កោះកុង ៖ លោក យួន ឈីវ មានមុខរបរជាអ្នកកាសែត បានឲ្យបណ្តាញសារព័តមានដឹងថា លោកនិងប្តឹងសារទុក្ខទៅសាលាឧទ្ធរណ៏ បន្ទាប់ពីសាលាដំបូងខេត្តកោះកុងបានប្រកាសសាលក្រមឲ្យលោកចាញ់ក្តី តាមបណ្តឹងរបស់ឈ្មោះ ជិក ទុន រស់នៅភូមិចាំយាម ឃុំបាក់ខ្លង ស្រុកមណ្ឌុលសីមា ខេត្តកោះកុង ជាប្រធានសន្តិសុខក្រុមហ៊ុនអិលវ៉ាយភីគ្រុប ដែលបានប្ដឹងឡើងតុលាការ ទាមទារយកដីដែលលោកបានរស់នៅជាយូរឆ្នាំមកហើយ។
លោក យួន ឈីវ បានឲ្យដឹងទៀតថា ដីដែលឈ្មោះ ជិក ទុន ប្តឹងទាមទារយកនោះគឺជាដីផ្ទះរបស់ លោក(យួនឈីវ) ដែលបានរស់នៅលើដីនោះ២២ឆ្នាំហើយ លោកបាននៅលើដីផ្ទះនោះរហូតមានចៅទៅដល់២នាក់ហើយ មិនដែលមានរឿងអីសោះនៅលើដីផ្ទះនោះ ព្រមទាំងមានមានឯកសារដីផ្ទះទៀត មានភូមិមានឃុំមានភូមិបាលស្រុកទទួលស្គាល់ចុះហត្ថលេខាលើឯកសារដីផ្ទះនោះទៀតផង។
លោក យួន ឈីវ បានបន្តថា គាត់បានមកទិញដីផ្ទះនេះតាំងឆ្នាំ១៩៩៥ ដីផ្ទះនេះទិញពីឈ្មោះ
ជី ខេង បានលក់អោយក្នុងតំលៃ ២៥,៥០០០បាតប្រាក់ថៃ គឹតជាមាស២៨តំលឹងមាសសុទ្ធ ហើយបានរស់នៅតាំងពីពេលនោះរហូតមក។
លោក យួន ឈីវ បានបន្តថា ឈ្មោះ ជិក ទុន ដែលមករំលោភបំពានលើដីផ្ទះរបស់លោក(យួនឈីវ) កាលពីថ្ងៃទី២៧,៤,២០១៧ថ្មីៗនេះ គឺគេអោយមនុស្សពីរនាក់មកកាប់ព្រៃ ហើយយកបង្គោលមកបោះបំរុងធ្វើរបងពទ្ធ័ជុំវិញហើយចូលដីផ្ទះប្រជាពលរដ្ឋជិតខាង៥ខ្នងផ្ទះទៀតសុទ្ទតែអ្នកក្រីក្រ តែពួកគាត់មិនហ៊ាននិយាយទេដោយលឺថាគេ(ជិក ទុន)ជាអ្នកមានលុយមានអំណាច ក៌មិនហ៊ានទៅប្ដឹងទេ ខ្លាចគេណាស់ក៏សម្ងំនៅស្ងៀម ចំណែកដីរបស់លោក យួន ឈីវ លោកមិនព្រមឲ្យគេមករំលោភយក ទើបគេប្តឹងឡើងតុលាការដោយគេថាដីនេះជាដីម្ដាយរបស់គេតាំងពីមុនមកទើបគេមកយកវិញ។
