កោះកុង ៖ ប្រជាពលរដ្ឋបានរាយការណ៏ឲ្យដឹងថា ដីព្រៃកោងកាង ព្រៃលិចទឹក ប្រមាណជិត១០ហិកតាដែលជាសម្បត្តិរដ្ឋ ស្ថិតនៅក្នុងភូមិសារាយខាងជើង ឃុំជ្រោយស្វាយ ស្រុកស្រែអំបិល ខេត្តកោះកុង ត្រូវបានគេយកគ្រឿងចក្រមកឈូសឆាយទន្រ្ទានយកដីធ្វើជាកម្មសិទ្ធឯកជន ដោយពុំឃើញមានសមត្ថកិច្ចចេញមុខបង្រ្កាបឡើយ។
ដីព្រៃកោងកាង ព្រៃលិចទឹក ដែលជាសម្បត្តិរដ្ឋ ត្រូវបានអាជ្ញាធរស្រុកស្រែអំបិលបំផ្លាញអស់ ដោយសារមាន ការឃុបឃិតគ្នាជាប្រព័ន្ធ ហ៊ានស៊ីញ៉េលក់ដីសម្បតិ្ដរបស់រដ្ឋដែលជាដីព្រៃកោងកាង ជាកន្លែងជំរកមច្ឆាជាតិសំរាប់ ក្ដាមពងត្រីពង។លនឹងល។ទៅឲ្យឈ្មួញដែលជាអ្នកមានលុយមានអំណាច។
កន្លងមក រាជរដ្ឋាបាលបានលើកឡើងថា ដីព្រៃលិចទឹកដីព្រៃកោងកាងគឺជាធនធាន ធម្មជាតិសំខាន់ណាស់សំរាប់ជួយទ្រទ្រង់ធម្មជាតិមាត់ព្រែកមាត់សមុទ្រ ហើយមិនអនុញ្ញាត អោយបុគ្គលម្នាក់ណា ឬក្រុមហ៊ុនណាមួយមកបំផ្លាញបានឡើយ បើក្រុមហ៊ុនណាមកវិយោគ ទុនប៉ះព្រៃលិចទឹកឬប៉ះព្រៃកោងកាង គឺត្រូវតែខ្វៀលចេញជាដាច់ខាត បើមិនខ្វៀលចេញទេគឺមិន អនុញ្ញាតឲ្យវិនិយោគឡើយ។
ចំណែលោកម៉េង តិច នាយកបរិស្ថានស្រុកស្រែអំបិល អ្នកសារព័ត៌មានបានតេទូរសព្ទ័ទៅសួរសុំការបំភ្លឺ ពីរឿងគ្រឿងចក្រអិចការវិទ័ពីរគ្រឿងកំពុងតែធ្វើសម្មភាពកាយព្រៃកោងកាងនៅតំបន់ខាងលើ លោកឆ្លើយថា លោកអត់មានពេលឆ្លើយជាមួយអ្នកកាសែតទេ ចង់ដឹងទៅសួរខ្លួនឯង អ្នកកាសែតអីខ្ញុំរវល់កាងារខ្ញុំ រួចក៌បឹទទូរសព្ទ័ទៅ។
ពាក់ពន្ធ័ក្នុងរឿងនេះ អ្នកសារព័ត៌មានបានមកជួបលោក ទួន សីលា អភិបាលស្រុកស្រែអំបិលបានឲ្យដឹងថា គាត់បានស៊ីញ៉េមែនរឿងដីហ្នឹង ពីព្រោះខាងបរិស្ថានគេអ្នកស៊ីញ៉េមុន ទើបគាត់ស៊ីញ៉េទៅ។លោកអភិបាលស្រុកបានបន្តថា រឿងដីកោងកាងជារឿងបរិស្ថានទេក៌ប៉ុន្តែបើអោយគាត់ស៊ីញ៉េដីព្រៃកោងកាងនោះ គាត់មិនហ៊ានស៊ីញ៉េទេ នេះជាការលើកឡើងរបស់អភិបាលស្រុកស្រែអំបិល។
ចំណែក លោក ជានាង ប្រធានភូមិបាលស្រុកស្រែអំបិល អ្នកសារព័ត៌មានបានទូរសព្ទ័ទៅរូបលោក តេចូល តែលោកមិនលើកទូរសព្ទ័ទេ។
