បាត់ដំបង ៖ នៅព្រឹកថ្ងៃទី២៤ ខែសីហា ឆ្នាំ២០១៧ លោកកុយ ហៀង ស្នងការរងទទួលផែនប្រឆាំងបទល្មើស បានទទួលបទបញ្ជារបស់ឯកឧត្តម ស ថេត ស្នងការនគរបាលខេត្ត និងលោក នួន សាន ព្រះរាជ្ញាអមសាលាដំបូងខេត្តបាត់ដំបង ដឹកនាំកម្លាំងនគរបាលស្រុកឯកភ្នំនិងស្រុកសង្កែ ចុះបង្ក្រាបបទល្មើសនេសាទខុសច្បាប់ ក្នុងរដូវត្រីពងកូន ។
លោកវរសេនីយ៍ឯក កុយ ហៀង ស្នងការរងទទួលផែនប្រឆាំងបទល្មើស បានដឹកនាំភារកិច្ច មានកម្លាំងនគរបាល ការិយាល័យអន្តរាគមន៍ ការិយាល័យសេដ្ឋកិច្ច អធិការដ្ឋាននគរបាលស្រុកឯកភ្នំ អធិការដ្ឋាននគរបាលស្រុកសង្កែ បានចុះប្រតិបត្តិការ បង្ក្រាបបទល្មើសនេសាទខុស ច្បាប់ ក្នុងទឹកដីភូមិសាស្ត្រ ស្រុកចំនួន៣ ជាប់ព្រំប្រទល់គ្នាមាន៖ស្រុកឯកភ្នំ ស្រុកសង្កែ ស្រុកមោងឫស្សី មាន១០គោលដៅ ៖ .បឹងព្រះគន្លង.បឹងវែង.បឹងកក់.បឹងខ្មៅមុខ.បែកផ្លាង.បឹងវាលត្រសក់.បឹងអាសោធ.បឹងអូរដែកជាស.បឹងសំនិត.បឹងពៀមសោត។
ក្នុងកិច្ចប្រតិបត្តិការនោះត្រូវបានប្រើប្រាស់កម្លាំងនគរបាល៨១និងកម្លាំងប្រជាជនចំនួន៤០នាក់មានឧបករណ៍កាំបិតចំនួន៣៥ដើមនិងកណ្តៀវចំនួន៤៥ដើម ទូកម៉ាស៊ីនចំនួន២៣គ្រឿង។
ជាលទ្ធផលសរុបយើងបង្ក្រាបបាន រួមមាន សាច់មងប្រវែង ១០៥៥៥ម៉ែត្រ បង្គោលចំនួន៦០១៦ដើមជំរកស្នាក់នៅចំនួន១៦កន្លែងនិងបានរំដោះកូនត្រីចំរុះ១១០០គីឡូក្រាមធ្វើការលែងនៅនិងកន្លែង។
យោងតាម របាយការណ៍ លោកវរសេនីយ៍ឯក កុយ ហៀងស្នងការរងបានលើកឡើងថាក្រោយពីកម្លាំងនគរបាល ធ្វើការបង្ក្រាបបាន សម្ភារៈមួយចំនួន មានសាច់មង ១០៥៥៥ម៉ែត្របង្គោលឈើ៦០១៦ដើមជំរកស្នាក់នៅ១៦កន្លែង ត្រូវបានកម្លាំងនគរបាល ធ្វើការដុតបំផ្លាញចោលនៅនិងកន្លែង ៕
