កំពង់ធំ ៖ ហាងម៉ូតូមួយកន្លែង ជាផ្ទះល្វែង៣ជាន់ ត្រូវបានអគ្គីភ័យឆាបឆេះម៉ូតូអស់ ៤០គ្រឿង រួមទាំងសម្ភារៈ និងរបស់មានតំលៃមួយចំនួនទៀត ដែលសមត្ថកិច្ចមិនទាន់អាចសរុបនូវការខូចខាត ក្នុងករណីភ្លើងឆេះផ្ទះនេះបាននៅឡើយទេ។
នៅក្នុងហេតុការណ៍ភ្លើងនេះ គេឃើញវត្តមានលោកឧត្តមសេនីយ៍ត្រី អ៊ុក កុសល់ ស្នងការនគរបាលខេត្តកំពង់ធំ និងលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងលោក ម៉ាក់ ប៊ុនហុង អភិបាលក្រុងស្ទឹងសែន រួមទាំងកងកម្លាំងនគរបាល នៃស្នងការខេត្តកំពង់ធំ និងកងរាជអាវុធហត្ថខេត្ត រួមទាំងកម្លាំងកងយោធពលខេមរភូមិន្ទ និងអធិការក្រុងស្ទឹងសែន រួមទាំងប្រជាពលរដ្ឋ រាប់រយនាក់ ជួយគ្នាអន្តរាគមពន្លត់អគ្គីភ័យ ដែលអាចគ្រប់គ្រងភ្លើងបានទាំងស្រុងនៅវេលាម៉ោង៨.៣០នាទីយប់ ថ្ងៃទី ១៣ ខែ កញ្ញា ឆ្នាំ ២០១៧ ។
តាមសាក្សីនៅកន្លែងកើតហេតុបានបញ្ជាក់ថា ភ្លើងបានឆេះនៅវេលាម៉ោង៧.២០នាទី ក្បាលព្រលប់ ថ្ងៃទី១៣ ខែកញ្ញា ឆ្នាំ ២០១៧ ដោយម្ចាស់ផ្ទះឈ្មោះប៉ាង យឹមឈង ហៅ ឈីង អាយុ៥៥ឆ្នាំ ប្រពន្ឋឈ្មោះរុន មានមុខរបរលក់ម៉ូតូ និងគ្រឿងបន្លាស់ម៉ូតូជ ត្រូវបានភ្លើងឆេះរួមមាន ម៉ូតូ៤០គ្រឿង និងសម្ភារៈគ្រឿងបន្លាស់ ដោយខណៈនេះមិនទាន់អាចសរុបតំលៃនៃការខូចខាតបានទេ។
លោកឧត្តមសេនីយ៍ត្រី អ៊ុក កុសល់ ស្នងការនគរបាលខេត្តកំពង់ធំ បានបញ្ជាក់ថា មូលហេតុដែលបង្កឲ្យមានអគ្គីភ័យឆេះនេះ គឺតាមការពិនិត្យស្ថានភាពនិងយោងតាមការផ្តល់ព័ត៌មាន របស់ជនរងគ្រោះគឺ បណ្តាលមកពីទុសសេខ្សែភ្លើង សមត្ថកិច្ចបានប្រើកំលាំង80នាក់និងប្រជាពលរដ្ឋជាច្រើន ប្រើប្រាស់ឡានទឹក5គ្រឿង សូមបញ្ជាក់ផងដែរថា ក្នុងករណីអគ្គីភ័យនេះ ពុំបណ្តាលឲ្យមានមនុស្សគ្រោះថ្នាក់នោះទេ ៕
