កោះកុង ៖ នារសៀលថ្ងៃទី៣១ ខែសីហា ឆ្នាំ២០១៧ នៅសាលប្រជុំកាកបាទក្រហមកម្ពុជាខេត្តកោះកុង បានរៀបចំពិធីប្រកាសផ្ទេរតំណែង និងតែងតាំងលោក មុំ ម៉ាលីកា ជាប្រធានមន្ទីរព័ត៌មានថ្មីខេត្តកោះកុង ជំនួសលោក កែវ សេដ្ឋា ប្រធានចាស់ដែលត្រូវចូលនិវត្តន៏ ក្រោមអធិបតីភាពដ៏ខ្ពង់ខ្ពស់របស់ឯកឩត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងមានការអញ្ជើញចូលរួមពីសំណាក់ ឯកឩត្តម លោកជំទាវ លោក លោកស្រី ប្រធាន អនុប្រធានអង្គភាពនានាជុំវិញខេត្ត ប្រធានតុលាការ ព្រះរាជអាជ្ញា សមាជិកសហភាពសហព័ន្ធយុវជនកម្ពុជាសរុបចំនួន១២០នាក់ ។
លោក ផៃធូន ផ្លាមកេសន អភិបាលខេត្តស្តីទីក៏បានថ្លែងកោតសរសើរចំពោះលោក កែវ សេដ្ឋា អតីតប្រធានចាស់ដែលកន្លងមកលោកបានដឹកនាំការងារយ៉ាងល្អ និងមានការអធ្យាស្រ័យសាមគ្គីភាពល្អក្នុងជួរថ្នាក់ដឹកនាំមន្ទីរ ក៏ដូចជាមន្ត្រីក្រោមឱវ៉ាទ និងប្រជាពលរដ្ឋទូទៅបានយ៉ាងល្អប្រសើរ ជាមួយគ្នានេះដែរ លោកក៏បានខិតខំអនុវត្តន៏ការងារប្រកបដោយជោគជ័យ ដែលធ្វើអោយមានការជឿទុកចិត្តពីសំណាក់ពលរដ្ឋ ដ៏ដូចជាស្ថាប័នអង្គភាពនានា ដែលមកទទួលសេវាប្រកបដោយប្រសិទ្ធិភាពខ្ពស់។ ក្រសួងព័ត៌មានបានតែងតាំងលោក កែវ សេដ្ឋា ជាទីប្រឹក្សាក្រសួងព័ត៌មាន ទទួលបន្ទុកខេត្តកោះកុងផងដែរ ។
ជាមួយគ្នាដែរលោក មុំ ម៉ាលីកា ប្រធានមន្ទីរព័ត៌មានថ្មីខេត្តកោះកុងក៏បានឡើងប្តេជ្ញាចិត្តខិតខំយកអស់លទ្ធភាពប្រកបដោយស្មារតីទទួលខុសត្រូវដឹកនាំគ្រប់វិស័យព័ត៌មាននិងសោតទស្សន៏ អោយមានការរីកចំរើនត្រឹមត្រូវតាមគោលការណែនាំរបស់ក្រសួងព័ត៌មាននិងរដ្ឋបាលខេត្ត សហការល្អជាមួយសាលាខេត្តនិងអង្គភាពនានាជុំវិញខេត្ត អាជ្ញាធរមូលដ្ឋាន និងអ្នកសារព័ត៌មាន យកចិត្តទុកដាក់ក្នុងការថែរក្សានិងពង្រឹងសាមគ្គីភាពផ្ទៃក្នុងអង្គភាពអោយបានរឹងមាំ ខិតខំរួមចំណែកក្នុងការអភិវឌ្ឍន៏ខេត្ត និងខិតខំស្រាវជ្រាវបន្ថែមនូវច្បាប់លិខិតបទដ្ឋាននានា ដើម្បីបង្កើនសមត្ថភាពការងារ និងពង្រឹងសមត្ថភាពក្នុងការដឹកនាំអង្គភាពប្រកបដោយប្រសិទ្ធិភាព ។
ឯកឩត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានក៏បាន ផ្តាំផ្ញើដល់ប្រធានមន្ទីរថ្មី អោយដឹកនាំអង្គភាពដោយភាពស្មោះត្រង់ ខិតខំពង្រឹងសាមគ្គីភាពផ្ទៃក្នុងរបស់អង្គភាព និងខិតខំស្រាវជ្រាវទទួលយកព័ត៌មានពីមជ្ឍដ្ឋាននានាជុំវិញខ្លួន ពិសេសផ្សព្វផ្សាយព័ត៌មានដោយភាពសុក្រិត្យ កុំបំភាន់ព័ត៌មានពីសទៅខ្មៅ ពីខ្មៅទៅស ត្រូវធ្វើការផ្សព្វផ្សាយតែទៅលើព័ត៌មានពិតៗ ៕(ដោយយួន ឈីវ)