ប្រជាពលរដ្ឋរស់នៅក្នុងឃុំជ្រោយស្វាយទាំងអស់លើកឡើងថា កន្លងមកពួកគាត់បានឃើញ ពួកមន្ត្រីបរិស្ថាន ដើរវ៉ៃស្លាកហាមឃាត់មិនឲ្យប៉ះពាល់ព្រៃកោងកាងនិងព្រៃលិចទឺកនៅតាមដើម កោងកាងនឹងកន្លែងព្រៃលិចទឹកគ្រប់ទីកន្លែង ដោយដាក់ថាបើអ្នកណាហ៊ានកាប់ព្រៃកោងកាងនឹងព្រៃលិចទឹក ត្រូវ ជាប់គុកពី៥ឆ្នាំទៅ១០ឆ្នាំ ក៌ប៉ុន្តែបើគេយកគ្រឿងចក្រមកឈូសឆាយដើមកោងកាងរាប់សឹបហិកតា មិនដែលឃើញលោក បរិស្ថានមកចាប់មនុស្សឬចាប់គ្រឿងចក្រនោះទេ ទុកអោយគេធ្វើតាមអំពើចិត្ត តែបើពលរដ្ឋក្រីក្រកាប់កូនឈើ បន្តិចបន្តួចយកមកជួសជុលផ្ទះ គឺខាងបរិស្ថានចាប់គ្មានអាសូរហើយ នេះជាការលើកឡើងរបស់ពលរដ្ឋ។
ចំណែកម្ចាស់ដីដែលបានទិញដីព្រៃកោងកាង ព្រៃលិចទឹកនោះមានឈ្មោះ ស្រុន សុខនីតា គាត់បានប្រាប់តាមទូរសព្ទ័ថា គាត់ទិញដីនេះ(៩ហិតាកន្លះ)មានមេភូមិ មេឃុំ បរិស្ថានស្រុកស្រែអំបិល ចៅហ្វាយស្រុក ភូមិបាលស្រុកស្រែអំបិល ជាអ្នកចុះហត្ថលេខាអោយគាត់ ទើបគាត់ហ៊ានធ្វើ។ ឈ្មោះ ស្រុន សុខនីតា បានបន្តទៀតថា គាត់ទិញដីនេះអស់លុយច្រើនណាស់អស់លុយទិញដីនេះជាង (១លានដូល្លា)គឹតទាំងទិញគ្រឿងចក្រ២គ្រឿងសំរាប់ឈូសឆាយដីព្រៃកោងកាងផង។
ម្ចាស់ដីបន្តថាគាត់ទិញដីនេះធ្វើចំការដាំ ធូរេន សាវម៉ាវ។ម្ចាស់ដីបន្តថា រឿងអីអ្នកសារព័ត៌មានហ៊ានទៅថតហើយសួរនាំនោះ គាត់ថាគាត់នឹងប្ដឹងទៅ តុលាការភ្នំពេញថាអ្នកសារព័ត៌មានមានសិទ្ធអី ក្រុមហ៊ុនគាត់ធំណាស់។
ចំណែក មេឃុំជ្រោយស្វាយឈ្មោះ ប៊ុន រេ ឲ្យដឹងថាគាត់អត់ដឹងទេពីព្រោះគាត់ទើបតែជាប់មេឃុំឡើងថ្មីទេ រឿងហ្នឹងលោកមិនបានដឹងទាំងអស់។
ប្រជាពលរដ្ឋរិះគន់ថា ការឃុបឃិតគ្នាស៊ីញ៉េលក់ដីព្រៃកោងកាងព្រៃលិចទឹកគឺជាអំពើខុសច្បាប់ មិនអាចលើកលែងបាន សំណូមពរសូមអោយលោកជំទាវ មិថុនា ភូថង អភិបាលខេត្តកោះកុងជួយចាត់វិធានការលើមន្រ្តីពុករលួយ និងទប់ស្កាត់ការកាប់បំផ្លាញនិងទន្រ្ទានយកដីព្រៃកោងកាងព្រៃលិចទឹកធ្វើជាកម្មសិទ្ធឯកជនផង។
មួយវិញទៀត សូមអោយឯកឧត្ដម សាយ សំអាល់ រដ្ឋមន្រ្តីក្រសួងបរិស្ថាន ដាក់កម្លាំងជំនាញចុះមកត្រួតពិនិត្យមើលព្រៃកោងកាងព្រៃលិចទឹកនៅស្រុកស្រែអំបិល ដែលគ្រប់គ្រងដោយក្រសួងបរិស្ថានជាបន្ទាន់ បើមិនអញ្ជឹងទេ ដីព្រៃកោងកាងព្រៃលិចទឹកនឹងត្រូវរលាយអស់ ដោយសារមន្រ្តីខិលខូចឃុបឃិតគ្នាវាស់ដីព្រៃលក់ឲ្យឈ្មួញ៕ដោយយួនឈីវ
