ក្រុមអភិរក្សសត្វព្រៃបានអះអាងថា ហ្វូងសត្វដំរីនៅកម្ពុជា កំពុងមានកំណើនខាងបរិមាណ ក្នុងរយៈពេល១០ឆ្នាំចុងក្រោយនេះ តែមានកំណើនយឺត ព្រោះតែមានកត្តាគំរាមកំហែងផ្សេងៗ។
លោក សេង ទៀក នាយកអង្គការមូលនិធិសកលសម្រាប់អភិរក្សធនធានធម្មជាតិ ហៅកាត់ថា WWF ប្រចាំកម្ពុជាបានថ្លែងថា ចំនួនសត្វដំរីព្រៃនៅកម្ពុជា អាចមានកើនឡើងជាងឆ្នាំ២០០៩ ដែលមានពីចន្លោះ៤០០ ទៅ៦០០ក្បាល ដោយសារបច្ចុប្បន្ននេះ មានការរកឃើញតាមរយៈសំណាកសត្វដំរីចំនួន៦ក្បាល ក្នុងទំហំដី១០០គីឡូម៉ែត្រក្រឡា ដែលផ្ទុយពីមុន របាយនៃសត្វដំរីនេះ មិនត្រូវបានរកឃើញ។
លោកបានបញ្ជាក់ថា កំណើនដំរីព្រៃដែលកើតមានថ្មី គឺមាននៅក្នុងតំបន់ភាគឦសាន្តនៃប្រទេសនៅកម្ពុជា ដោយសារនៅតំបន់នោះជាកន្លែងអភិរក្សដែនជម្រកសត្វព្រៃ និងធនធានជីវចម្រុះ ស្របពេលចន្លោះ ឆ្នាំ២០១៣ ដល់ឆ្នាំ២០១៦ សត្វដំរីព្រៃ ចំនួន១០ក្បាល ត្រូវបានគេសម្លាប់ ដើម្បីយកភ្លុកនិងកន្ទុយលក់ដោយខុសច្បាប់។
លោកបានជំរុញឲ្យមានកិច្ចខិតខំប្រឹងប្រែងគាំពារដល់សត្វប្រភេទនេះ តាមរយៈជួយ ថែរក្សាព្រៃឈើ ប្រព័ន្ធអេកូឡូស៊ីធម្មជាតិ ការបញ្ឈប់ការបរបាញ់ ការដាក់អន្ទាក់ជាដើម។
យោងតាមរបាយការណ៍របស់អង្គការសមាគមអភិរក្សសត្វព្រៃ បានឲ្យដឹងថា ក្រោមការអភិរក្សរបស់អង្គការសង្គមស៊ីវិល ក្រសួងបរិស្ថាន និងប្រជាសហគមន៍ បច្ចុប្បន្នកម្ពុជាមានជម្រកធម្មជាតិសម្រាប់សត្វដំរីព្រៃជាង ៨៦ម៉ឺនជម្រក នៅខេត្តមណ្ឌលគិរីក៏ដូចជាជួរភ្នំក្រវាញ៕ (ដកស្រង់)
