ខេត្តក្រចេះ ៖ ដោយសារជារដូវវស្សា ទើបបណ្តាលឲ្យរណ្តៅរ៉ែមាសប្រឈមនិងគ្រោះថ្នាក់ តាមពត័មានបថមបានឲ្យដឹងថា មានករណីគ្រោះថ្នាក់បាក់រណ្ដៅជីករ៉ែមាសមួយកន្លែង ស្ថិតនៅចំណុចត្រូន ក្នុងឃុំក្បាលដំរី ស្រុកសំបូរ ខេត្តក្រចេះ បណ្តាលឲ្យស្លាប់៣នាក់ទៀតហើយ ហើយរហូតមកដល់វេលាម៉ោង០២៖៣០នាទីរសៀល ថ្ងៃទី០១ ខែកញ្ញា ឆ្នាំ២០១៧នេះ សពជនរងគ្រោះទាំង៣នាក់ មិនទាន់ត្រូវបានយកចេញពីអណ្ដូងរ៉ែ ដែលមានជម្រៅរហូតដល់២៥ម៉ែត្រនៅឡើយទេ ។
តាមមន្ត្រីនគរបាលបញ្ជាក់ថា ជនរងគ្រោះទី១ ឈ្មោះ នួន ចាន់រ៉ា អាយុ៥០ឆ្នាំ ជាថៅកែ រស់នៅភូមិតាកុត ឃុំសំបុក ស្រុកចិត្របុរី ទី២ ឈ្មោះ ជិន ធារ៉ា អាយុ២៥ឆ្នាំ រស់នៅភូមិស្ទឹងស្វាយ ឃុំដារ ស្រុកចិត្របុរី ជាកូនចៅ និងទី៣ ឈ្មោះ រាជ សាកា អាយុ២១ឆ្នាំ រស់នៅភូមិតាកុត ។ តាមព័ត៌មានទទួលបានថាជនរងគ្រោះទាំង៣នាក់បានចុះទៅក្នុងរណ្ដៅរ៉ែបណ្ដាលឲ្យបាក់ដីសង្កត់ ស្លាប់ទាំង៣នាក់តែម្ដង គួរឲ្យអាសូរ ៕
