កំពង់ធំ ៖ កាលពីព្រឹកថ្ងៃទី២៦ ខែកញ្ញា ឆ្នាំ២០១៧ នៅសាលាឃុំច្រនៀង ស្រុកបារាយណ៍ ខេត្តកំពង់ធំ មានដាក់ដេញថ្លៃគម្រោងសាងសង់អគារសិក្សា១ខ្នង ដែលមានទឹកប្រាក់ប៉ាន់ស្មានចំនួន១៧៦.៣៣៨.១០០៛ ជាថវិការបស់ជាតិ ហើយត្រូវបានគេសង្ស័យថាមានការបោះលុយទឹកតែក្រោមតុ ដោយតំណាងក្រុមហ៊ុនជាច្រើនបានចូលរូម តែមានក្រុមហ៊ុនតែ៣គត់បានធ្វើការដាក់សំណើដេញថ្លៃ ហើយមានតម្លៃខ្ពស់ខុសពីការស្មានទៀតផង។
គណៈអធិបតីក្នុងពិធីធ្វើការប្រកាសដាក់ដេញថ្លៃនេះ រួមមានលោកលី វេទ ប្រធានទីចាត់ការផែនការ និងវិនិយោគខេត្តកំពង់ធំ លោកអួង សារឿន អភិបាលរងស្រុកបារាយណ៍ និងលោកសៀ សុផន មេឃុំច្រនៀង ព្រមទាំងមានការចូលរួមពីលោកមេភូមិ លោកគ្រូ អ្នកគ្រូ ផងដែរ។
នាឱកាសដាក់ដេញថ្លៃនេះដែរ លោកអួង សារឿន អភិបាលរងស្រុកបារាយណ៍ បានស្នើរសុំឲ្យតំណាងក្រុមហ៊ុនទាំងអស់ ដែលមានវត្តមានចូលរួមនៅកន្លែងដេញថ្លៃនេះ គឺសូមឲ្យមានការដេញថ្លៃដោយសេរីយុត្តិធម៌ និងត្រូវដាក់សំណើដេញថ្លៃឲ្យបានគ្រប់ៗគ្នា ជៀសវាងការឃុបឃិតគ្នាស្ថិតក្នុងរូបភាពណាមួយជាដាច់ខាត ព្រោះនេះជាកញ្ចប់ថវិការបស់ជាតិ ដែលបានទម្លាក់ចុះមកឲ្យឃុំ ដើម្បីធ្វើការអភិវឌ្ឍក្នុងមូលដ្ឋាន ដូច្នេះការដេញថ្លៃធ្វើយ៉ាងណាត្រូវឲ្យមានតម្លាភាព និងការសាងសង់ត្រូវតាមស្តង់ដារលក្ខណៈបច្ចេកទេសផងដែរ។
ទោះជាយ៉ាងណាដំណើរការនៃការដេញថ្លៃនេះ ត្រូវបានគេសង្ស័យថាមានការបោះលុយទឹកតែក្រោមតុដដែល ព្រោះថាគម្រោងសាងសង់អគារសិក្សា១ខ្នង មាន៣បន្ទប់ ទទឹង៩ម៉ែត្រ និងបណ្តោយ២៤ម៉ែត្រ ប្រក់ក្បឿង គឺមានទឹកប្រាក់ប៉ាន់ស្មានចំនួន១៧៦.៣៣៨.០០០៛ ត្រូវបានក្រុមហ៊ុន ជាម សៀង ចរចាត្រូវរ៉ូវគ្នាក្នុងតម្លៃ១៧៤.០០០.០០០៛ ដែលជាតម្លៃខ្ពស់ខុសប្រក្រតី ពោលគឺតម្លៃប្រកៀកប្រកិតជាមួយតម្លៃប៉ាន់ស្មានតែម្ដងហើយមានតែក្រុមហ៊ុន៣គត់បានធ្វើការដាក់សំណើដេញថ្លៃ ដែលគេហៅថាជាវិធីសាស្ត្រដាក់សំណើបង្គ្រប់ជើង ចំណែកឯតំណាងជាង៥០ក្រុមហ៊ុនទៀតនៅអង្គុយចាំយកលុយទឹកតែ ដោយពួកគេបានចរចារខ្សឹបខ្សៀវ ត្រូវរ៉ូវគ្នារួចជាស្រេចនៅមុនពេលធ្វើការដេញថ្លៃ។
ដោយសំអាងលើការដាក់សំណើចំនួន៣ក្រុមហ៊ុន គឺគ្រប់លក្ខខណ្ឌដេញថ្លៃហើយនោះ លោកសៀ សុផន មេឃុំច្រនៀង ដែលជាប្រធានគណៈកម្មាការម្ចាស់លទ្ធកម្ម បានប្រកាសទទួលស្គាល់ថាការដេញថ្លៃនេះអាចទទួលយកបាន។
សូមបញ្ជាក់ផងដែរថា ការដេញថ្លៃនេះមិនទាន់ចប់សព្វគ្រប់ផង ពោលគឺគ្រាន់តែដាក់សំណើបានជោគជ័យដូចការគ្រោងទុកភ្លាម គឺតំណាងក្រុមហ៊ុនទាំងអស់ រួមជាមួយម្ចាស់គម្រោងដែលទើបតែទទួលបានជោគជ័យ បាននាំគ្នាទៅចែកលុយទឹកតែ នៅភោជនីយដ្ឋាននិងការ៉ាសសាំងរបស់ឈ្មោះអ៊ឹង ចាន់ឡា នៅវាលសសៃ ស្ថិតក្នុងឃុំសូយោង ស្រុកបារាយណ៍ ខេត្តកំពង់ធំ ដោយក្តីរីករាយបំផុតតែទោះបីយ់ាងណាក៏ការដេញថ្លៃនេះប្រព្រិត្តទៅស្របតាមនីតិវិធីទាំងអស់៕