លោកយួនឈីវបានបន្តថា លោកចៅក្រម អាំង ចិន្ថា បានកោះហៅរូបលោកនឹងលោក ជិក ទុន កាលថ្ងៃទី២៩ ខែមិថុនា ឆ្នាំ២០១៧ ម្ដង លោកចៅក្រមសួរលោក ជិក ទុន ពីរឿងដីនោះមានទទឹងប៉ុន្មាន មានបណ្ដោយប៉ុន្មាន លោក ជិក ទុន អត់ដឹងទាំងអស់ ហើយសួរថាលោកមានឯកសារទេ លោក ជិក ទុន ថាអត់មានទេ ហើយសួរថាបានរស់នៅទីនោះទេ លោក ជិក ទុន ថាអត់ដែលបានរស់នៅទីនោះទេ គ្រាន់តែថាជាដីម្ដាយគេតែប៉ុណ្ណោះ។
នៅថ្ងៃទី២ ខែសីហា ឆ្នាំ២០១៧ លោកចៅក្រម អាំង ចិន្ថា កោះហៅលោក យួន ឈីវ និងលោក ជិក ទុន ទាញហេតុផលផ្ទាល់មាត់ ចំពោះមុខចៅក្រម តែ លោក ជិក ទុន អត់ដឹងដីម្ដាយខ្លួនឯងប៉ុនណាផងហ្នឹង នេះ ជាសម្តីលោក ជិក ទុន និយាយចំពោះមុខចៅក្រមលើកទី២។ ចំណែកសាក្សីលោក ជិក ទុន ហៅទៅ មានមេភូមិ ឈ្មោះ ហោ ឆាយ បាននិយាយចំពោះមុខចៅក្រមថា គាត់ឡើងធ្វើមេភូមិ១អាណត្ដិហើយ គាត់មិនដឹងថាដីម្ដាយ ជិក ទុន ប៉ុនណា ហើយព្រំប្រទល់ខាងណាទល់អ្នកណាគាត់អត់ដឹងទេ កាលម្ដាយ ជិក ទុន គាត់នៅរស់ គាត់មិនដែលនិយាយប្រាប់ផង គ្រាន់តែលឺគេថាដីមាគឹម តែដីប៉ុនណានោះគាត់អត់ដឹងទាំងអស់។
នៅថ្ងៃទី១៧ ខែសីហា ឆ្នាំ២០១៧ ចៅក្រម អាំង ចិន្ថា ប្រកាសសាលក្រមកាត់ក្ដីអោយលោក ជិក ទុន ឈ្នះ ដោយកាត់ដីផ្ទះរបស់លោក យួន ឈីវ អោយទៅ ជិក ទុន ក្បាលដី៨,៥០ម៉ែត្រ បណ្ដោយ៥០ម៉ែត្រ។ហើយដីផ្ទះរបស់លោក យួន ឈីវ នៅសល់តែបណ្ដោយ២៥ម៉ែត្រទេ ក្នុងចំណោមដី៧៥ម៉ែត្រ ដែលលោកបានកាន់កាប់នាពេលកន្លងមក។លោក យួន ឈីវ នឹងដាក់ពាក្យបណ្តឹងជំទាស់ទៅសាលាឧទ្ធណ៏ចំពោះសាលក្រមរបស់សាលាដំបូងខេត្តកោះកុង ដែលលោកចាត់ទុកថាមានភាពអយុត្តិធម៏ចំពោះរូបលោក។
ជាចុងក្រោយលោក យួន ឈីវ បានថ្លែងថា ខ្ញុំបាទ(យួន ឈីវ)សូមអំពាវនាវលើកម្រាមដៃដប់ជំរាបដល់សម្ដេចតេជោ ហ៊ុន សែន នឹងលោកជំទាវ ប៊ុនរានី ហ៊ុនសែន មេត្តាជួយរកយុត្តិធម៏ឲ្យខ្ញុំបាទផង ក្នុងនាមខ្ញុំបាទជាអ្នកសារព័ត៌មានដែលជួយសង្គមជាតិ ដើម្បីជាតិស្លាប់ក៏មិនស្ដាយជីវិតឡើយ។
គេហទំពរ័យើងពុំអាចសុំការបំភ្លឺពីលោក ជិក ទុន បានឡើយ ព្រោះពុំមានលេខទូរសព្ទ័តែនឹងរង់ចាំការបំភ្លឺពីភាគីម្ខាងទៀតជានិច្ច៕
