កំពង់ធំ ៖ ដោយមានការចង្អុលបង្ហាញពីឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូន ដើម្បីលើកកម្ពស់ក្នុងការស់នៅរបស់ប្រជាពលរដ្ឋឲ្យមានសុខដុមរមនា និងកាត់បន្ថយការគ្រោះថ្នាក់ចរាចរណ៍ថ្ងៃទី២៥ ខែសីហា ឆ្នាំ២០១៧ នាយកដ្ឋានចរាចរណ៍ផ្លូវគោកនៃក្រសួងសាធារណៈការនិងដឹកជញ្ជូន បានសហការណ៍ជាមួយមន្ទីរ សាធារណៈការនិងដឹកជញ្ជូនខេត្តកំពង់ធំ ដែលដឹកនាំដោយលោកស្រី ម៉ែន ច័ន្ទសុកុល និងលោក អេង រស់ អនុប្រធានមន្ទីរស្នងការដ្ឋាននគរបាលខេត្តកំពង់ធំ ដោយមានការចូលរួមក្នុងយុទ្ធនាការមាន នាយកដ្ឋានសុវត្ថិភាពចរាចរណ៍ផ្លូវគោក អគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក សសយក ក្នុងវិស័យសាធារណការនិងដឹកជញ្ជូន សាលាខេត្តកំពង់ធំ មន្ទីរសាធារណការ និងដឹកជញ្ជូនខេត្តកំពង់ធំ ស្នងការដ្ឋាននគរបាលខេត្តកំពង់ធំ សរុបចំនួន ១៥នាក់។
លោក អេង រស់ អនុប្រធានមន្ទីរសាធារណៈការនិងដឹកជញ្ជូនខេត្តកំពង់ធំបានលើកឡើងថា យុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក មានគោលបំណងគឺ ដើម្បីពញ្ញាក់ស្មារតីអ្នកប្រើប្រាស់ផ្លូវគ្រប់រូបឱ្យចូលរួមគោរពច្បាប់ស្តីពីចរាចរណ៍ផ្លូវគោក បើកបរទោចក្រយានយន្តត្រូវពាក់មួកសុវត្ថិភាពឱ្យបានត្រឹមត្រូវ អ្នកបើកបររថយន្តត្រូវពាក់ខ្សែក្រវាត់សុវត្ថិភាពឱ្យបានត្រឹមត្រូវ បើពិសាគ្រឿងស្រវឹងកុំបើកបរ ការពារជីវិតអ្នក កុំបើកបរហួសល្បឿនកំណត់ មិនត្រូវបើកបរស្ថិតក្នុងស្ថានភាពងងុយដេក ពេលបើកបរត្រូវប្រកាន់ស្តាំជានិច្ច ត្រូវមានការត្រួតពិនិត្យយានយន្តរបស់ខ្លួនជាប់ជាប្រចាំ និងប្រុងប្រយ័ត្នជានិច្ចដើម្បីទប់ស្កាត់កាត់បន្ថយគ្រោះថ្នាក់ផ្លូវគោក ឱ្យថយចុះមកនៅកម្រិតទាបបំផុត។
លោកបានបន្តថា យុទ្ធនាការនេះមានរយៈពេលពីរថ្ងៃ គឺចាប់ពីថ្ងៃទី២៤ដល់ថ្ងៃទី២៥ ខែសីហា ឆ្នាំ២០១៧ ដោយបានចែកខិត្តបណ្ណបទប្បញ្ញាតិសំខាន់ៗស្តីពីចរាចរណ៍ផ្លូវគោកចំនួន៥ពាន់សន្លឹក មួកសុវត្ថិភាពចំនួន១៥មួក អាវយឺតចំនួន៣០អាវ ស្ទីកឃ័រចំណាំងផ្លាតចំនួន១ម៉ឺនសន្លឹក ខិត្តបណ្ណគោរពច្បាប់ចរាចរណ៍គឺដើម្បីការពារជីវិតអ្នក គ្រួសារអ្នក និងអ្នកដទៃចំនួន៥ពាន់សន្លឹក សៀវភៅច្បាប់ស្តីពីចរាចរណ៍ផ្លូវគោកចំនួន២០០ក្បាល ផ្ទាំងសញ្ញាចរាចរណ៍ ដល់បងប្អូនប្រជាពលរដ្ឋនៅតាមបណ្តោយផ្លូវជាតិលេខ៦ ដែលមានទីតាំងចំនួន៦ គឺនៅផ្សារតាំងគោក ផ្សាររំលង និងផ្សារកំពង់ថ្ម ស្ថិតក្នុងស្រុកបារាយណ៍ ផ្សារស្ទឹងសែន ក្នុងក្រុងស្ទឹងសែន ផ្សារថ្នល់បែក ស្រុកកំពង់ស្វាយនិងក្នុងស្រុកស្ទោង ។
លោកស្រី ឈួន វ៉ាន់នី ជាប្រជាពលរដ្ឋរស់នៅភូមិថ្នល់បែក ឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ បានមកចូលរួមក្នុងការឆ្លើយនិងសំណួរក្នុងពិធីផ្សព្វផ្សាយពីច្បាប់សុវត្តិភាពចរាចរណ៍ផ្លូវគោក គឺគាត់មានការសប្បាយរីករាយនិងបានសំណូមពរដល់ប្រជាពលរដ្ឋទាំងអស់ សូមចូលរួមទាំងអស់គ្នាក្នុងការគោរពច្បាប់ចរាចរណ៍ ដោយពាក់មួកសុវត្ថិភាព ពេលស្រវឹងហាមបើកបរ ពេលបើកបរត្រូវគោរពសិទ្ធជាអាទិភាព ។ សុផាត
