អន្តរជាតិ ៖ ក្រុមតម្រួតថៃ រួមជាមួយនឹងកំលាំងអន្តោប្រវេសន៍ បានធ្វើការឃាត់ខ្លួនពលករខ្មែរ សរុបចំនួន៣២នាក់នៅខេត្តស្រះកែវ ប្រទេសថៃ បន្ទាប់ពីពួកគេទាំងអស់គ្នា បានជឿនិងទុកចិត្តទៅលើមេខ្យល់ ដោយសន្យាថានឹងនាំអោយដល់ទីក្រុងបាងកក ដើម្បីធ្វើការងារនៅទីនោះដោយមិនចាំបាច់មានលិខិតស្នាមអ្វីនោះឡើយ ។
ការឃាត់ខ្លួនពួកគេនេះគឺបានធ្វើឡើងនៅល្ងាចថ្ងៃទី ១៤ ខែសីហា ឆ្នាំ២០១៧ត្រង់ចំណុចខាងមុខវត្តស្រះហ្លួង ក្នុងឃុំណងសាំង ស្រុកអារញ្ញប្រាក់ថេត ខេត្តស្រះកែវគឺដោយមានការសង្ស័យទៅលើរថយន្តតួរីសមួយគ្រឿង ពាក់ស្លាកលេខ បាងកក៣២.០៨៤១ ដែលបានបើកបរក្នុងល្បឿនយ៉ាងលឿន ដោយមានទិសដៅចេញពី
ស្រុកគោកខ្យូង ឆ្ពោះទៅកាន់ទីក្រុងបាងកក និងដោយមានចេតនាចង់បុកទម្លុះបារ៉ាស់តម្រួតផងដែរ ។
រថយន្តដែលគេសង្ស័យថា មានបទល្មើសនោះគឺអ្នកបើកបរមានឈ្មោះ អ៊ុស្មាន ស៊ូឡុងភេទប្រុស អាយុ៣៦ឆ្នាំ រស់នៅភូមិ៧ ឃុំតាលុពោធិស្រុកមឿងខេត្តប៉ាតានីចំណែកនៅក្នុងរថយន្តនោះមានពលករខ្មែរសរុប
ចំនួន៣២នាក់ ដែលក្នុងនោះប្រុស១៩នាក់និងស្រី១៣នាក់ ដោយមានការញាត់ណែនតែម្តង ។
នៅចំពោះមុខសមត្ថកិច្ច អ្នកបើកបររថយន្តបានសារភាពថា ខ្លួនគ្រាន់តែជាអ្នកសុីឈ្នួល
បើករថយន្តអោយគេតែប៉ុណ្ណោះ ដោយក្នុងមួយជើងៗទទួលបានប្រាក់ពី ១៥០០ បាត
ទៅ ២០០០ បាត គឺដឹកពីស្រុកគោកខ្យូង ទៅកាន់ទីក្រុងបាងកក ។ ចំណែកពលករខ្មែរ
ដែលគ្មានឯកសារអ្វីពាក់ព័ន្ធបន្តិចទាល់តែសោះនោះ បានសារភាពថា ពួកគេទាំងអស់គ្នា
គឺធ្វើដំណើរមកពីខេត្តកំពង់ធំ និងខេត្តបន្ទាយមានជ័យ និងមានបំណងទៅធ្វើការ
នៅក្នុងទីក្រុងបាងកក តាមការអះអាង និងធានាពីសំណាក់មេខ្យល់ខ្មែរ ដោយពួកគេ
ក្នុងម្នាក់ៗត្រូវបង់លុយអោយទៅមេខ្យល់នោះ ៣០០០ បាត ។
បច្ចុប្បន្នទាំងមធ្យោបាយធ្វើដំណើរ ក៏ដូចជាអ្នកបើកបរ ព្រមទាំងពលករខ្មែរទាំងអស់
ត្រូវបានក្រុមតម្រួតជំនាញ នាំយកទៅកាន់អធិការដ្ឋាន ស្រុកអារញ្ញប្រាក់ថេត ដើម្បី
ធ្វើការសាកសួរបន្តទៅតាមនិតិវិធី ៕
