ខេត្តពោធិសាត់ ៖ សេចក្តីរាយការណ៍ពីប្រជាពលរដ្ឋក៍ដូចជាមជ្ឈដ្ឋាននានាបានអោយដឹងថា ក្រោយពីមានសភាពស្ងប់ស្ងាត់មួយរយៈ បច្ចុប្បន្ននេះមានឈ្មួញរកស៊ីឈើដ៍ធំ និងជាឈ្មួញដុះស្លែប្រចាំខេត្តពោធិសាត់ កំពុងតែបញ្ចេញសកម្មភាពយ៉ាងកក្រើកឡើងវិញ ក្នុងការកាប់ឈើគ្រប់ប្រភេទ និងដឹកលក់ធ្វើអាជីវកម្មយកលុយដាក់ហោប៉ៅយ៉ាងរំភើយ គ្មានការរំខានពីសមត្ថកិច្ចពាក់ព័ន្ធទាំងអស់ រាប់ចាប់តាំងពីថ្នាក់ក្រោមរហូតដល់ថ្នាក់លើ ពោលគឺចាប់ពីថ្នាក់មូលដ្ឋានរហូតដល់ថ្នាក់ខេត្ត ។
ប្រភពព័ត៌មានបានអោយដឹងទៀតថា ឈ្មួញឈើជើងខ្លាំងទាំងពីរខាងលើនេះត្រូវបានគេស្គាល់ឈ្មោះ ហ៊ុំ ហយ និង ឈ្មោះ ឆាង ម៉ៅ ដែលមានងារជាមន្ត្រីប៉ូលីសក្នុងខេត្តពោធិសាត់ បានធ្វើសកម្មភាពកាប់បំផ្លាញព្រៃឈើ និងដឹកលក់យ៉ាងកក្រើកក្នុងភូមិសាស្ត្រស្រុកវាលវែង និងស្រុកភ្នំក្រវ៉ាញ នៃទឹកដីខេត្តពោធិសាត់ ។ ពួកគេដឹកជញ្ជូនឈើគ្រប់ប្រភេទ រួមនិងឈើប្រណិតផងដែរ ដោយឈើក្រហមទាំងអស់លក់ចែកចាយតាមដេប៉ូក្នុងខេត្តពោធិសាត់ និងតាមបណ្តាខេត្តនានា ដោយឡែកប្រភេទឈើប្រណិតវិញ ត្រូវបានដឹកចេញពីខេត្តពោធិសាត់ ឆ្ពោះទៅរាជធានីភ្នំពេញ និងលក់បន្តទៅកន្លែងផ្សេងៗទៀត និងលក់ទៅប្រទេសវៀតណាម ។
ករណីការប្រព្រឹត្តបទល្មើសព្រៃឈើរបស់ឈ្មោះ ហ៊ុំ ហយ ក៍ដូចជាលោកមន្ត្រីប៉ូលីស ឆាង ម៉ៅ ខាងលើនេះ មជ្ឈដ្ឋានទូទៅក៍ដូចជាប្រជាពលរដ្ឋក្នុងស្រុកវាលវែង និងស្រុកភ្នំក្រវ៉ាញ បានធ្វើការរិះគន់យ៉ាងខ្លាំងដល់ជំនាញពាក់ព័ន្ធនានា ដោយមិនបានអនុវត្តន៍តាមបទបញ្ជារបស់សម្តេចតេជោ ហ៊ុន សែន ក្នុងការបង្ក្រាប និងទប់ស្កាត់បទល្មើសព្រៃឈើ ។ ហើយក៍មានអ្នកងឿងឆ្ងល់ថា បើដឹកដូចព្យុះបែបនោះ ហេតុអ្វីបានជាមិនមានវិធានការណ៍បង្ក្រាប ដោយឡែកឈ្មោះ ឆាង ម៉ៅ ជាមន្ត្រីប៉ូលីសរកស៊ីបទល្មើសព្រៃឈើ តែលោកស្នងការខេត្តមានបានជ្រាបឬអត់ ហើយធ្លាប់ធ្វើការអប់រំណែនាំឬទេ? ។
ពាក់ព័ន្ធនិងសេចក្តីរាយការណ៍ខាងលើនេះ អ្នកយកព័ត៌មានយើងមិនអាចសុំការបំភ្លឺណាមួយពីស្ថាប័នជំនាញក្នុងខេត្ត ដូចជាខណ្ឌរដ្ឋបាលព្រៃឈើ ឬ មន្ទីរកសិកម្មខេត្តនៅឡើយទេប៉ន្តែរីករាយនឹងទទូលការពន្យល់និងការបំភ្លឺពីគ្រប់ភាគីពាក់ពន្ធ័ទាំងអស់ ៕
