កំពង់ធំ ៖ លោកឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ ប្រជុំពង្រឹងការងារជំនាញផែនសន្តិសុខ របស់ស្នងការដ្ឋាននគរបាលខេត្តកំង់ធំ នៅរសៀលថ្ងៃទី២២ ខែសីហា ឆ្នាំ២០១៧ ដោយមានការអញ្ជើញចូលរួមពីលោកស្នងការរង លោកនាយការិយាល័យ អធិការដ្ឋាននគរបាលក្រុង ស្រុក និងមន្ត្រីនគរបាលប្រមាណជាង៦០នាក់នៅក្នុងផែនសន្តិសុខ ។
លោកឧត្តមសេនីយ៍ត្រី អ៊ុក កុសលបានលើកឡើង ត្រូវត្រួតពិនិត្យទៅលើមន្ត្រីឲ្យបានច្បាស់លាស់ ដោយមានបញ្ជីវត្តមាន ហើយពិនិត្យទៅលើមន្ត្រីណា ដែលខិតខំអនុវត្តការងារបានដោយគោរព លោកបានបញ្ជាក់
ច្បាស់ៗថា មន្ត្រីនគរបាលទាំងអស់ ត្រូវកែខ្លួនដោយពង្រឹងវិន័យឲ្យបានព្រមគ្នា ដោយចេញពីបេះដូងខ្លួនផ្ទាល់ មិនមានអ្នកណាបង្ខិតបង្ខំ ចំពោះមន្ត្រីចាស់ៗត្រូវធ្វើជាគំរូល្អដល់មន្ត្រីក្មេងៗ ទាំងការស្លៀកពាក់ ដោយមានការរៀបចំឯកសណ្ឋាន អត្តចរិតសុភាពរាបសារទន់ភ្លន់ តែម៉ឺងម៉ាត់ក្នុងការងារ មន្ត្រីទាំងអស់ត្រូវពង្រឹងសមត្ថភាពដោយខ្លួនឯង ដោយហ្វឹកហាត់នៅនឹងកន្លែង តាមបណ្តាផែនរបស់ខ្លួន ដោយបង្កើតជាវគ្គខ្លីៗ ពាក់ព័ន្ធទៅនឹងវិន័យកងកម្លាំង ត្រូវកែប្រែឥរិយាបថពីអ្នកដឹកនាំ ពីអ្នកគ្រប់គ្រង ពីអ្នកបញ្ជា ទៅជាអ្នកបម្រើសេវាសាធារណៈជូនប្រជាពលរដ្ឋ រួមទាំងកិច្ចការងារសហគមន៍ផង ដូចជា ជួយក្នុងគ្រោះទឹកជំនន់ គ្រោះរាំងស្ងួត ច្រូតកាត់។
លោកស្នងការក៏បានសំណូមពរនិងអធិការក្រុង ស្រុកទាំងអស់ ដល់មន្ត្រី ត្រូវចេះបំផុសចលនារកកម្លាំងពីសហគមន៍ បម្រើសេវាសាធារណៈជូនប្រជាពលរដ្ឋ គ្រប់អធិការនគរបាលក្រុង-ស្រុកទាំងអស់ ត្រូវមានរបបប្រជុំច្បាស់លាស់ជាមួយមន្ត្រីក្រោមឱវាទ ហើយត្រូវធ្វើអ្វីៗត្រូវដាក់លើតុ ត្រូវពិនិត្យអំពីផែនការយុទ្ធសាស្ត្រ ដើម្បីបង្ការទប់ស្កាត់នូវបទល្មើសភេរវកម្ម កុំមានតែឯកសារ ត្រូវសិក្សាស្រាវជ្រាវឲ្យបានច្បាស់លាស់ និងស៊ីជម្រៅនូវមុខសញ្ញាលាបពណ៌ ពពួកបំពុលបរិយាកាស ដែលធ្វើឲ្យបង្កបញ្ហាក្នុងសង្គម ត្រូវជំរុញការផ្សព្វផ្សាយពីការបង្ការ ការបង្រាបឲ្យបានដល់ប្រជាពលរដ្ឋបន្តទៀត សហការជាមួយអង្គការដៃគូអភិវឌ្ឍន៍ និងជំនាញផ្សេងៗ ដើម្បីក្តាប់នូវមុខសញ្ញាចែកចាយគ្រឿងញៀន ត្រូវពិនិត្យ និងជំរុញការធ្វើអត្តសញ្ញាណប័ណ្ណជូនប្រជាពលរដ្ឋឲ្យបានទាន់ពេលវេលា ដោយមិនមានការយកប្រាក់ ត្រូវមានផែនការចុះសួរសុខទុក្ខមន្ត្រីដែលមានជំងឺ ក្រីក្រលំបាក និងមានជម្រកសមរម្យ ដើម្បីលើកទឹកចិត្តដល់ពួកគាត់ដែលបានខិតខំបម្រើប្រទេសជាតិមាតុភូមិនិងធ្វើយ៉ាងណាខិតខំបម្រើផលប្រយោជន៍ប្រជាពលរដ្ឋឲ្យបានល្អ ដោយឲ្យពួកគាត់រស់នៅដោយសុខដុមរម្យនា ។សុផាតពីខេត្តកំពង់ធំ
