ស្ទឹងត្រែង ៖ រថយន្តប្រភេទដឹកជញ្ជូន១គ្រឿង បានបន្លំដាក់ក្រដាស់ពីលើហើយបង្កប់ឈើប្រណិតជាច្រើនរយដុំ ដែលមានតម្លៃច្រើនម៉ឺនដុល្លារពីក្រោម បានរងការស្ទាក់ចាប់បានពីមេព្រៃខេត្តស្ទឹងត្រែង ខណៈដែលរថយន្តនេះបានដឹកឈើចេញពីស្រុកសៀមប៉ាង ឆ្លងកាត់ដែនសមត្ថកិច្ចជាច្រើនស្ថាប័ន ដែលមានស្នាក់ការនៅប្របនឹងដងផ្លូវ ជាពិសេសស្នាក់ការសង្កាត់រដ្ឋបាលព្រៃឈើដុងក្រឡ រួចឆ្លងកាត់ដែនដីក្រុងស្ទឹងត្រែង ក្នុងគោលដៅឆ្ពោះទៅកាន់ខេត្តក្រចេះ ប៉ុន្តែ ត្រូវបានជាប់អន្ទាក់រដ្ឋបាលព្រៃឈើអូរពងមាន់។ការបង្ក្រាបរថយន្តដឹកជញ្ជូន១គ្រឿងនោះ ធ្វើឡើងនៅម៉ោងប្រមាណជាង១០ព្រឹក ថ្ងៃអាទិត្យទី៣ កញ្ញា ឆ្នាំ២០១៧ នៅលើដងផ្លូវជាតិលេខ៧ ស្ថិតក្នុងសង្កាត់សាមគ្គី ក្រុងស្ទឹងត្រែង។
មន្ត្រីរដ្ឋបាលព្រៃឈើស្ទឹងត្រែងបានប្រាប់ឲ្យដឹងថា រថយន្តដែលស្ទាក់ចាប់បាននៅពេលនោះ គឺជាប្រភេទរថយន្តដឹកជញ្ជូនចំណុះ២តោនកន្លះ ក្បាលពណ៌ស ទ្រុងពណ៌ខៀវ ពាក់ស្លាកលេខ ភ្នំពេញ 3A-6870 រថយន្តនេះបានដាក់ក្រដាក់កាតុងពីលើ ហើយបង្កប់ឈើប្រណិតជាច្រើនរយដុំពីក្រោម ចេញពីស្រុកសៀមប៉ាង បើកចូលមកដីក្រុង ដោយឆ្លងកាត់ដែនសមត្ថកិច្ចនានាជាច្រើនស្ថាប័ន នាំឆ្ពោះទៅកាន់ខេត្តក្រចេះ នឹងអាចនាំចូលទៅប្រទេសវៀតណាម ។ ប៉ុន្តែរថយន្តដឹកឈើនេះត្រូវបានបង្ក្រាប និងស្ទាក់ចាប់បាន ដោយកម្លាំងរដ្ឋបាលព្រៃឈើ សង្កាត់អូរពងមាន់ បន្ទាប់ពីទទួលបានបញ្ជាពីខ័ណ្ឌរដ្ឋបាលព្រៃឈើខេត្តស្ទឹងត្រែងនោះមក ។
ឈើប្រណិតដែលដកហូតបាន ក្រោយការចាប់រថយន្ត១គ្រឿងនេះ មានពីរប្រភេទ គឺប្រភេទឈើធ្នង់ និងឈើនាងនួន មានចំនួន៤៣១ដុំ ឈើនេះមានតម្លៃច្រើនម៉ឺនដុល្លារ ហើយនៅលើដុំឈើនិមួយៗមានសរសេរអក្សរ « PK » សំរាប់កំណត់ចំណាំឈ្មោះម្ចាស់ឈើ ដឹកជញ្ជូនយកទៅធ្វើជំនួញឆ្លងខេត្តនិងឆ្លងប្រទេស។ ក្រោយការបង្ក្រាប រថយន្តដឹកក្រដាស់លួចបង្កប់ឈើប្រណិតនោះ ត្រូវបាននាំយកមកស្នាក់ការខ័ណ្ឌរដ្ឋបាលព្រៃឈើខេត្តស្ទឹងត្រែង ដើម្បីចងក្រងសំណុំឯកសារ ចាត់ការតាមច្បាប់ ៕
