អន្តរជាតិ ៖ គ្រួសារត្រកូលស៊ីណាវ៉ាត្រា នៅតែមានមនុស្សដែលអាចបន្តចូលរួមនៅក្នុងឆាកនយោបាយ ដើម្បីបន្ត របត់នយោបាយរបស់ត្រកូលស៊ីណាវ៉ាត្រា ដែលមានឥទ្ធិពលបំផុត នៅក្នុងឆាកនយោបាយថៃ។ក្រុមអ្នកសង្កេតការ និងប្រភពព័ត៌មានជាច្រើនបានលើកឡើងថា សមាជិកនៅក្នុងគ្រួរសារត្រកូលស៊ីណាវ៉ាត្រាទាំងអស់ ដែលចង់ចូលរួមក្នុងឆាកនយោបាយ គឺចាំបាច់ត្រូវតែមានការឯកភាពពីលោកថាក់ស៊ីនស៊ីណាវ៉ាត្រា ដែលជារៀមច្បងកំពុងរស់នៅក្រៅប្រទេស ជាបុគ្គលមានឥទ្ធិពលបំផុតក្នុងឆាកនយោបាយថៃ ។ តាមការលើកឡើងរបស់អ្នកឯកទេស លោកថាក់ស៊ីន អាចនឹងបណ្តុះបណ្តាលឲ្យកូនប្រុសឬក៏ប្អូនស្រីរបស់លោកបន្ថែមទៀត ក្រៅពីលោកស្រីយីងឡាក់ ដើម្បីឲ្យក្លាយជាអ្នកនយោបាយឆ្នើមនៅក្នុងត្រកូលស៊ីណាវ៉ាត្រា។
បច្ចុប្បន្ន លោកថាក់ស៊ីនមានកូនប្រុសម្នាក់ឈ្មោះ Panthongtae Shinawatra អាយុ៣៧ឆ្នាំ កើតនៅអាមេរិក ជាកូនប្រុសតែមួយគត់របស់លោកថាក់ស៊ីន ។ តាំងពីដើមមក លោកថាក់ស៊ីន មានបំណងចង់ឲ្យកូនចូលក្នុងឆាកនយោបាយ ដោយមិនឲ្យកូនគ្រប់គ្រងក្រុមហ៊ុនណាមួយនោះឡើយរបស់ត្រកូលស៊ីណាវ៉ាត្រា ។ ផ្ទុយទៅវិញ លោកបែជាឲ្យកូនទទួលបន្ទុកប្រព័ន្ធផ្សព្វផ្សាយកិច្ចការបរទេស របស់អង្គការសង្គម និងក្រុមនយោបាយដូចជាគណបក្សភឿថៃជាដើម ។ មិនតែប៉ុណ្ណោះ លោក Panthongtae Shinawatra ក៏បានគ្រប់គ្រងបណ្តាញទូរទស្សន៍ Voice TV ដែលរដ្ឋាភិបាលបច្ចុប្បន្នចាត់ទុកថា ជាទីតាំងបង្ករឲ្យមានអសន្តិសុខ ។ បើទោះបីពលរដ្ឋ បានបង្ហាញពីទំនុកចិត្ត ទៅលើការដឹកនាំបន្តវេនរបស់កូនប្រុសលោកថាក់ស៊ីន ប៉ុន្តែមកទល់ពេលនេះ លោក Panthongtae Shinawatra មិនទាន់បង្ហាញពីឆន្ទៈនយោបាយរបស់ខ្លួននៅឡើយ។
នៅពេលនេះ លោកថាក់ស៊ីនអាចសម្តៅទៅលើប្អូនស្រីបន្ទាប់របស់ខ្លួន។ កាលពីខែកក្កដាកន្លងមក មានព័ត៌មានបែកធ្លាយថា លោកស្រី Monthathip Kovitcharoenkul មានរហ័សនាមថា Yaowaman Shinawatra នឹងបានកាន់តំណែងជាប្រធានគណបក្ស ភឿថៃ ដើម្បីឆ្ពោះទៅរកការបោះឆ្នោត នាយករដ្ឋមន្ត្រីនៅឆ្នាំ២០១៨។ ប៉ុន្តែ ផ្ទាល់ខ្លួនលោកស្រី Monthathip Kovitcharoenkul ធ្លាប់បានប្រកាសជាច្រើនលើកមកថា លោកស្រីនិងមិនចូលរួមក្នុងឆាកនយោបាយឡើយ ហើយលោកស្រីនិងមិនចូលរួមប្រកួតប្រជែងនៅក្នុងការបោះឆ្នោត ដូចពាក្យចចាមអារាមនោះឡើយ បច្ចុប្បន្នលោកស្រី ធ្វើមុខជំនួញនៅក្នុងវិស័យទូរគមនាគមន៍ ។
