កំពង់ធំ ៖ ឯកឧត្តម គង់ វិមាន អភិបាលរងខេត្តកំពង់ធំបានអញ្ជើញចូលរួមប្រជុំត្រួតពិនិត្យលើទណ្ឌិតដើម្បីស្នើសុំបន្ធូរបន្ថយទោសនូវទណ្ឌិតណាដែលមានការព្យាយាមក៏សាងខ្លួនល្អ ឲ្យបានឆាប់រួចទោសទណ្ឌពីសំណាញ់ច្បាប់ នៅថ្ងៃទី ២៤ ខែ សីហា ឆ្នាំ២០១៧។លោក ភាន ឆវ័ន្ត ប្រធានពន្ធនាគារខេត្តកំពង់ធំលើកឡើងថា ក្នុងខេត្តកំពង់ធំ មានជនជាប់ឃុំខ្លួន ចំនួន៦៤២នាក់ ស្រីចំនួន៥១នាក់ អនីតិជន ៣៣នាក់ ស្រី០៤ នាក់ ក្នុងនោះមានជនត្រូវចោទ ៩៦នាក់, ជនជាប់ចោទ ១១៨នាក់, ពិរុទ្ធជន ២៩៤នាក់ និងទណ្ឌិត ១១៣នាក់។ ហើយក្នុងសំណើរលើកលែងទោស និងបន្ធូរបន្ថយទោសឲ្យទណ្ឌិតទៅគណកម្មការថ្នាក់ជាតិ ក្នុងឱកាសពិធីបុណ្យតាំងតុ ( បុណ្យ អុំទូក អកអំបុក និងសំពះព្រះខែ)ឆ្នាំ២០១៧ ខាងមុខ រួមមានស្នើរសុំបន្ធូរបន្ថយទោស ១២ខែ ចំនួន០៧នាក់ ស្រី០០នាក់, ស្នើរសុំ បន្ធូរបន្ថយទោស ០៩ខែ ចំនួន០៩នាក់ ស្រី០២នាក់, ស្នើរសុំបន្ធូរបន្ថយទោស០៦ខែ ចំនួន០៦នាក់ ស្រី០៣នាក់។
មានប្រសាសន៍ក្នុងឱកាសនោះ ឯកឧត្តម គង់ វិមាន អភិបាលរងខេត្ត និងជាប្រធានគណៈកម្មការលើកលែង និងបន្ធូរបន្ថយទោសខេត្ត លើកឡើងថា ការលើកលែងទោស និងបន្ធូរទោសឲ្យទណ្ឌិត គឺយើងធ្វើការវាយតម្លៃអំពីសកម្មភាពកសាងខ្លួនរបស់ទណ្ឌិតម្នាក់ៗ ដោយផ្អែកលើលក្ខណៈសម្បត្តិ បួនយ៉ាងគឺ
១. ទទួលស្គាល់ទោសកំហុស ដូចបានកំណត់នៅក្នុងសាលក្រមស្ថាពរ ហើយតាំងចិត្តកែប្រែ ដើម្បីកសាងខ្លួនជាពលរដ្ឋល្អ អាចធ្វើសមាហរណកម្មក្នុងសង្គមនាពេលអនាគត។
២. គោរព និងអនុវត្ត ម៉ឺងម៉ាត់វិន័យ បទបញ្ជាផ្ទៃក្នុងពន្ធនាគារ សកម្មភាពចូលរួមបង្ការ ទប់ស្កាត់ទង្វើរល្មើសរបស់អ្នកទោសផ្សេងទៀតក្នុងពន្ធនាគារ មិននិយាយ ឬប្រព្រឹត្តទង្វើរទាំងឡាយណាដែលជះឥទ្ធិពលដល់អ្នកដ៏ទៃ។
៣. សកម្មភាពក្នុងការងារពលកម្ម និងរៀនវិជ្ជាជីវៈប្រកបដោយស្មារតីភ្ញាក់រលឹកប្រឹងប្រែងធ្វើឲ្យបានស្រប តាមផែនការកំណត់ដែលមានឥទ្ធិពលក្នុងការជម្រុញចលនាប្រឡងប្រណាំងក្នុងចំណោមទណ្ឌិតទាំង ឡាយ បង្កើតគំនិតច្នៃប្រឌិតដែលត្រូវបានទទួលស្គាល់ និងបញ្ចូលក្នុងការអប់រំការងារពលកម្ម និងបង្រៀន វិជ្ជាជីវៈ។
៤. សកម្មលត់ ដំ និងអប់រំខ្លួន កសាងចរិយាមាយាទ លើកកម្ពស់សីលធម៌រស់នៅគោរពកិត្តិយស និងសេចក្តីថ្លៃថ្នូរចំពោះខ្លួនឯង និងអ្នកដ៏ទៃ ដើម្បីក្លាយជាពលរដ្ឋស្លូតត្រង់ មានប្រយោជន៍ សម្រាប់ជាតិ ព្រមទាំងស្មារតីជួយដល់ទណ្ឌិតដ៏ទៃទៀតឲ្យខិតខំកសាងខ្លួនដើម្បីភាពរីក ចម្រើនទាំងអស់គ្នា។ ឯកឧត្តមបន្តថា ដោយយោងលើលក្ខណៈសម្បត្តិទាំងបួនខាងលើ នេះទើបគណៈកម្មការលើកលែង និងបន្ធូរបន្ថយទោសថ្នាក់ខេត្តរបស់យើងបានធ្វើការ វិនិច្ឆ័យ បន្ធូរបន្ថយទោសទណ្ឌិតចំនួន ១៨ នាក់ ក្នុងចំណោមការដាក់ស្នើរសុំបន្ធូរបន្ថយ ទោសចំនួន១៩នាក់ ហើយមូលហេតុដែលយើងមិនធ្វើការស្នើរ សុំបន្ធូរបន្ថយទោសម្នាក់ ព្រោះបុគ្គលរូបនោះបានទទួលការបន្ធូរបន្ថយទោសកាលពីពេលកន្លងទៅរួច មកហើយ។ លើសពីនេះទៀតសូមឲ្យមន្រ្តីពន្ធនាគារទាំងអស់ព្យាយាមអប់រំសីលធម៌ និងបណ្តុះបណ្តាល វិជ្ជាជីវៈដល់ទណ្ឌិត ដើម្បីកសាងខ្លួនជាពលរដ្ឋល្អនាពេលអនាគត៕
