កំពង់ធំ ៖ សម្តេចចៅហ្វាវាំង វរវៀងជ័យ អធិបតីស្រឹង្គារ ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង បានអញ្ជើញចុះចែកព្រះរាជអំណោយ ជាព្រះរាជទានដ៏ថ្លៃថ្លារបស់ ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា អមដំណើរដោយឯកឧត្តម សុខ លូ អភិបាលនៃគណៈអភិបាលខេត្តកំពង់ធំ ព្រមទាំងមន្រ្តីរាជការ អាជ្ញាធរស្រុក ឃុំ ចែកជូនដល់ប្រជាពលរដ្ឋក្រីក្រ ចំនួន ៤៦៥ គ្រួសារ ។
ពិធីចែកអំណោយនេះ ត្រូវបានប្រារព្វធ្វើឡើងនៅព្រឹកថ្ងៃទី ១៦ ខែសីហា ឆ្នាំ២០១៧ ស្ថិតនៅក្នុងបរិវេណ វត្តស្រង៉ែ ភូមិស្រង៉ែ ឃុំត្បែង ស្រុកកំពង់ស្វាយ ខេត្តកំពង់ធំ ប្រជាពលរដ្ឋដែលបានទទួលអំណោយព្រះរាជទានដ៏ថ្លៃថ្លារបស់ ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា មានចំនួន៤ ភូមិ ក្នុងនោះមានភូមិត្រាច ៧៣គ្រួសារ ភូមិស្រង៉ែ ៩២គ្រួសារ ភូមិអូរអំបែង ៩៣គ្រួសារ និងភូមិឈើទាល ២០៧គ្រួសារ សរុបចំនួន ៤៦៥គ្រួសារ ដោយក្នុងមួយគ្រួសារទទួលបានអង្ករ ១បេ ស្មើនឹង ៥០គីឡូក្រាម មី ១កេស និងថវិការ៥០០០០ម៉ឺនរៀល។
សម្តេចចៅហ្វាវាំង វរវៀងជ័យ អធិបតីស្រឹង្គារ ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង បានមានប្រសាសន៍ ថាសូមបងប្អូនកូនចៅកុំជឿលើការឃោសនា របស់គណបក្សមួយចំនួន ដែលបាន អួតអាងថាខ្លួនជាអ្នករាជានិយម តែការពិតគឺបងប្អូននេះហើយដែលជាអ្នករាជានិយមនោះ គឺបងប្អូនគោរ ស្រឡាញ់ភ្លេងជាតិ ស្រឡាញ់ព្រះមហាក្សត្រ ស្រឡាញ់សម្តេចម៉ែ សម្តេចតា និងព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជានៃយើង ។
សម្តេចបានមានប្រសាសន៍ថា ការនាំអំណោយរបស់ ជាព្រះរាជទានដ៏ថ្លៃថ្លារបស់ ព្រះករុណាជាអម្ចាស់ជីវិតលើត្បូង មកចែកជូនដល់បងប្អូននេះ គឺជាព្រះទ័យរបស់ព្រះអង្គសម្តេច មានការព្រួយបារម្ភណ៍ពីជីវភាព របស់បងប្អូនដែលជួបការលំបាក ទើបព្រះអង្គបានឲ្យខ្ញុំព្រះករុណានាំយកអំណោយព្រះរាជទាន របស់ព្រះអង្គមកចែកជូនដល់បងប្អូនក្នុងពេលនេះ ។
នៅក្នុងឳកាសនៃពិធីចែកអំណោយនេះ សម្តេចចៅហ្វាវាំង វរវៀងជ័យ អធិបតីស្រឹង្គារ ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង និងឯកឧត្តម សុខ លូ បាននាំយកថវិការ និង ព្រះឆាយល័ក្ឋចែកជូនដល់ប្រជាពលរដ្ឋ ចំណែកប្រកបដោយប៩ានសម្តែងនូវសេចក្តីត្រេតអរ គោរពស្រឡាញ់ និងនឹករលឹក ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជានៃយើង និងសូមជួនពរ ឲ្យព្រះអង្គមានអាយុយឺនយូរ និងជាម្លាប់ដ៏ត្រជាក់ ត្រឈឹងត្រឈៃដល់កូនចៅ។
ដោយ សុផាតពីខេត្តកំពង់ធំ