តាមអ្នកឯកទេស បុគ្គលដែលលេចធ្លោជាងគេបំផុត នៅក្នុងត្រកូលស៊ីណាវ៉ាត្រា នឹងជាការចាប់អារម្មបំផុតរបស់លោកថាក់ស៊ីន សម្រាប់បន្តនយោបាយរបស់ត្រកូលស៊ីណាវ៉ាត្រា គឺ ប្អូនស្រីឈ្មោះ Yaowapha ភរិយារបស់អតីតនាយករដ្ឋមន្ត្រី Somchai Wongsawat ។ លោកស្រីមានអាយុ៦២ឆ្នាំត្រូវបានគេវាយតម្លៃថា ជាអ្នកនយោបាយពិតប្រាកដ ដោយលោកស្រីមានទស្សនៈនយោបាយមិនចាញ់បងប្រុស ថាក់ស៊ីន នោះឡើយ ។លោកស្រីធ្លាប់កាន់តំណែងជាតំណាងរាស្ត្រ នៅក្នុងទីក្រុង ឆៀងម៉ៃ។ ប្រភពព័ត៌មានបានឲ្យដឹង ប្រសិនបើលោកស្រីមិនត្រូវបានហាមប្រាមឲ្យប្រឡូកនៅក្នុងឆាកនយោបាយ កាលពីឆ្នាំ២០០៨នោះ លោកស្រីនិងក្លាយជានាយករដ្ឋមន្ត្រីទី២៨នៅក្នុងប្រទេសថៃ មិនមែនលោកស្រីយីងឡាក់នោះឡើយ។ នៅពេលនោះ លោកស្រីត្រូវបានហាមប្រាមចូលរួមនៅក្នុងឆាកនយោបាយរយៈពេល៥ឆ្នាំ ។ ក្រោយបញ្ចប់ការហាមប្រាម លោកស្រីបានបន្ត ចូលរួមបោះឆ្នោតតំណាងរាស្ត្រ ហើយបន្តទទួលបានជ័យជំនៈនៅក្នុងក្រុងឈៀងមៃ ជាបន្តទៀតនៅឆ្នាំ២០១៣។ កន្លងមក លោកស្រីមិនបានចូលរួមនៅក្នុងគណរដ្ឋមន្ត្រី ដឹកនាំរបស់បងប្រុសថាក់ស៊ីន ក៏ដូចជារដ្ឋាភិបាលរបស់ប្អូនស្រីយីងឡាក់នោះឡើយ ។ប៉ុន្តែ លោកស្រី Yaowapha មានឥទ្ធិពលយ៉ាងខ្លាំងនៅក្នុងគណបក្សភឿថៃ។ មិនត្រឹមតែប៉ុណ្ណោះ មានព័ត៌មានថាលោកស្រី Yaowapha គឺជាអ្នកដឹកនាំប្រទេសនៅពីក្រោយរដ្ឋាភិបាលរបស់លោកស្រីយីងឡាក់។
លោកថាក់ស៊ីន ពិតជាមានការគិតគូរយ៉ាងល្អិតល្អន់ក្នុងនយោបាយ លោកមិនអោយត្រកូលស៊ីណាវាត្រា ត្រូវ បាត់បង់នោះឡើយ ។ ជាកស្តែង ពេលលោកថាក់ស៊ីនដឹកនាំប្រទេស លោកមិនឲ្យប្អូនៗរបស់លោក កាន់តំណែងក្នុងឆាកនយោបាយឡើយ ខ្លាចត្រូវក្រុមអភិជននិយម ផ្តួលរំលំម្តង គឺផុតពូជ ។ នៅពេលនេះលោកបញ្ចេញ ម្តងម្នាក់ៗ នៅក្នុងការដឹកនាំប្រទេសថៃបន្តពីលោក ។ លោកថាក់ស៊ីន បានកសាង កេរ្ត៍ឈ្មោះទុកមកឲ្យប្អូនៗ មិនថាប្អូនថ្លៃឬប្អូនបង្កើតនោះឡើយ ឲ្យតែឈរឈ្មោះបោះឆ្នោតដោយយុត្តិធម៌និង ទទួលបាន ការគាំទ្រយ៉ាងខ្លាំងពីពលរដ្ឋថៃ ដូចជាការបោះឆ្នោតរបស់អតីតនាយករដ្ឋមន្ត្រី យីងឡាក់ ជាដើម។
ការចាកចេញរបស់លោកស្រីយីងឡាក់ គឺជាការបញ្ចប់ វគ្គទី២ តែមិនមែនការបញ្ចប់ ការដឹកនាំប្រទេសរបស់ត្រកូលស៊ីណាវ៉ាត្រានោះឡើយ ។ មិនខុសពី វគ្គទីមួយ នោះឡើយការចាកចេញរបស់លោកថាក់ស៊ីន បន្យល់នៅការគាំទ្រពីពលរដ្ឋជាច្រើន ទុកសម្រាប់ប្អូនស្រី ។ មិនតែប៉ុណ្ណោះ ការចាកចេញនោះដើម្បីឲ្យក្រុមនយោបាយមកពីក្រុមអភិជននិយម ធ្វើឲ្យអស់ពីសមត្ថភាព ក្នុងការកែទម្រង់ នយោបាយដឹកនាំប្រទេស ហើយនៅពេលដែលមានការបោះឆ្នោតជាថ្មីនោះ ត្រកូលស៊ីណាវ៉ាត្រានិងចេញមុខទៀតជាមិនខាន។
ជំរើសរបស់លោកស្រី យីងឡាក់ គឺមិនចង់ឲ្យពលរដ្ឋគាំទ្រខ្លួន ប្រឈមនិងបញ្ហាសន្តិសុខឡើយ បើលោកស្រីមិនចាញចេញពីប្រទេសនោះ អាចត្រូវជាប់គុក ហើយអ្នកគាំទ្ររាប់សែន រាប់លាននាក់ នឹងមិននៅស្ងៀមទុកឲ្យលោកស្រីជាប់គុកឡើយ គឺត្រូវតែមានបាតុកម្មប្រឆាំង ទាមទារដោះលែងលោកស្រី។ទាំងនោះហើយធ្វើឲ្យស្ថានភាពនយោបាយកាន់តែស្មុគស្មាញមិនអាចឈានទៅរកការបោះឆ្នោតបានឆាប់នោះឡើយ៕(ដកស្រង់)
