កោះកុង ៖នៅរសៀលថ្ងៃទី០៤ ខែកញ្ញា ឆ្នាំ២០១៧ នៅសាលាស្រុកស្រែអំបិល ខេត្តកោះកុង មានប្រជាពលរដ្ឋចំនួន១៥០នាក់ មាន០៤ឃុំ១ឃុំកណ្ដោល ក្នុងស្រុកបូទុមសាគរ ២ឃុំជីខលើ ៣ឃុំជីខក្រោម ៤ឃុំដងពែង ៣ឃុំនេះស្ថិតក្នុងស្រុកស្រែអំបិល ខេត្តកោះកុង មានជំនឿទុកចិត្តចំពោះថ្នាក់ដឹកនាំ ក្រុមការងារអន្គរក្រសួង ចុះមកដោះស្រា វិវាទដីធ្លី មិនអោយពួកគាត់អស់សង្ឃឹមទេ រួមមាន(១) ក្រសួងរៀបចំដែនដីនគរូបនីយកម្មនឹងសំណង់(២)ក្រសួងពាណិជ្ជកម្ម(៣)ក្រសួងកសិកម្មរុក្ខាប្រមាញ់នឹងនេសាទ(៤)ក្រសួងបរិស្ថានដឹកនាំដោយឯកឧត្ដម ទេព ធន ប្រធានគណៈកម្មការក្រុមការងារថ្នាក់ទី០៨ ដោះស្រាយវិវាទដីធ្លី បានចុះមកស្រង់ទិន្នន័យដីរបស់ប្រជាពលរដ្ឋ ដែលធ្លាប់ប្រើប្រាស់ដីតាំងពីមុនមក ហើយទទួលរងផលប៉ះពាល់ជាមួយក្រុមហ៊ុនស្កអំពៅរបស់ថៃ។
ប្រជាពលរដ្ឋចំនួន១៤៧គ្រួសារ តំណាងដោយលោកស្រី ផាវ ញ៉ើង ដែលធ្លាប់បានឡើងទៅតវ៉ាយ៉ាងស្វិតស្វាញនៅទីស្ដីការក្រសួងរៀបចំដែនដី ស្នើសុំដំណោះស្រាយ។លោកស្រី ផាវ ញ៉ើង បានសំដែងនូវក្ដីរំភើបរីករាយ សប្បាយចិត្តយ៉ាងខ្លាំង នឹងមានជំនឿថាបញ្ហារបស់ពួកគាត់នឹងត្រូវបានដោះស្រាយ ពីព្រោះឯកឧត្ដម ជា សុផារ៉ា រដ្ឋមន្រ្តីក្រសួងរៀបចំដែនដីបានសន្យាថា នឹងស្រង់ទិន្នន័យចុះបញ្ជីក្បាលដីជូនប្រជាពលរដ្ឋដែលរងផលប៉ះពាល់ជាយូរមកហើយនោះនឹងធ្វើអោយរួចរាល់ក្នុងកំឡុងពេល ពីថ្ងៃទី០៤ ខែកញ្ញា ដល់ថ្ងៃទី០៤ ខែតុលា ឆ្នាំ២០១៧។លោកស្រី ផាវ ញ៉ើង ជឿជាក់និងឃើញថា ក្រុមការងារអន្គរក្រសួងខិតខំ ដុតដៃដុតជើងបំពេញការងារនេះយ៉ាងស្វិតស្វាញណាស់ ប៉ុន្តែទទួលបានលទ្ធផលយ៉ាងណានោះ លោកស្រីមិនទាន់ហ៊ានអះអាងនៅឡើយ។
ចំណែឯកឧត្ដម ទេព ធន បាននិយាយប្រាប់ប្រជាពលរដ្ឋថា លោកនឹងនៅធ្វើការងារនេះ មួយអាទិត្យនៅជាប់ជាមួយពលរដ្ឋ ហើយឯកឧត្តមបន្តថា លោកខិតខំអោយអស់ពីកម្លាំងកាយចិត្ត ដើម្បីពួកគាត់ ហើយនឹងធ្វើការងារនេះ រយៈពេលមួយខែ។
ប្រជាពលរដ្ឋអរគុណណាស់ចំពោះប្រមុខថ្នាក់ដឹកនាំដែលបានគឹតគូរដល់ពួកគាត់ ហើយអរគុណឯកឧត្តម ទេព ធន ដែលបានខិតខំធ្វើការងារនេះ។
គួរំលឹកថា អន្គរក្រសួងទាំង០៤ក្រសួងដែលមាន ឯកឧត្តម ជា សុផារ៉ា រដ្ឋមន្រ្តីក្រសួងរៀបចំដែនដី ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ឯកឧត្ដម វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់នឹងនេសាទ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានបើកកិច្ចប្រជុំស្ដីពីដំណោះស្រាយបញ្ហាពាក់ព័ន្ធនឹងដី សម្បទានសេដ្ឋកិច្ចដំណាំអំពៅផលិតស្ករសនាំចេញ កាលពីថ្ងៃទី៣០ ខែសីហា ឆ្នាំ២០១៧ នឹងសម្រេចដាក់ចេញជារបៀបវារៈដោះស្រាយមាន០៤ចំណុច បន្ទាប់ពីមានការតវ៉ារបស់ប្រជាពលរដ្ឋ នៅមុខទីស្ដីការក្រសួងរៀបចំដែនដីនគរូបនីយកម្មនឹងសំណង់ នៅរាជធានីភ្នំពេញកន្លងមក៕(ដោយយួនឈីវ)
