ខេត្តស្ទឹងត្រែង៖ កាលពីម៉ោង១និង៤០នាទី រំលងអាធ្រាត្រ ថ្ងៃ២៨ សីហា ២០១៧ នៅលើកំណាត់ផ្លូវជាតិលេខ៧ ត្រង់ចំណុងជិតចំការមៃសាក់ត្រង់ផ្លូវបំបែកជាពីរ ចូលមកក្រុងស្ទឹងត្រែង ស្ថិតនៅក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង មានរថយន្តស៊េរីទំនើបមួយគ្រឿង បានបើកទៅបុករថយន្តកូរ៉េដែលបើកពីមុខ ទាំងកណ្តាលអាធ្រាត្រស្ងប់ស្ងាត់ បានបណ្តាលឲ្យរថយន្តទាំងពីរគ្រឿងនោះ ក្រឡាប់ធ្លាក់ទៅម្ខាងនៃទ្រូងផ្លូវ ខ្ជាក់ចេញឈើប្រណិតនិងអុស ប៉ុន្តែមិនមានមនុស្សណាម្នាក់រងគ្រោះថ្នាក់នោះទេ ឯអ្នកបើកបររថយន្តទាំងពីរ បានគេចខ្លួនចេញពីទីកើតហេតុនោះបាត់ស្រមោលភ្លាមៗដែរ។
ប្រភពពីអ្នកបើករថយន្តតាស៊ីម្នាក់ដែលបានឃើញហេតុការណ៍គ្រោះថ្នាក់នោះនិយាយថា គេបានឃើញរថយន្តម៉ាកហ្វ៉ត១គ្រឿង បើកបរក្នុងល្បឿនយ៉ាងលឿន បានបើកជែងរថយន្តសាំយ៉ុងដឹកអ្នកដំណើររបស់គាត់ទៅមុនបាត់។ លោកថា ពេលមកដល់ទីកើតហេតុនោះ លោកបានឃើញរថយន្តម៉ាកហ្វ៉តនោះ បានបើកបុករថយន្តប្រភេទកូរ៉េចំណុះ២តោនកន្លះ ដែលមានដឹកអុសពេញផងនោះពីក្រោយពេញទំហ៊ឹង ក្នុងទិសដៅស្របគ្នាពីជើងទៅត្បូង គឺចេញពីខេត្តស្ទឹងត្រែង ឆ្ពោះទៅកាន់ខេត្តក្រចេះ បានបណ្តាលឲ្យរថយន្តទាំងពីរគ្រឿងនោះ រេចង្កូតក្រឡាប់ផ្ងាជើងធ្លាក់ទៅម្ខាងនៃទ្រូងផ្លូវ ខ្ជាក់ចេញសុទ្ធតែជាឈើប្រណិត លាយជាមួយកូនក្រឡឹង និងអុស ។
មន្ត្រីនគរបាលដែលចុះទៅពិនិត្យទីកើតហេតុនោះបាននិយាយថា ក្រោយការពិនិត្យនិងវាស់វែងនោះរួច ឃើញថា រថយន្តហ្វតរ៉ែងជើ ពុំមានពាក់ស្លាកលេខនោះទេ បានរងការខូចខាតយ៉ាងដំណំ ចំណែក រថយន្តប្រភេទកូរ៉េ២តោនកន្លះ ក៏គ្មានស្លាកលេខនោះដែរ ដោយមានក្បាលពណ៌ស និងទ្រុងពណ៌ខៀវ បានក្រឡាប់ធ្លាយចេញឈើប្រណិត ឈើកូនក្រឡឹង និងឈើអុសជាច្រើន។ ក្រោយហេតុការណ៍នោះ សមត្ថកិច្ចបាននាំយករថយន្តទាំងពីរគ្រឿង ទៅរក្សាទុកនូវស្នងការនគរបាលខេត្ត ចំណែក ឈើបានប្រគល់ទៅឲ្យរដ្ឋបាលព្រៃឈើខេត្ត ចាត់ការជាបន្តតាមច្បាប់៕
