កំពង់ធំ ៖ នៅល្ងាចថ្ងៃទី០៧ ខែកញ្ញា ឆ្នាំ២០១៧ ក្នុងសន្និសិទកាសែតនៅការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ធំ លោកឧត្តមសេនីយ៍ ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានថ្លែងថា ការជួញដូរមនុស្សឆ្លងដែនរបស់ជនសង្ស័យទាំងប្រាំនាក់គឺជាការជួញដូរមនុស្ស ដោយមានក្រុមចាត់តាំង ឬហៅថាករណីនាំមនុស្សចេញដោយមានគោលដៅ។
លោកឧត្តមសេនីយ៍ថ្លែងបញ្ជាក់បន្ថែមថា ជនសង្ស័យទាំងប្រាំនាក់ខាងលើមានឈ្មោះ៖
១. ឈ្មោះ រឹម សិទ្ធ ភេទប្រុស អាយុ២៦ឆ្នាំ រស់នៅភូមិក្រសាំង ឃុំសណ្តាន់ ស្រុកសណ្តាន់ ខេត្តកំពង់ធំ
២. ឈ្មោះ ឌិន ហុំ ភេទប្រុស អាយុ២៤ឆ្នាំ រស់នៅភូមិប្រាសាទអណ្តែត ឃុំសណ្តាន់ ស្រុកសណ្តាន់ ខេត្តកំពង់ធំ
៣. ឈ្មោះ រ័ត្ន សុវ៉ាន់ ភេទប្រុស អាយុ២៣ឆ្នាំ រស់នៅភូមិដង្ហិត ឃុំសណ្តាន់ ស្រុកសណ្តាន់ ខេត្តកំពង់ធំ
៤. ឈ្មោះ ជា ឡុក ភេទប្រុស អាយុ៤៣ឆ្នាំ រស់នៅភូមិដង្ហិត ឃុំសណ្តាន់ ស្រុកសណ្តាន់ ខេត្តកំពង់ធំ
៥. ឈ្មោះ មឿន ម៉ៅ ភេទស្រី អាយុ៣៥ រស់នៅភូមិពន្លឺព្រះផុស ឃុំកំពង់ក្តី ស្រុកជីក្រែង ខេត្តសៀមរាប។
លោកឧត្តមសេនីយ៍បញ្ជាក់ថា ក្នុងចំណោមជនសង្ស័យទាំងប្រាំនាក់ខាងលើ ឈ្មោះមឿន ម៉ៅ ភេទស្រី
គឺជាមេក្លោង ក្រៅពីជនសង្ស័យទាំងនេះនូវមានជនសង្ស័យចំនួនពីរនាក់ផ្សេងទៀត ដែលសមត្ថកិច្ច កំពុងតាមស៊ើបអង្តេត តាមដាន និងធ្វើការឃាត់ខ្លួន ហើយជនសង្ស័យទាំងនេះបានប្រើប្រាស់ មធ្យោបាយ លួងលោមដោយប្រាប់ថា ការងារដែលទៅធ្វើមានភាពងាយស្រួល បានប្រាក់ខែថ្លៃនិងអាចឡើងមកដើរ លេងកំសាន្តនៅពេលសម្រាកបាន មួយវិញទៀតដើម្បីឲ្យមានការទុកចិត្តនោះ ជនសង្ស័យបានឲ្យក្រុម គ្រួសារជនរងគ្រោះខ្ចីប្រាក់ចំនួន ២ ០០០ ០០០រៀលក្នុងមួយគ្រួសារទៀតផង។
លោកឧត្តមសេនីយ៍បន្ថែមទៀតថា ករណីជួញដូរកម្លាំងពលកម្មដែលជនជនស្ស័យធ្វើនេះតាមរូបភាពជូន ជនរងគ្រោះទៅធ្វើលិខិតឆ្លងដែន បន្ទាប់មកទៀតបញ្ជូនពីខេត្តកំពង់ធំទៅភ្នំពេញបន្តទៅឡែម ខេត្ត បៃលិន រហូតដល់ប្រទេសថៃ ដោយធ្វើការលក់ឲ្យឈ្មួញបរទេសដូចជាប្រទេសថៃ ម៉ាឡេស៊ីនិងឥណ្ឌូនេស៊ី។ ឈ្មួញទាំងនោះបានបង្ខំឲ្យពួកគាត់ធ្វើការច្រើនម៉ោង បង្ខាំងសិទ្ធិសេរីភាព មិនបើកប្រាក់ខែ ដោយបើកម្តងបានត្រឹមតែ១០០រីនគីត ប្រហែល៣០ដុល្លាប៉ុណ្ណោះ ដោយទ្រាំនិងការលំបាកទាំងនេះមិនបាន ជនរងគ្រោះបានរត់ចេញពីទូកនេសាទ ហើយកងកម្លាំងសមត្ថកិច្ចបានចាប់ខ្លួននិងធ្វើការសាកសួរ ព្រមទាំងទំនាក់ទំនងមកស្ថានទូតកម្ពុជា ហើយបានបញ្ជូនជនរងគ្រោះមកប្រទេសកម្ពុជាវិញ។
គួរបញ្ជាក់ថា ជនរងគ្រោះទាំងអស់មានចំនួន១៤នាក់៕
