ឋបាលព្រៃឈើវាលវែង យករក្សាទុកជាបណ្ណោះអាសន្ន។
ប្រភពព័ត៌មានខាងលើបន្តថា ទីតាំងទី២ ត្រង់ចំណុចក្នុងចំការក្បែផ្ទះអ្នកភូមិដែលសមត្តកិច្ចកំពុងស្រាវជ្រាវនៅឡើយ ហើយ បានរកឃើញឈើប្រភេទប្រណិតធ្នង់ចំនួន ២៥៣ដុំ មានទម្ងន់ ៣៦៥៦គីឡូក្រាម ស្មើរនឹងចំនួន ២,៨១២ម៉ែត្រត្រីគុណ វត្ថុតាងឈើប្រភេទប្រណិតធ្នង់ទាំងអស់នេះ បានប្រគល់ជំនាញគ្រប់គ្រងនៅទីនោះ គឺមន្រ្តីបរិស្ថានឧទ្យាននុរក្សកណ្ដាលជួរភ្នំក្រវាញ ស្នាក់ការត្រពងពង្សយកទៅរក្សាទុកជាបណ្ណោះអាសន្ន។
ប្រភពព័ត៌មានដដែលបានបន្តទៀតថា ទីតាំងទី៣ នៅត្រង់ចំណុចផ្ទះរបស់ឈ្មោះ សៀប សំអឿន ភេទស្រី ត្រូវបានរកឃើញឈើប្រណិតធ្នង់ នៅក្នុងបន្ទប់ក្រោមផ្ទះចំនួន ៤៥០ដុំ មានទម្ងន់ចំនួន ៦១៣៨គីឡូក្រាម ស្មើរនឹងចំនួន ៤,៧២១ម៉ែត្រត្រីគុណថែមទៀត ហើយវត្ថុតាងឈើប្រណិតធ្នង់ទាំងនេះ បានប្រគល់ឲ្យជំនាញគ្រប់គ្រងនៅទីនោះ គឺមន្រ្តីរដ្ឋបាលព្រៃឈើផ្នែករដ្ឋបាលព្រៃឈើភ្នំក្រវាញ យកទៅរក្សាទុកជាបណ្ណោះអាសន្ន ។ហើយនៅចំណុចដដែលនេះដែរ ក៏បានរកឃើញឈើរាជកុលចំនួន ១៧ដុំ ស្មើរនឹងចំនួន ៦,៣០០ម៉ែត្រត្រីគុណបន្ថែមទៀត ដូច្នេះវត្ថុតាងឈើទាំងពីប្រភេទនេះសរុប ៖ ប្រណិតធ្នង់ចំនួន ១០៣១ដុំ មានទម្ងន់ចំនួន ៦៨.៥២២គីឡូក្រាម ឈើរាជកុលចំនួន ១៧ដុំ ស្មើរនឹងចំនួន ៦,៣០០ម៉ែត្រត្រីគុណ។
គួររំលឹកថា កាលពីវេលាម៉ោង៥ និង៣០នាទីល្ងាច ថ្ងៃទី២៨ ខែកញ្ញា ឆ្នាំ២០១៧ នៅត្រង់ចំណុចភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង កម្លាំងសមត្ថកិច្ចបានធ្វើការបង្រ្កាបរថយន្តយីឌុប ផ្លូវ៤ពណ៏សពាក់ស្លាកលេខ កំពត 3A 0251 ១គ្រឿង ដឹកឈើប្រណិតធ្នង់ពេញ ដែលមានចំនួន ៩២១ដុំ មានទម្ងន់ចំនួន ១៦៧៣០គីឡូក្រាម ស្មើរនឹងចំនួន ១៤,៥៤៧ម៉ែត្រត្រីគុណ និងបានឃាត់ខ្លួនមនុស្ស២នាក់ ទី១ ឈ្មោះ សម្បតិ ប៊ន ទី២ ឈ្មោះ អែម ហ៊ុន ហើយវត្ថុតាងទាំងរថយន្តនិងឈើប្រភេទប្រណិតធ្នង់ រួមទាំងមនុស្ស២នាក់បានប្រគល់ឲ្យមន្រ្តីជំនាញផ្នែករដ្ឋបាលព្រៃឈើកំពង់ត្រឡាច កសាងសំណុំរឿងចាត់ការបន្តតាមនិតិវិធី និងបានកំណត់មុខសញ្ញាជនសង្ស័យជាប់ពាក់ព័ន្ធផងដែរ ៕
