ខេត្តពោធិ៍សាត់ ៖ ប្រភពព័ត៌មានពីប្រជាពលរដ្ឋនៅស្រុកវាលវែងបានឲ្យដឹងថា ឈ្មួញរកស៊ីឈើឈ្មោះ កែវ សុងហេងនឹងលោក ហុំ ហយ បានឃុបឃិតជាមួយមន្រ្តីជំនាញធ្វើសកម្មភាពដឹកជញ្ជនឈើអារជារៀងរាល់ថ្ងៃ ដោយជ្រកក្រោមយីហោក្រុមហ៊ុន អឹមឌីអេស របស់លោកឧកញ្ញា ទ្រី ភាព បើទោះជាលោក ឧកញ្ញា ប្រកាសជាសាធារណៈថាឈប់ពាក់ព័ន្ធករណីព្រៃឈើក៏ដោយ។
ប្រភពរាយការណ៍ខាងលើបន្តថា សកម្មភាពរថយន្តប្រភេទធំៗធុនយីឌុបជាច្រើនគ្រឿង បានដឹកជញ្ជូនឈើប្រភេទឈើអារជារៀងរាល់ថ្ងៃ ដោយចេញពីម្តុំចំណុចភូមិអន្លង់រាប ឃុំអន្លង់រាប ស្រុកវាលវែង ខេត្តពោធិ៍សាត់ ដោយមានឯកសារកំណត់ហេតុស្តីពីការចុះពិនិត្យឈើអារប្រភេទលេខ២ និងលេខ៣ លើកឡើងរថយន្តនៅក្នុងបរិវេណរោងចក្រអារច្រៀករបស់ក្រុមហ៊ុន អឹមឌីអេស ដែលមានលោក កែវ សុងហេង នឹងលោក ហុំ ហយ ជាតំណាងក្រុមហ៊ុន អឹមឌីអេស ដោយឆ្លងកាត់លោក ជា ហួត នាយផ្នែករដ្ឋបាលព្រៃឈើវាលវែង និងលោក អ៊ីម សុភី នាយសង្កាត់រដ្ឋបាលព្រៃឈើប្រម៉ោយ ដែលភាគច្រើនគេសង្កេតឃើញនៅក្នុងឯកសារខាងលើនេះមានចំនួនឈើជាង ១០០ដើម ស្មើនឹងចំនួន ១៨ម៉ែត្រត្រីគុណ ប៉ុន្តែគេមិនបានបញ្ជាក់ច្បាស់លាស់នោះទេថា ដើមឈើទាំងនោះចេញពីប្រភពតំបន់ណា គេអារកាត់នៅតំបន់ណាឬកន្លែងណានោះឡើយ។
ប្រភពរាយការណ៍ដដែលខាងលើនៅតែបន្តអះអាងទៀតថា ការពិតដើមឈើទាំងអស់នោះ គឺក្រុមឈ្មួញសម្រុកអារកាត់នៅតំបន់ព្រៃភ្នំនានា ពិសេសនៅក្នុងដែនជំរកសត្វព្រៃភ្នំសំកុស រួចពួកគេដឹកជញ្ជូនតាមរយៈរថយន្តច្នៃធំ ចូលមករោងចក្រដូចបានរៀបរាប់ខាងលើនៅពេលយប់ដើម្បីអារច្រៀក និងដឹកជញ្ជូនយកទៅលក់ចែកចាយបន្ត នៅតាមបណ្ដាខេត្តនានា ដោយក្នុងច្បាប់គឺដឹកឈើចាប់ពីចំនួន១៥ទៅ១៨ម៉ែត្រត្រីគុណ ប៉ុន្តែជាក់ស្តែងត្រូវគេប៉ាន់ស្មានក្នុង១រថយន្តធំនេះមិនក្រោមពីចំនួន ៣៥ម៉ែត្រត្រីគុណនោះឡើយ ជាក់ស្ដែងដូចឃើញរូបភាពស្រាប់ រថយន្តដឹកឈើពេញ ដែលគេថតបាននៅលើកំណាត់ផ្លូវជាតិលេខ៥៥ ត្រង់ចំណុចភ្នំចិនយំនារសៀល ថ្ងៃទី១៩ ខែសីហា ឆ្នាំ២០១៧ នេះ ដូច្នេះហើយបញ្ហានេះត្រូវបានគេសង្ស័យថាពួកឈ្មួញនិងមន្ត្រីជំនាញបានឃុបឃិតគ្នាដឹកឈើលើសប៉េសេ បំផ្លិចបំផ្លាញទាំងព្រៃឈើ ទាំងផ្លូវថ្នល់ជាដើម។ល។
ទោះជាប្រភពរាយការណ៍យ៉ាងនេះក្តី ពាក់ព័ន្ធនឹងការលើកឡើងខាងលើនេះ យើង មិនអាចស្វែងរកសុំការពន្យល់ពីលោក កែវ សុងហេង តំណាងក្រុមហ៊ុន អ៊ឹមឌីអេស និងលោក អ៊ីម សុភី នាយសង្កាត់រដ្ឋបាលព្រៃឈើប្រម៉ោយបាននៅឡើយទេ ប៉ុន្តែរង់ចាំទទួលការបំភ្លឺជានិច្ច៕
