កំពង់ឆ្នាំង ៖ ប្រជាពលរដ្ឋដែលបានទិញដីនៅតំបន់ចុងកោះ ក្រោយពីបានទទួលបាននូវការកាត់ដីអោយដើម្បីអាស្រ័យផល ពីសំណាក់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង ដោយមានការចូលរួមពីក្រុមការងារចម្រុះថ្នាក់ខេត្ត បានសម្តែងនូវក្តីសោមនស្សរីករាយ និងមានក្តីសង្ឃឹមយ៉ាងខ្លាំង ។
តែផ្ទុទៅវិញ ភាពសប្បាយរីករាយនោះប្រៀបបានដូចជាពពកដែលបានរសាត់ទៅ ក្រោយពីក្រសួងមហាផ្ទៃបានចេញសជណ បានជម្រាបមក ឯកឧត្តម អភិបាល នៃគណ:អភិបាលខេត្តកំពង់ឆ្នាំងដូចខាងក្រោម៖
-ករណីទំនាស់ដីធ្លី ដែលកំពុងស្ថិតនៅក្នុងចំណាត់ការរបស់ស្ថាប័នតុលាការ ក្រសួងមហាផ្ទៃ សូមធ្វើការណែនាំទៅរដ្ឋបាលខេត្តកំពង់ឆ្នាំង ដូចតទៅ៖
១-ខិតខំប្រឹងប្រែង អនុវត្តន៍ការងារ ជាគណ:កម្មាធិការគ្រប់គ្រងដីរដ្ឋថ្នាក់ខេត្តឲ្យប្រសើរ
២-ផ្អាករាល់ការចេញលិខិតផ្សេងៗ របស់រដ្ឋបាលខេត្ត ដែលពាក់ព័ន្ធនឹងដីទំនាស់ រង់ចាំចំណាត់ការរបស់សាលាដំបូងរាជធានីភ្នំពេញជាមុនសិន
៣-ណែនាំកុំឲ្យអាជ្ញាធរភូមិ សង្កាត់ ក្រុង ចុះហត្ថលេខា លើលិខិតផ្ទេរសិទ្ធិដីធ្លីដែលមានទំនាស់ ឲ្យទៅតតីយជនផ្សេង រង់ចាំចំណាត់ការរបស់សាលាដំបូងរាជធានីភ្នំពេញជាមុនសិន។
ប្រជាពលរដ្ឋ៣៧គ្រួសារ ដែលមានសមាជិក១៤៤នាក់ រស់នៅភូមិចុងកោះ សង្កាត់ខ្សាម ក្រុងកំពង់ឆ្នាំងខេត្តកំពង់ឆ្នាំង បានសម្តែងនូវក្តីព្រួយបារម្ភយ៉ាងខ្លាំងចំពោះសជណនេះ ដោយភ័យខ្លាចបាត់បង់នូវដីដែលពួកគាត់បានទិញដោយកម្លាំងញើសឈាម ហើយអ្នកខ្លះទៀតលុយដែលបានទិញដីនេះ គឺបានមកពីការខ្ចីចងការពីស្ថាប័នឯកជននានាទៀតផង ។
មតិរបស់ប្រជាពលរដ្ឋទាំងនោះបានលើកឡើងថា ដីទាំងនោះដែលពួកគាត់បានទិញមិនសមឡើយទទួលបានលទ្ធផលបែបនេះឡើយ ដីនេះពួកគាត់ទិញពីឈ្មោះ អៀ គុយម៉ុង ដែលគេបានដឹងថាឈ្មោះអៀ គុយម៉ុង បានទិញដីនេះពីឈ្មោះ ជៀម ហៃ មិនតែប៉ុណ្ណោះក្រុមគ្រួសាររបស់លោកជៀម ហៃ ចំនួនជាង១០នាក់ ក៍បានទិញដីនៅចំណុចនោះពីឈ្មោះ អៀរ គុយម៉ុង ដែរ តើមូលហេតុអ្វីបានជាឈ្មោះជៀម ហៃ ប្តឹងបង្កអោយមានទំនាស់បែបនេះ ធ្វើអោយមានការរាំងស្ទះដល់ការរៀបចំបង្កបង្កើនផលលើដីរបស់ពួកគាត់បានទិញទៅវិញ ។ ពុំនោះសោតក្រុមខាងឈ្មោះ ជៀម ហៃ ដែលធ្វើការប្តឹងផ្តល់នេះ សុទ្ធសឹងសាច់ញាតិជាក្រុមគ្រួសាររបស់ឈ្មោះ ជៀម ហៃ តែម្នាក់ប៉ុណ្ណោះ ដែលបានបង្កអោយខូចខាតផលប្រយោជន៍ប្រជាពលរដ្ឋទូទៅទាំង៣៧គ្រួសារ ។
ប្រជាពលរដ្ឋទាំង៣៧គ្រួសារលើកដៃសំពះ សំណូមពរដល់សម្តេចតេជោ ហ៊ុនសែន ក៍ដូចជាក្រសួងមហាផ្ទៃមេត្តាពិនិត្យ និងដោះស្រាយ ដើម្បីអោយពួកគាត់បានមានសិទ្ធគ្រប់គ្រង និងប្រើប្រាស់ដីរបស់ពួកគាត់ទាំងនោះ ដោយក្តីអនុគ្រោះ ៕
