តាកែវ ៖ ក្នុងឱកាសថ្ងៃកាន់បិណ្ឌទី១៤ ឯកឧត្ដម ហ៊ីង ប៊ុនហៀង និងលោកជំទាវ និងគ្រួសារបានធ្វើពិធីបង្សុកូលរាប់បាតឧទ្ទិសកុសលជូនដល់បុព្វការីជន លោកអ្នកមានគុណ វីរៈជនអ្នកស្នេហាជាតិ ដែលបានចែកឋានទៅកាន់លោកខាងមុខ សូមឱ្យវិញ្ញាណក្ខ័ន្ធ អ្នកទាំងនោះទៅកាន់សុគតិភពកុំបីឃ្លៀងឃ្លាតឡើយ ហើយបែរងាកក្រោយឱ្យពរជយ័ចូលមានដល់គ្រប់ក្រុមគ្រួសារ ប្រជាជាតិខ្មែរបានសេចក្ដីសុខសុភមង្គល និងសូមឱ្យទេវតាឆ្នាំថ្មីជួយថែរក្សាការពារប្រទេសជាតិទទួលបាននូវសុខសន្តិភាព និងការអភិវឌ្ឍន៍ជារៀងរហូត។
ឯកឧត្ដម នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង នាយករងខុទ្ធកាល័យសម្ដេចតេជោ ហ៊ុន សែន បានថ្លែងថា ដោយសារប្រទេសជាតិមានសុខសន្តិភាព និងការអភិវឌ្ឍន៍ ទើបបានជាប្រជាពលរដ្ឋ មានឱកាសធ្វើដំណើរកំសាន្ត និងធ្វើបុណ្យទាននៅគ្រប់ទីកន្លែងបានទូទាំងប្រទេស។ឯកឧត្ដម កិត្តិបណ្ឌិត ហ៊ីង ប៊ុនហៀង បានលើកឡើងក្នុងពិធីសំណេះសំណាលជាមួយប្រជាពុទ្ធបរិស័ទ លោកយាយ លោកតា គណៈកម្មការអាចារ្យវត្តតុំ ស្ថិតនៅក្នុងក្រុងដូនកែវ ខេត្តតាកែវ ព្រឹកថ្ងៃទី១៩កញ្ញា ជាថ្ងៃកាន់បិណ្ឌទី១៤នៃរដូវភ្ជុំបិណ្ឌប្រពៃណីជាតិខ្មែរ។
ឯកឧត្ដមបានបន្តថា ដោយសារនយោបាយឈ្នះឈ្នះរបស់សម្តេចតេជោ ហ៊ុន សែន បានធ្វើឱ្យប្រទេសជាតិទាំងមូល ទទួលបាននូវសុខសន្តិភាពពេញបរិបូរណ៍ គ្របដណ្ដប់ពេញផ្ទៃប្រទេស ប្រជាពលរដ្ឋគ្រប់ៗរូបបានជ្រកក្រោមម្លប់សន្តិភាពយ៉ាងសុខសាន្ត បច្ចុប្បន្ននេះមានអ្នកវិនិយោគិនបរទេសធំៗមកបណ្ដាក់ទុនវិនិយោគជាច្រើននៅកម្ពុជា លើហេដ្ឋារចនាសម្ពន្ធ័សង្គម សំណង់អគារខ្ពស់ៗផ្លូវថ្នល់ ស្ពានអាកាសខ្វាត់ខ្វែងក្នុងក្រុងនៅតាមជនបទ មានភ្ញៀវទេសចរមកទស្សនាកម្ពុជាច្រើន ធ្វើឱ្យកំណើនសេដ្ឋកិច្ចកម្ពុជាកើនឡើងជាលំដាប់ពីមួយឆ្នាំទៅមួយឆ្នាំ ធ្វើឱ្យប្រជាពលរដ្ឋមានជីវភាពរស់នៅកាន់តែប្រសើរឡើង ។ ជាអំណោយផលល្អពីសន្តិភាព ប្រជាពលរដ្ឋ អាចធ្វើដំណើរកំសាន្តតាមរមណីយដ្ឋាននានា និងទៅធ្វើបុណ្យទានបានគ្រប់ទីកន្លែងពេញផ្ទៃប្រទេស ក្រោមការដឹកនាំដ៏ត្រឹមត្រូវនិងឈ្លាសវៃរបស់ប្រមុខរាជរដ្ឋាភិបាលកម្ពុជា ។
ឯកឧត្ដមបានគូសបញ្ជាក់ថា សមិទ្ធផលសន្តិភាពទទួលបានដោយលំបាក ត្រូវប្តូរអាយុជីវិតវីរៈជនជាច្រើនរូប សន្តិភាពមានតម្លៃពុំអាចកាត់ថ្លៃបានឡើយ សូមប្រជាពលរដ្ឋចូលរួមថែរក្សាសន្តិភាពនេះ អោយបានស្ថិតស្ថេរ គង់វង្ស និងប្រឆាំងដាច់ខាតចំពោះរាល់សកម្មភាពបំពានខុសច្បាប់ទាំងឡាយណាដែលមានបំណងមិនល្អ បំពុលបរិយាកាសសង្គម បដិវត្តន៍ពណ៌ឈានដល់ការបំផ្លាញសន្តិភាព ស្ថេរភាព និងសេចក្តីសុខសាន្តរបស់ប្រជាពលរដ្ឋនិងសង្គមជាតិ។
ឯកឧត្ដមនិងលោកជំទាវបានប្រគេនបច្ច័យ ទ័យទានព្រះសង្ឈនិមន្តមកពីប្រាំពីរវត្ត តាមគន្លងប្រពៃណីព្រះពុទ្ធសាសនា ក្នុង១វត្តៗមានអង្ករ២០០គីឡូក្រាម មី៤កេស ទឹកត្រី២យួរ ទឹកស៊ីអ៊ីវ២យួរ ត្រីខ១កេស ទឹកដោះគោ១កេស ប៊ីចេង២គីឡូក្រាម ទឹកសុទ្ធ១០កេស ទឹកក្រូច១០កេស និងបច្ច័យវត្តតុំ ១០លានរៀលនិងបច្ច័យវត្ត៦ទៀតក្នុង១វត្ត៥លានរៀល ៕
