កំពង់ធំ ៖ ករណីគ្រោះថ្នាក់ចរាចរណ៍ មួយបណ្តាលឲ្យមានមនុស្សស្លាប់នៅហ្នឹងកន្លែងម្នាក់ និងរបួសធ្ងន់ម្នាក់ ដោយសាររថយន្តម៉ាក៤៧០មួយគ្រឿង បើកបុកអ្នកជិះម៉ូតូ បណ្តាលឲ្យអូសម៉ូតូ៣០០ម៉ែត្រ ពីកន្លែងកើតហេតុ ទើបតៃកុងឡានបានរត់គេចខ្លួនបាត់ស្រមោល ដោយសារមានរថយន្តមកបណ្តោះ។
លោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បានឲ្យដឹងថា ក្រោយពីទទួលបានព័ត៌មាន ថាមានករណីរថយន្តដឹកឈើគ្រញូងដោយខុសច្បាប់ បើកបុកម៉ូតូបណ្តាលឲ្យមានមនុស្សស្លាប់ លោកបានចុះទៅកន្លែងកើតហេតុភ្លាមៗ រួមជាមួយលោក ឧត្តមសេនីយ៍ត្រី អ៊ុក កុសល់ ស្នងការនគរបាលខេត្តកំពង់ធំ ដើម្បីពិនិត្យអត្តសញ្ញាណនៅក្នុងរថយន្ត ក្នុងការរួបរួមភស្តុតាងរបស់ជន បង្ករនៅកន្លែងកើតហេតុក្នុងនោះលោកព្រះរាជអាជ្ញាបានបញ្ជាឲ្យកម្លាំងសមត្ថកិច្ចនៅតាមមូលដ្ឋានឃ្លាំមើលរថយន្តបណ្តោះតៃកុងឡានដែលបង្ករឲ្យមានគ្រោះថ្នាក់ ដល់អាយុជីវិតរបស់អ្នកដ៏ទៃ ។
លោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បានបញ្ជាក់ថា រថយន្តដែលបង្ករជាប្រភេទ រថយន្តម៉ាក៤៧០ ពណ៌ ខ្មៅ ពាក់ស្លាកលេខ 2I- 0730 ដឹកឈើគ្រញូងពេញក្នុងឡាន ក្នុងរថយន្តបាន ពិនិត្យឃើញថា តៃកុងឡានមានការពាក់ព័ន្ឋនឹងការប្រើប្រាស់គ្រឿងញៀន គឺបើកបណ្តើរ ប្រើប្រាស់គ្រឿងញៀនបណ្តើរ ដោយមានវត្ថុតាង នៅក្នុងរថយន្ត ករណីគ្រោះថ្នាក់ចរាចរណ៍នេះ គឺត្រូវបានកើតឡើងមុននេះបន្តិច វេលាម៉ោង ៨.៣០នាទីយប់ ថ្ងៃ ទី១៤ ខែ សីហា ឆ្នាំ ២០១៧ នៅតាមបណ្តោយផ្លូវអាស៊ាន វាងក្រុង ស្ថិតនៅក្នុងសង្កាត់ព្រៃតាហ៊ូ ក្រុង ស្ទឹង សែន ខេត្តកំពង់ធំ ។
លោក អ៊ិត សុធា បានបញ្ជាក់ផងដែរថា រថយន្តដឹកឈើគ្រញូងនេះ បើកបុកម៉ូតូអូសប្រមាណ៣០០ម៉ែត្រ រហូតទៅមុខលែងរួច ទើបបានចុះរត់ ហើយមានឡានមកដឹកបណ្តោះយកតៃកុងឡានទៅបាត់ ចំណែកជនរងគ្រោះដែលរបួសធ្ងន់ត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ រីឯសាកសពត្រូវបាន ប្រគល់ជូនសាច់ញាតិទទួលយកទៅធ្វើបុណ្យតាមប្រពៃណី ចំណែរថយន្ត រួមទាំងឈើគ្រញូងត្រូវបាន នាំមករក្សាទុកនៅកន្លែងសុវត្តិភាព គឺរដ្ឋបាលព្រៃឈើ ហើយថ្ងៃស្អែករុះរើឈើហើយ ទើបបានប្រគល់ឲ្យខាង ប៉ូលិសចរាចរណ៍វិញ ។ ដោយ សុផាត
